ବରଗଡ଼ ଅଫିସ, ୧୧।୩: କମ୍ ଦାମରେ ସୁଷମ ଖାଦ୍ୟ ଯୋଗାଣ ପାଇଁ ସରକାର ଆହାର ଯୋଜନା କାର୍ଯ୍ୟକାରୀ କରିଛନ୍ତି। ଏହି କ୍ରମରେ ବରଗଡ଼ ସହରରେ ଆହାର କେନ୍ଦ୍ର ଖୋଲାଯାଇଛି। ତେବେ ଏଠାରେ ସୁଷମ ଖାଦ୍ୟ ବଦଳରେ ନିମ୍ନମାନର ଖାଦ୍ୟ ଦିଆଯାଉଥିବା ଅଭିଯୋଗ ହେଉଛି। ଅପରପକ୍ଷେ ସେ ନେଇ କିଛି ପଚାରିଲେ କିମ୍ବା ପ୍ରତିବାଦ କଲେ ଆହାର କେନ୍ଦ୍ରର କର୍ମଚାରୀମାନେ ମାଡ଼ ମାରୁଥିବା ଅଭିଯୋଗ ହୋଇଛି। ଶନିବାର ଏଭଳି ଏକ ଅଭାବନୀୟ ଘଟଣା ଏଠାରେଘଟିଛି ।
ବରଗଡ଼ର ସୁଶ୍ରୀ ସଙ୍ଗୀତା ମହାରଣା ଆହାର କେନ୍ଦ୍ରକୁ ଖାଇବାକୁ ଯାଇଥିଲେ। ସେଠାରେ କାର୍ଯ୍ୟରତ କର୍ମଚାରୀମାନେ ଲୋକଙ୍କୁ ଖାଇବାକୁ ଦେବା ପାଇଁ କୁଣ୍ଠାବୋଧ କରୁଥିବା ଏବଂ ନିମ୍ନମାନର ଖାଦ୍ୟ ଦେଉଥିବା ଅଭିଯୋଗ କଲେ ଦୁର୍ବ୍ୟବହାର ପ୍ରଦର୍ଶନ କରୁଥିବା ସେ ଦେଖିବାକୁ ପାଇଥିଲେ। ତାହା ସଙ୍ଗୀତା ନିଜ ମୋବାଇଲରେ ରେକର୍ଡ କରୁଥିବା ସମୟରେ ଆହାର କେନ୍ଦ୍ରର କର୍ମଚାରୀମାନେ ତାଙ୍କୁ ମାଡ ମାରିବା ସହିତ ମୋବାଇଲ ଛଡାଇ ନେଇଥିଲେ ବୋଲି ସଙ୍ଗୀତା ବରଗଡ଼ ଟାଉନ ଥାନାର ଏତଲା ଦେଇଛନ୍ତି। ସେହିପରି ଆହାର କେନ୍ଦ୍ରକୁ ଆସିଥିବା ଅନ୍ୟ ଲୋକେ ମଧ୍ୟ ଅନୁରୂପ ଅଭିଯୋଗ କରିଛନ୍ତି। ଆହାର କେନ୍ଦ୍ରରେ ଏଭଳି ଘଟଣା ଚର୍ଚ୍ଚାର ବିଷୟ ହୋଇଥିବାବେଳେ ଏହାର ବିଧିବଦ୍ଧ ତଦନ୍ତ ସହିତ କାର୍ଯ୍ୟାନୁଷ୍ଠାନ ନେବାକୁ ବିଭିନ୍ନ ମହଲରେ ମତପ୍ରକାଶ ପାଇଛି।