ଭୁବନ, ୭ା୯(ଡି.ଏନ.ଏ)-ଦୁଲୁଦୁଲି, ଢୋଲ, ଚାଙ୍ଗୁରେ କମ୍ପୁଥିଲା ପରିବେଶ। ଆଧୁନିକ, ପୁରାତନ ଗୀତର ତାଳେତାଳେ ଗୋଟିଏ ପରେ ଗୋଟିଏ ମନଛୁଅଁା ସଙ୍ଗୀତ ପରିବେଷଣ କରୁଥିଲେ ରାଜ୍ୟ ବାହାରୁ ଆସିଥିବା ବ୍ରାସ୍ ବ୍ୟାଣ୍ଡ ଦଳର ବାଦ୍ୟକାର। କେଉଁଠି ଚିତ୍ତାକର୍ଷକ ଅଙ୍ଗଭଙ୍ଗୀରେ ଶିଳ୍ପୀମାନେ ଗୋଟିପୁଅ ନୃତ୍ୟ ପରିବେଷଣ କରୁଥିଲେ ତ ଅନ୍ୟ କେଉଁଠି ଅନ୍ୟ କେଉଁଠି ଆଦିବାସୀ ନୃତ୍ୟ ସାଜିଥିଲା ପ୍ରମୁଖ ଆକର୍ଷଣ। ଜନସମୁଦ୍ର ମଧ୍ୟରେ ପଛକୁ ପଛ ଧାଡ଼ି ବାନ୍ଧି ଚାଲିଥିଲେ ୩୬ ମେଢ। ଗଣପତି ବାପ୍ପା ମୋରିୟା… ଧ୍ୱନିରେ ପରିବେଶ ଫାଟି ପଡୁଥିବାବେଳେ ଏକ ଭାବବିହ୍ବଳ ପରିବେଶ ମଧ୍ୟରେ ଭୁବନ ସହରବାସୀ ମେଲାଣି ଦେଇଛନ୍ତି ବିଦ୍ୟାଦାତାଙ୍କୁ। ବିଳମ୍ବିତ ରାତି ଯାଏ ଭସାଣି କାର୍ଯ୍ୟକ୍ରମ ଚାଲିଥିବାବେଳେ ସାରା ସହରରେ କଡ଼ାକଡ଼ି କରାଯାଇଥିଲା ପୋଲିସ ସୁରକ୍ଷା ବ୍ୟବସ୍ଥା।
୩୧ ତାରିଖରୁ ଚାଲିଥିବା ଭୁବନର ପ୍ରସିଦ୍ଧ ଗଶେଣ ପୂଜା ବୁଧବାର ଶେଷ ହୋଇଛି। ଭାବବିହ୍ବଳ ପରିବେଶରେ ଶ୍ରୀଗଣପତିଙ୍କୁ ମେଲାଣି ଦେଇଛନ୍ତି ସହରବାସୀ। ପ୍ରଶାସନ ଓ ଗଣେଶ ପୂଜା କ୍ରିୟାନୁଷ୍ଠାନ କମିଟି ତତ୍ତ୍ୱାବଧାନରେ ସମସ୍ତ କାର୍ଯ୍ୟକ୍ରମ ଶାନ୍ତିଶୃଙ୍ଖଳାର ସହ ସମ୍ପନ୍ନ ହୋଇଛି। ପୂର୍ବ ନିଷ୍ପତ୍ତି ଅନୁଯାୟୀ, ପୂର୍ବାହ୍ନ ୧୦ଟାରୁ ମେଲଣ ପଡ଼ିଆରୁ କ୍ରମାନ୍ବୟରେ ବାହାରିଥିବା ୩୬ ମେଢ ବ୍ଲକ ଛକ, ରାମ ମନ୍ଦିର, ଲତାବିଲ, ନୂଆବଜାର ଦେଇ ସାରା ସହର ପରିକ୍ରମା କରିଥିଲେ। କାମାକ୍ଷାନଗର ଉପଜିଲାପାଳ ଜ୍ୟୋତି ଶଙ୍କର ସାହୁଙ୍କ ତତ୍ତ୍ୱାବଧାନ ଏବଂ ଭୁବନ ଥାନାଧିକାରୀ ସୌଭାଗ୍ୟ କୁମାର ସ୍ବାଇଁଙ୍କ ନେତୃତ୍ୱରେ ୨ ପ୍ଲାଟୁନ୍ ପୋଲିସ ଫୋର୍ସ, ୪ ଜଣ ଅଫିସର ଶାନ୍ତି ଶୃଙ୍ଖଳା ରକ୍ଷା ଦାୟିତ୍ୱରେ ନିୟୋଜିତ ହୋଇଥିଲେ। ବିଳମ୍ବିତ ରାତି ଯାଏ ଭସାଣି ଶୋଭାଯାତ୍ରା ଚାଲିଥିବାବେଳେ ରଗଡ଼ି ନାଳରେ ମୂର୍ତ୍ତିଗୁଡ଼ିକୁ ବିସର୍ଜନ କରାଯାଇଛି।