ଭୁବନେଶ୍ୱର,୪।୯: ୨୦୨୦ ଅଗଷ୍ଟ ମାସରେ ଓଡିଶାରେ ରାଜ୍ୟ ଜିଏସ୍ଟି (ଏସ୍ଜିଏସ୍ଟି) ବାବଦକୁ ପ୍ରାୟ ୬୮୬.୧୫ କୋଟି ଟଙ୍କା ଆଦାୟ ହୋଇଛି। ଏହା ଗତ ବର୍ଷ ଅଗଷ୍ଟ ତୁଳନାରେ ପ୍ରାୟ ୧.୭୬% କମ୍ ବୋଲି ଜଣାପଡିଛି। ସେହିଭଳି ଚଳିତ ବର୍ଷ ଏହାର ପରିମାଣ ମଧ୍ୟ କ୍ରମାଗତ ହ୍ରାସ ପାଇ ଚାଲିଛି। ଚଳିତ ବର୍ଷ ଜୁନରେ ୭୫୯.୧୭ କୋଟି, ଜୁଲାଇରେ ୭୯୪.୦୨ କୋଟି ଏସ୍ଜିଏସ୍ଟି ଆଦାୟ ହୋଇଥିଲା। କରୋନା ମହାମାରୀ ଯୋଗୁ ସରକାରଙ୍କ ପକ୍ଷରୁ ରିଟର୍ଣ୍ଣ ଫାଇଲିଂ ଲାଗି ଟିକସଦାତାମାନଙ୍କୁ ଅଧିକ ସମୟ ଦିଆଯାଇଥିବାରୁ ଚଳିତ ଜୁନ, ଜୁଲାଇ ଓ ଅଗଷ୍ଟରେ ଜିଏସ୍ଟି ଆଦାୟର ପରିମାଣ ହ୍ରାସ ପାଇଥିବା ସୂଚନା ମିଳିଛି।
ସେହିଭଳି ଅଗଷ୍ଟରେ ରାଜ୍ୟ ଜିଏସ୍ଟି- ୬୮୬.୧୫ କୋଟି ଟଙ୍କା, କେନ୍ଦ୍ରୀୟ ଜିଏସ୍ଟି(ସିଜିଏସ୍ଟି) ୫୩୮.୯୧କୋଟି ଟଙ୍କା, ସମନ୍ବିତ ଜିଏସ୍ଟି (ଆଇଜିଏସ୍ଟି) ୬୩୦.୧୪ କୋଟି ଟଙ୍କା ଏବଂ ସେସ୍ ବାବଦକୁ ୪୯୩.୦୮ କୋଟି ଟଙ୍କା (ମୋଟ ୨୩୪୮.୨୮ କୋଟି ଟଙ୍କା) ଆଦାୟ କରାଯାଇଛି। ରାଜ୍ୟ ବାଣିଜ୍ୟ କର ଓ ଜିଏସଟି କମିଶନରଙ୍କ ପକ୍ଷରୁ ଜାରି ସୂଚନା ଅନୁସାରେ ଅଗଷ୍ଟରେ କେନ୍ଦ୍ରୀୟ ଜିଏସ୍ଟି (ସିଜିଏସ୍ଟି)ରେ ୦.୭% ଏବଂ ସେସ୍ ବାବଦକୁ ୧୦% ଆଦାୟ ପରିମାଣ ବୃଦ୍ଧି ପାଇଛି। ସିଜିଏସ୍ଟି ବାବଦକୁ ୫୩୮.୯୧ କୋଟି ଟଙ୍କା ଏବଂ ସେସ୍ ବାବଦକୁ ୪୯୩.୦୮ କୋଟି ଟଙ୍କା ଆଦାୟ କରାଯାଇଛି। ଗତ ବର୍ଷ ଅଗଷ୍ଟରେ ୫୩୪.୬୮ କୋଟି ଟଙ୍କାର ସିଜିଏସ୍ଟି ଓ ୪୪୮.୯୧ କୋଟି ଟଙ୍କା ସେସ୍ ଆଦାୟ ହୋଇଥିଲା। ସେହିଭଳି ଚଳିତ ବର୍ଷ ଅଗଷ୍ଟରେ ୬୩୦.୧୪ କୋଟି ଟଙ୍କାର ସମନ୍ବିତ ଜିଏସ୍ଟି ଆଦାୟ ହୋଇଛି। ଯାହା ଗତ ବର୍ଷର ଆଦାୟ ପରିମାଣ ୮୧୫.୧୭ କୋଟି ଟଙ୍କା ଠାରୁ ପ୍ରାୟ ୨୨.୭୦% କମ୍ ବୋଲି ମଧ୍ୟ ସୂଚନା ମିଳିଛି। ସେହିଭଳି ରାଜ୍ୟରେ ପେଟ୍ରୋଲିୟମ ସାମଗ୍ରୀ ଉପରେ ଲଗାଯାଇଥିତ୍ବା ଭାଟ୍ରୁ ଉପରେ ଜୁଲାଇରେ ୫୨୧.୪୭ କୋଟି ଟଙ୍କା ଏବଂ ଅଗଷ୍ଟରେ ୫୬୮.୭୮ କୋଟି ଟଙ୍କା ଆଦାୟ ହୋଇଛି। ଗତ ବର୍ଷ ଜୁଲାଇରେ ୫୦୯.୦୩ କୋଟି ଟଙ୍କା ଏବଂ ଅଗଷ୍ଟରେ ୪୯୧.୦୨ କୋଟି ଟଙ୍କା ଆଦାୟ ହୋଇପାରିଥିଲା। ଗତ ବର୍ଷ ଅପେକ୍ଷା ଚଳିତ ବର୍ଷ ଏହି ସମୟରେ ଭାଟ୍ ସଂଗ୍ରହ ଉନ୍ନତ ରହିଥିବା ସୂଚନା ରହିଛି।