ବରଗଡ଼,୨୧ା୯(ପ୍ରେମାନନ୍ଦ ଖମାରୀ): ବରଗଡ଼ରେ ଗୁରୁବାର ସକାଳୁ କେନ୍ଦ୍ରୀୟ ଆୟକର ବିଭାଗ ପକ୍ଷରୁ ବଡ଼ଧରଣର ଚଢ଼ାଉ ଜାରି ରହିଛି। ଜିଲାର ବରଗଡ଼ ସହର ସମେତ ସୋହେଲା ଆଦି ଅଞ୍ଚଳର ପ୍ରାୟ ୮୦ ସ୍ଥାନରେ ଏହି ରେଡ୍ ଜାରି ରହିଛି। ବିପୁଳ ପରିମାଣରେ ଆୟକର ଫାଙ୍କିଥିବା ଅଭିଯୋଗରେ ଏହି ଚଢ଼ାଉ ଚାଲିଥିବା ସୂଚନା ମିଳିଛି। ବରଗଡ଼ ଜିଲା ସୋହେଲା ରୋଡ଼ସ୍ଥିତ ବାଳଗୋପାଳ ଅଏଲ ମିଲ୍ ମାଲିକଙ୍କ ବାସଭବନ, ତାଙ୍କ ଫାର୍ମ ହାଉସରେ ଏହି ଚଢ଼ାଉ ଚାଲିଛି। ସେହିପରି ଏହି ପ୍ରତିଷ୍ଠାନର ମାଲିକଙ୍କ ସହିତ ଲିଙ୍କ୍ରେ ଥିବା ଅନେକ ବ୍ୟବସାୟୀ ଏବଂ ସେମାନଙ୍କ ବ୍ୟବସାୟିକ ପ୍ରତିଷ୍ଠାନରେ ଏକକାଳୀନ ଚଢାଉକୁ ନେଇ ଜିଲାବ୍ୟାପୀ ଜୋରଦାର୍ ଚର୍ଚ୍ଚା ଚାଲିଛି। ବରଗଡ଼ ମହାନ୍ତିପଡ଼ାସ୍ଥିତ ଗଜାନନ କମ୍ପ୍ଲେକ୍ସ, ମା’ ଶ୍ୟାମା ଏନ୍କ୍ଲେଭ୍ର ୧୦୫ ନମ୍ବର ଘରେ, ରିଏଲ ଇଷ୍ଟେଡ୍ କାରବାର କରୁଥିବା ବରଗଡ଼ର ବଡ଼ ପ୍ରତିଷ୍ଠିତ ବ୍ୟକ୍ତିଙ୍କ ଘରେ, ସୋହେଲାସ୍ଥିତ ଏକ ଔଷଧ ଦୋକାନରେ ଏପରି ଭିନ୍ନ ଭିନ୍ନ ଚଢ଼ାଉ ଜାରି ରହିଛି। ଚଢାଉ ଜାରି ରହିଥିବା ଯୋଗୁ ସବିଶେଷ ବିବରଣୀ ମିଳିପାରିନାହିଁ। ତେବେ ଆୟକର ଠକେଇରେ କେଉଁ ବ୍ୟବସାୟୀମାନେ ସମ୍ପୃକ୍ତ ଅଛନ୍ତି ଏବଂ କିଏ କେତେ ଟଙ୍କାର ଆୟକର ଫାଙ୍କିଛନ୍ତି, ଚଢ଼ାଉ ସରିବା ପରେ ହିଁ ସାମ୍ନାକୁ ଆସିବ।
