ବେଜିଂ,୨୭।୧୨: ଚାଇନାରେ କରୋନା ସ୍ଥିତି ଭୟଙ୍କର ହୋଇଛି। ଦେଶର ବିଭିନ୍ନ ସ୍ଥାନରେ ପ୍ରତିଦିନ ଲକ୍ଷ ଲକ୍ଷ ଲୋକ ସଂକ୍ରମିତ ହେଉଛନ୍ତି। ଝେଜିଆଙ୍ଗ ପ୍ରଦେଶରେ ଗୋଟିଏ ଦିନରେ ଏକ ଲକ୍ଷରୁ ଅଧିକ ଆକ୍ରାନ୍ତ ଚିହ୍ନଟ ହୋଇଛନ୍ତି। ଝେଜିଆଙ୍ଗ ପ୍ରଦେଶ ହେଉଛି ଚାଇନାର ପ୍ରମୁଖ ଉତ୍ପାଦନ କେନ୍ଦ୍ର। ଏହା ସାଂଘାଇ ନିକଟରେ ଅବସ୍ଥିତ। ଏହାର ଜନସଂଖ୍ୟା ପ୍ରାୟ ୬.୫ କୋଟି। ଏହାର ମୁଖ୍ୟ ସହର ହାଙ୍ଗଜୋ, ଚାଇନାର ସର୍ବବୃହତ ଇ-କମର୍ସ କମ୍ପାନୀ ଆଲିବାବା ଗ୍ରୁପ ଏବଂ ଅନ୍ୟାନ୍ୟ ଟେକ୍ନୋଲୋଜି କମ୍ପାନୀଗୁଡିକ ଏଠାରେ ଅଛି। ଆପଲ ବ୍ୟତୀତ ଜାପାନର ଅଟୋମେକର୍ ନିଡେକ ଏବଂ ଅନ୍ୟାନ୍ୟ ବିଦେଶୀ ନିର୍ମାତାଙ୍କର ମଧ୍ୟ ଏଠାରେ ୟୁନିଟ ଅଛି। କରୋନା ଯୋଗୁ ଏହି ୟୁନିଟ ଗୁଡିକର କାର୍ଯ୍ୟକାରିତା ପ୍ରଭାବିତ ହୋଇପାରେ ଏବଂ ବିଶ୍ୱର ଉତ୍ପାଦନ ଏବଂ ଯୋଗାଣ ଉପରେ ପ୍ରଭାବ ପକାଇବାର ବିପଦ ରହିଛି।
ଚାଇନାରେ ଗତ ୨୦ ଦିନ ମଧ୍ୟରେ ପାଖାପାଖି ୨୫ କୋଟି ଲୋକ କୋଭିଡ୍ରେ ସଂକ୍ରମିତ ହୋଇଥିବାର ସରକାରୀ ଦସ୍ତାବିଜ୍ ସୋସିଆଲ ମିଡିଆରେ ପ୍ରସାରିତ ହେବା ପରେ ନ୍ୟାଶନାଲ ହେଲ୍ଥ କମିଶନ (ଏନ୍ଏଚ୍ସି) ଦୈନିକ ସଂକ୍ରମଣ ସଂଖ୍ୟା ପ୍ରକାଶନ ବନ୍ଦ କରିଦେଇଛି। ଏନ୍ଏଚ୍ସି ଏ ସମ୍ପର୍କରେ ସୂଚନା ଦେଇଥିବାବେଳେ ନୀତି ବଦଳାଇବାର କାରଣ ସମ୍ପର୍କରେ କିଛି କହିନାହିଁ। ଚାଇନାରେ କଠୋର ଟେଷ୍ଟିଂ ନିୟମ ହଟିବା ପରେ ସଂକ୍ରମଣ ମାମଲା ଅତ୍ୟଧିକ ବୃଦ୍ଧି ପାଇଛି। ସାରା ଦେଶର ସଂକ୍ରମଣ ସଂଖ୍ୟା ଚିହ୍ନଟ କରିବା ସମ୍ଭବ ନୁହେଁ ବୋଲି କର୍ତ୍ତୃପକ୍ଷ କହିଛନ୍ତି। ଚାଇନାରେ ଗୋଟିଏ ଦିନରେ ସର୍ବାଧିକ ୩.୭ କୋଟି ଲୋକ କୋଭିଡ୍ ସଂକ୍ରମିତ ହୋଇଥିବାବେଳେ କ୍ରମାଗତ ୪ ଦିନରେ କେହି ପ୍ରାଣ ହରାଇ ନ ଥିବା ଏନ୍ଏଚସି ପ୍ରକାଶ କରିଥିଲା।
