ପ୍ୟାରିସ, ୨୨।୬ : ଆଜିକାଲି, ଅଟୋ, ବସ କିମ୍ବା ମେଟ୍ରୋରେ ହେଉ, ଅନ୍ୟ ପ୍ରତ୍ୟେକ ବ୍ୟକ୍ତି ତାଙ୍କ କାନରେ ଇୟରଫୋନ ବ୍ୟବହାର କରୁଥିବାର ଦେଖିବାକୁ ମିଳୁଛି। ତେବେ ଗବେଷକମାନେ କହିଛନ୍ତି ଯେ ଏହା ସ୍ବାସ୍ଥ୍ୟ ପାଇଁ ବିପଜ୍ଜନକ ହୋଇପାରେ। ଫ୍ରାନ୍ସରେ ଏନେଇ ଏକ ଅଧ୍ୟୟନ କରାଯାଇଛି।
ନ୍ୟାଶନାଲ ଇନଷ୍ଟିଚ୍ୟୁଟ ଅଫ ହେଲ୍ଥ ଆଣ୍ଡ ମେଡିକାଲ ଇନଷ୍ଟିଚ୍ୟୁଟ ଦ୍ୱାରା କରାଯାଇଥିବା ଅନୁସନ୍ଧାନରୁ ଜଣାପଡିଛି ଯେ ଫ୍ରାନ୍ସର ଚାରି ଜଣଙ୍କ ମଧ୍ୟରୁ ଜଣେ ଲୋକ ଶୁଣିବାରେ ଅସୁବିଧା ଭୋଗୁଛନ୍ତି। ସେଠାରେ ଥିବା ଜନସଂଖ୍ୟାର ୨୫ ପ୍ରତିଶତ ଲୋକଙ୍କର ଏପରି ସମସ୍ୟା ରହିଛି। ଅର୍ଥାତ୍ ସେମାନେ ଧୀରେ ଧୀରେ ଶ୍ରବଣ ଶକ୍ତି ହରାଉଛନ୍ତି। ଗବେଷଣାରେ ୧୮ ରୁ ୭୫ ବର୍ଷ ବୟସ୍କ ୧୮୬,୪୬୦ ଜଣଙ୍କୁ ଅନ୍ତର୍ଭୁକ୍ତ କରାଯାଇଥିଲା।ଫ୍ରାନ୍ସରେ କେବଳ ୩୭ ପ୍ରତିଶତ ଲୋକ ଶ୍ରବଣ ଉପକରଣ ବ୍ୟବହାର କରନ୍ତି। ବିଶ୍ୱ ସ୍ବାସ୍ଥ୍ୟ ସଂଗଠନ ଅନୁଯାୟୀ, ୨୦୫୦ ସୁଦ୍ଧା ପୃଥିବୀର ୨୫୦ କୋଟି ଲୋକ ଶ୍ରବଣ ସମସ୍ୟା ଭୋଗିବାର ଆଶଙ୍କା ରହିଛି।
ବିଶ୍ୱ ସ୍ବାସ୍ଥ୍ୟ ସଂଗଠନ ଅନୁଯାୟୀ, ସମ୍ପ୍ରତି ବିଶ୍ୱର ୧୫୦ କୋଟି ଲୋକ ଶ୍ରବଣ ସମସ୍ୟାର ସମ୍ମୁଖୀନ ହେଉଛନ୍ତି। ଏହା ଏକ ସ୍ବାସ୍ଥ୍ୟ ସମସ୍ୟା ଭାବରେ ଦେଖାଯାଉଛି। ଡାକ୍ତରଙ୍କ କହିବାନୁସାରେ, ଇୟରଫୋନର ଅତ୍ୟଧିକ ବ୍ୟବହାର ଦ୍ୱାରା ମୁଣ୍ଡ ବୁଲାଇବା, ନିଦ୍ରାହୀନତା, ମୁଣ୍ଡବିନ୍ଧା ଏବଂ କାନ ଯନ୍ତ୍ରଣା ଇତ୍ୟାଦି ଲକ୍ଷଣ ହୋଇପାରେ। ମନୁଷ୍ୟ କାନର ଶ୍ରବଣ କ୍ଷମତା କେବଳ ୯୦ ଡେସିବଲ। ଯାହା ଧୀରେ ଧୀରେ ୪୦ରୁ ୫୦ ଡେସିବଲକୁ କମିଯାଇଥାଏ।