ଜି.ଉଦୟଗିରି,୯ା୬(ଡି.ଏନ.ଏ.): ଜି.ଉଦୟଗିରିରେ ପାରଦ ଏବେ ୪୦ ଡିଗ୍ରୀ ପାର କରିଛି। ଫଳରେ ପ୍ରଚଣ୍ଡ ଗ୍ରୀଷ୍ମ ପ୍ରବାହରେ ଜନ ଜୀବନ ଅସ୍ତବ୍ୟସ୍ତ ହେଉଥିବା ଦେଖିବାକୁ ମିଳିଛି। ଦିନକୁ ଦିନ ତାପମାତ୍ରା ବଢିବାରେ ଲାଗିଛି। ବୁଧବାର ତାପମାତ୍ରା ସର୍ବାଧିକ ୪୧ ଡିଗ୍ରୀ ରହିଥିବା ବେଳେ ସର୍ବନିମ୍ନ ୨୫ ଡିଗ୍ରୀ ରହିଥିଲା। ଫଳରେ ଦିନ ୧୧ରୁ ଅପରାହ୍ନ ୪ଟା ପର୍ଯ୍ୟନ୍ତ ଘରୁ ବାହାରିବା ମୁସ୍କିଲ ହେଉଥିବା ବେଳେ ବଜାର ଶୂନଶାନ ରହୁଥିବା ଦେଖିବାକୁ ମିଳିଛି। ଏହା ଚଳିତ ବର୍ଷ ସର୍ବାଧିକ ତାପମାତ୍ରା ହୋଇଥିବା ବେଳେ ଏମିତି ଖରା ଆମେ ଗତ ଦଶନ୍ଧି ମଧ୍ୟରେ ଦେଖିନାହୁଁ ବୋଲି କହିଛନ୍ତି ବରିଷ୍ଠ ନାଗରିକ ବିନୋଦ ବିହାରୀ ଦାଶ। ଅନାବଶ୍ୟକ ଭାବେ କଂକ୍ରିଟ ରାସ୍ତା ସହରରେ ବଢିବା ସହିତ ଜଙ୍ଗଲ ନଷ୍ଟ ଏହାର ପ୍ରମୁଖ କାରଣ ହୋଇଥିବା ବେଳେ ଏନ୍ଏସି କଂକ୍ରିଟ ରାସ୍ତା ନିର୍ମାଣ କରିବା ସମୟରେ ଏଥିପ୍ରତି ଦୃଷ୍ଟି ଦେବା ଆବଶ୍ୟକ ବୋଲି କହିଛନ୍ତି।