ଛତ୍ରପୁର,୨୨।୫(ଡି.ଏନ୍.ଏ.): ରାଜ୍ୟରେ କରୋନା ସଂକ୍ରମଣ ଦ୍ରୁତ ଗତିରେ ବଢ଼ିବାରେ ଲାଗିଛି। ଏଥିଲାଗି ଘରକୁ ଘର ଯାଇ ସମସ୍ତ ପରିବାର ସଦସ୍ୟଙ୍କ ସ୍ବାସ୍ଥ୍ୟ ସ୍କ୍ରିନିଂ ଉପରେ ସରକାର ଗୁରୁତ୍ୱ ଦେଇଛନ୍ତି। ଫଳରେ ୨୪ତାରିଖରୁ ଘରକୁ ଘର ଯାଇ ସମସ୍ତ ପରିବାର ସଦସ୍ୟଙ୍କ ସ୍ବାସ୍ଥ୍ୟ ସ୍କ୍ରିନିଂ ଆରମ୍ଭ କରାଯିବ ବୋଲି ସରକାର ଘୋଷଣା କରିଛନ୍ତି। ଅପରପକ୍ଷରେ ଏହି ଘୋଷଣା ପୂର୍ବରୁ ଗଞ୍ଜାମ ଜ଼ିଲା ପ୍ରଶାସନ ଆଗୁଆ ପଦକ୍ଷେପ ଗ୍ରହଣ କରିଛନ୍ତି। ମେ’ ୧୯ରୁ ସ୍ବାସ୍ଥ୍ୟକର୍ମୀମାନେ ଘରକୁ ଘର ବୁଲି ସ୍ବାସ୍ଥ୍ୟ ସ୍କ୍ରିନିଂ କରୁଥିବା ଜଣାପଡ଼ିଛି। ସୂଚନାଯୋଗ୍ୟ, ବର୍ତ୍ତମାନ ଗଞ୍ଜାମରେ ଦୈନିକ ସଂକ୍ରମଣ ସଂଖ୍ୟା ୩ଅଙ୍କ ବିଶିଷ୍ଟ ରହୁଛି। ଶୁକ୍ରବାର ସୁଦ୍ଧା ଗଞ୍ଜାମରେ ୪ ଲକ୍ଷ ୭୫ ହଜାର ୫୨୮ ଜଣଙ୍କ ସ୍ବାସ୍ଥ୍ୟ ସ୍କ୍ରିନିଂ କରାଯାଇଛି ବୋଲି ଡିଆରଡିଏ ପି.ଡି. ସିନ୍ଧେ ଦତ୍ତାତ୍ରୟ ଭାଉସାହେବ ସୂଚନା ଦେଇଛନ୍ତି। ଏଥିରୁ ୭୪ଜଣଙ୍କଠାରେ କରୋନା ଲକ୍ଷଣ ଚିହ୍ନଟ ହୋଇଥିବା ବେଳେ ୫୨ଜଣଙ୍କ ଅକ୍ସିଜେନ ସ୍ତର କମିଛି। ସେମାନଙ୍କ ମଧ୍ୟରୁ ୩ଜଣଙ୍କୁ ଚିକିତ୍ସା ଲାଗି ହସ୍ପିଟାଲ ପଠାଯାଇଛି। ତେବେ ଗଞ୍ଜାମ ଜିଲାର ଏହି ଅଭିଯାନରେ ଆଶା କର୍ମୀ, ସ୍ବେଚ୍ଛା ସେବୀ, ସୁପରଭାଇଜର ଓ ଅଙ୍ଗନବାଡିକର୍ମୀମାନେ ସାମିଲ ହୋଇ ଘରକୁ ଘର ବୁଲି ସମସ୍ତ ପରିବାରର ସଦସ୍ୟଙ୍କ ଅକ୍ସିଜେନ ସ୍ତର ସହ ଥର୍ମାଲ ସ୍କ୍ରିନିଂ କରାଯାଉଛି। ଯାହାର ଲକ୍ଷଣ ଦେଖାଯାଉଛି ତାଙ୍କୁ ହସ୍ପିଟାଲକୁ ରେଫର କରାଯାଉଥିବା ଜଣାପଡ଼ିଛି। ଏହି କାର୍ଯ୍ୟରେ ଜିଲାରେ ୨୦୨୧ ଟିମ୍ ସାମିଲ ହୋଇଥିବା ବେଳେ ସେଥିମଧ୍ୟରୁ ଗ୍ରାମାଞ୍ଚଳରେ ୧୮୪୨, ସହରାଞ୍ଚଳରେ ୬୮ଟି ଟିମ୍ ଓ ବ୍ରହ୍ମପୁର ମହାନଗର ନିଗମରେ ୧୧୧ଟି ଟିମ୍ ରହିଥିବା ସୂଚନା ରହିଛି।