ପରିବେଶ ସ୍ବଚ୍ଛ ରଖିବା ଲାଗି ଏକ ଅଭିନବ ଉପାୟ ଆପଣାଇଛନ୍ତି ମନୋଜ ରଞ୍ଜନ। ସେ ଅଳିଆ ଗଦା ହେଉଥିବା ସ୍ଥାନରେ ସୁନ୍ଦର ବଗିଚା କରି କଲୋନିରେ ସ୍ବଚ୍ଛତା ଆଣିପାରିଛନ୍ତି। ମନୋଜ ରାଞ୍ଚିର ହର୍ମୁ ହାଉସିଂ କଲୋନିରେ ରୁହନ୍ତି। ପେସାରେ ସେ ଜଣେ ଶିକ୍ଷକ। ସ୍କୁଲ ସମୟ ପରେ ସେ ବଗିଚା କାମରେ ଲାଗିଯାଆନ୍ତି। କଲୋନିର ରାସ୍ତା କଡ଼ରେ ଗୋଟିଏ ସ୍ଥାନରେ ସବୁବେଳେ ଅଳିଆ ଜମା ରହି ପରିବେଶ ପ୍ରଦୂଷଣ କରୁଥିବାରୁ ସେଠାରେ ଏଭଳି ବଗିଚା କରିଛନ୍ତି। ସେ ଏହି ବଗିଚାରେ ୨୦୦ ପ୍ରକାର ଗଛ ଲଗାଇଛନ୍ତି। ଅଦରକାରୀ ଭାବେ ପଡ଼ି ରହିଥିବା କୁଣ୍ଡସବୁ ସଂଗ୍ରହକରି ସେଥିରେ ଗଛ ଲଗାଇଛନ୍ତି। ଏଥିମଧ୍ୟରେ ବହୁ ଓଷଧୀୟ ଓ ସୌନ୍ଦର୍ଯ୍ୟବର୍ଦ୍ଧକ ଗଛ ରହିଛି। ଏହି ବଗିଚା ଆକର୍ଷଣୀୟ ହୋଇଥିବାରୁ ସେଠାରେ ଲୋକଙ୍କ ଭିଡ଼ ଜମୁଛି ଏବଂ ସେମାନେ ସେଲ୍ଫି ନେଉଛନ୍ତି। ବଗିଚା ଆରମ୍ଭ କରିବା ସମୟରେ ଫୁଲକୁଣ୍ଡ ଓ ଗଛଗୁଡ଼ିକୁ ଲୋକେ ନେଇଯାଉଥିଲେ। କିନ୍ତୁ ସେମାନେ ଏହାର ଗୁରୁତ୍ୱ ଉପଲବ୍ଧି କରିବା ପରେ ସହଯୋଗ କରିବାକୁ ଆଗେଇ ଆସିଥିଲେ। ମନୋଜଙ୍କ ୨ ଝିଅ ଏହି ବଗିଚାର ଯତ୍ନନେବାରେ ତାଙ୍କୁ ସାହାଯ୍ୟ କରୁଛନ୍ତି।