ପଞ୍ଜାବର ଭଟିଣ୍ଡା ଜିଲାର ବାଲୋ ଗାଁର ବୟସ୍କମାନେ ସେମାନଙ୍କ ପରିଚୟ ନିଶ୍ଚିତ କରିବାକୁ ଆଉ ଟିପଚିହ୍ନ ଦେଉନାହାନ୍ତି। ସେମାନେ ସାକ୍ଷର ହୋଇ ପଞ୍ଜାବୀ କିମ୍ବା ଇଂଲିଶରେ ଦସ୍ତଖତ କରିପାରୁଛନ୍ତି। ବୟସ୍କମାନେ ପିଲାଙ୍କ ଭଳି ପ୍ରତିଦିନ ସ୍କୁଲକୁ ଯାଉଛନ୍ତି, ଯାହାର ନାମ ହେଉଛି ବେବେ ବାପୁ ସ୍କୁଲ। ସ୍କୁଲର ଶିକ୍ଷୟିତ୍ରୀ ହେଉଛନ୍ତି ୨୮ ବର୍ଷିଆ ରାଜ୍ବିନ୍ଦର କୌର ଓ ସେ ବୟସ୍କଙ୍କୁ ପଢ଼ାଉଛନ୍ତି। ଏହି ସ୍କୁଲରେ ୫୦ବର୍ଷ ବୟସରୁ କମ୍ କିମ୍ବା ଏହାଠୁ ଅଧିକ ବୟସର ଲୋକ ନାମ ଲେଖାଇଛନ୍ତି। ସ୍କୁଲଟି ସର୍ଦ୍ଦାର ଗୁରୁବଚନ ସିଂ ସେବା ସମିତି ଅଧୀନରେ ଚାଲୁଛି। ଏବେ ଅନେକ ବରିଷ୍ଠ ନାଗରିକ ପଞ୍ଜାବୀରେ ବହିଗୁଡ଼ିକ ପଢି ପାରୁଛନ୍ତି ଏବଂ ନାମ ଦସ୍ତଖତ କରୁଛନ୍ତି । ପିଲାଙ୍କ ଭଳି ସେମାନଙ୍କୁ ବିଭିନ୍ନ ଗଳ୍ପ କୁହାଯାଉଛି। ଏପରି କି ଏହି ସ୍କୁଲରୁ ପଢ଼ି ବହୁବ୍ୟକ୍ତି ସେମାନଙ୍କ ପିଲାମାନଙ୍କୁ ଘରେ ପଢ଼ାଉଛନ୍ତି। ବାଲୋ ଗାଁରେ ଜଣେ ହେଲେ ବି ନିରକ୍ଷର ରହିବେ ନାହିଁ ବୋଲି କୁହନ୍ତି ରାଜ୍ବିନ୍ଦର।