ମାମଲାଗୁଡ଼ିକର ଆପୋସ ସମାଧାନ ଦିଗରେ ଏକ ମାଇଲଖୁଣ୍ଟ ସାଜିଛି ଲିଗାଲ ଷ୍ଟାର୍ଟଅପ ‘ସମ’। ପ୍ରଞ୍ଜଳ ସିହ୍ନା, ଅକ୍ଷତ ଅଶୋକ ଏବଂ ବିକ୍ରମ କୁମାର ଏହି ଷ୍ଟାର୍ଟଅପ ପ୍ରତିଷ୍ଠା କରିଛନ୍ତି। ଚାଣକ୍ୟଙ୍କ ନୀତିରେ ଚାରି ନିୟମ ମଧ୍ୟରେ ଥିବା ‘ସମ’କୁ ଆଧାର କରି ଏଭଳି ନାମକରଣ କରାଯାଇଛି। ବିକ୍ରମ କମ୍ପ୍ୟୁଟର ସାଇନ୍ସରେ ଉଚ୍ଚଶିକ୍ଷା ଲାଭ କରିଥିବା ବେଳେ ଅକ୍ଷତ ଓ ପ୍ରଞ୍ଜଲ ଆଇନରେ ଡିଗ୍ରୀ ହାସଲ କରିଛନ୍ତି। ୨୦୧୫ରେ ସେମାନେ ‘ସମ’ ଆରମ୍ଭ କରିବା ପରଠାରୁ ଏବେ ସୁଦ୍ଧା ଅନ୍ଲାଇନରେ ମଧ୍ୟସ୍ଥଙ୍କ ଜରିଆରେ ୩୫ ଲକ୍ଷ କେସ୍ ସମାଧାନ କରିସାରିଲେଣି। ସେମାନେ ବିଶେଷକରି ବ୍ୟାଙ୍କିଙ୍ଗ, ଫାଇନାନ୍ସିଆଲ ଓ ଇନ୍ସ୍ୟୁରାନ୍ସ ସେକ୍ଟର, ବ୍ରୋକର ଏବଂ ସିକ୍ୟୁରିଟି ମାର୍କେଟର ବିବାଦଗୁଡ଼ିକୁ ସମାଧାନ କରୁଛନ୍ତି। ଏହାସହ ଲୋକ ଅଦାଲତ ସହ କାମକରି ଚାଲାଣ, ଇଲେକ୍ଟ୍ରି ବିଲ୍, ଚେକ୍ ବାଉନ୍ସ ଓ ଦୁର୍ଘଟଣାଜନିତ ଇନ୍ସ୍ୟୁରାନ୍ସ ମାମଲାଗୁଡ଼ିକ ସମାଧାନ କରିପାରୁଛନ୍ତି। ‘ସମ’ ଷ୍ଟାର୍ଟଅପ୍ରେ ଦେଶର ୪୪୩ ଜିଲାରେ ଆଇନ କ୍ଷେତ୍ରରେ ୧୦ ବର୍ଷର ଅଭିଜ୍ଞତା ଥିବା ୩୦୦୦ ଆଇନଜୀବୀଙ୍କୁ ଚୂଡାନ୍ତ ନିଷ୍ପତ୍ତି ନେବା ପାଇଁ ନିଯୁକ୍ତ କରାଯାଇଥିବାବେଳେ ଆଇନ କ୍ଷେତ୍ରରେ ୫ ବର୍ଷର ଅଭିଜ୍ଞଙ୍କୁ ମଧ୍ୟସ୍ଥ ଭାବେ ସାମିଲ କରାଯାଇଛି।
