ବୟସ ୨୫, ହେଲେ ଜାସ୍ କାଲ୍ରାଙ୍କ କାର୍ଯ୍ୟ ଅତ୍ୟନ୍ତ ପ୍ରଶଂସନୀୟ ତଥା ପ୍ରେରଣାଦାୟକ। ଏହି ବୟସରେ ଜାସ୍ ଗୁରୁଗ୍ରାମରେ ଏକ ଆଶ୍ରୟସ୍ଥଳୀରେ ୧,୨୦୦ ଅସହାୟ ଲୋକଙ୍କୁ ରଖି ସେମାନଙ୍କ ଚିକିତ୍ସା ବ୍ୟବସ୍ଥା କରିବା ସହ ଦୈନନ୍ଦିନ ଆବଶ୍ୟକତା ମଧ୍ୟ ପୂରଣ କରୁଛନ୍ତି। ଜାସ୍ ମୁଖ୍ୟତଃ ରାସ୍ତାକଡ଼ରେ ଅସହାୟ ଭାବେ ଜୀବନ ବିତାଉଥିବା ଲୋକଙ୍କୁ ଉଦ୍ଧାର କରି ଆଶ୍ରୟସ୍ଥଳୀରେ ରଖୁଛନ୍ତି। ଏହି ଆଶ୍ରୟସ୍ଥଳୀ ‘ଆର୍ଥ ସର୍ଭାଇବର ଫାଉଣ୍ଡେଶନ’ ଅଧୀନରେ ଚାଲୁଛି। ଏଠାରେ ୫,୦୦୦ ଲୋକ ରହିବା ଭଳି ବ୍ୟବସ୍ଥା ରହିଛି, ଯାହା ବିଶ୍ୱର ସବୁଠୁ ବଡ଼ ମାଗଣାରେ ସେବା ଯୋଗାଉଥିବା ଆଶ୍ରୟସ୍ଥଳୀ। ଏହାର ମୁଖ୍ୟ ଭାବେ ଜାସ୍ ଦାୟିତ୍ୱ ତୁଲାଉଛନ୍ତି। ଜାସ୍ ତାଙ୍କ ପିତା ସମାଜସେବୀ ରବି କାଲ୍ରାଙ୍କ ପ୍ରେରଣାରେ ଏହି ସେବା ଚଳାଇଛନ୍ତି। ରାସ୍ତାକଡ଼ରୁ ଉଦ୍ଧାର କରାଯାଉଥିବା ଲୋକଙ୍କ ପରିଚୟ ଜାଣିବା ପରେ ଜାସ୍ ଅନେକଙ୍କୁ ସେମାନଙ୍କ ପରିବାରକୁ ହସ୍ତାନ୍ତର କରୁଛନ୍ତି। ଏବେ ସୁଦ୍ଧା ୩୦୦୦ରୁ ଅଧିକ ଲୋକଙ୍କୁ ଉଦ୍ଧାର କରି ସେମାନଙ୍କ ପରିବାରକୁ ହସ୍ତାନ୍ତର କରାଯାଇ ସାରିଲାଣି। ତାଙ୍କ ସଂସ୍ଥା ମଧ୍ୟ ହସ୍ପିଟାଲ କିମ୍ବା ରାସ୍ତାରେ ମୃତ୍ୟୁ ଘଟୁଥିବା ୩୦୦୦ ପରିଚୟହୀନ ମୃତଦେହ ଦାହ କରିସାରିଲାଣି।