ବରଗଡ଼ ଅଫିସ,୯।୮: କୋସଲି ସମେତ ଅନ୍ୟ ଅଣସ୍ବୀକୃତ ଭାଷାକୁ ସାମ୍ବିଧାନିକ ମାନ୍ୟତା ଦାବିରେ ସୋମବାର ନୂଆଦିଲ୍ଲୀ ଜନ୍ତରମନ୍ତରଠାରେ କ୍ଲିଅର ଅନୁଷ୍ଠାନ ପକ୍ଷରୁ ଧାରଣା ଦିଆଯାଇଥିଲା। ଧାରଣାରେ କୋଶଲି, ଅଙ୍ଗିକା, ବଜ୍ଜିକା, ମଗହି, ଭୋଜପୁରୀ, ବାଡ଼ୁଗୁ, ରାଜସ୍ଥାନୀ, ହୋ, ମୁଣ୍ଡାରି, କୋଡ଼ବା ଆଦି ଅଣସ୍ବୀକୃତ ଭାଷାର ଶତାଧିକ ଭାଷାକର୍ମୀ ସାମିଲ ହୋଇଥିଲେ। ଏହି ପରିପ୍ରେକ୍ଷୀରେ ଶତାଧିକ ଭାଷାପ୍ରେମୀ ଏବଂ କୋସଲି ଅନୁଷ୍ଠାନ ଯୋଗଦେଇ କୋସଲି ଭାଷାକୁ ସମ୍ବିଧାନର ଅଷ୍ଟମ ସୂଚୀରେ ସାମିଲ କରିବା ପାଇଁ ଦାବି ଉପସ୍ଥାପନ କରିଥିଲେ। କୋସଲି ଭାଷା ତରଫରୁ ଦିଲୀପ ପଶାୟତ, ଲାଲଚନ ବଗର୍ତ୍ତି, ରଣଜିତ ସିଂ ମହାରଥୀ ପ୍ରମୁଖ ଉପସ୍ଥିତ ଥିଲେ। କୋସଲି ଭାଷାଠାରୁ କମ୍ ବ୍ୟବହୃତ ଭାଷା ଗୁଡ଼ିକ ସମ୍ବିଧାନର ଅଷ୍ଟମ ସୂଚୀରେ ସାମିଲ ହେଇସାରିଥିବା ବେଳେ କୋସଲୀ ଭାଷାକୁ ଉପେକ୍ଷା କରାଯିବା ଦୁର୍ଭାଗ୍ୟଜନକ ବୋଲି ସେମାନେ କହିଥିଲେ। ଓଡ଼ିଶା ସରକାର ଏ ନେଇ ଦାବି ଉପସ୍ଥାପନ କରିବାର ଆବଶ୍ୟକତା ରହିଛି ବୋଲି ସେମାନେ ମତପ୍ରକାଶ କରିଥିଲେ। କୋସଲିକୁ ଓଡ଼ିଶାର ଦ୍ୱିତୀୟ ସରକାରୀ ଭାଷା ଭାବେ ପ୍ରଚଳନ କଲେ ପଶ୍ଚିମ ଓଡ଼ିଶାରେ ଶାସନ ପାଇଁ ସୁବିଧା ହୋଇପାରିବ ବୋଲି ଭାଷା କର୍ମୀମାନେ କହିଥିଲେ। ଏହି କ୍ରମରେ କୋସଲି ଭାଷାକୁ ସମ୍ବିଧାନର ଅଷ୍ଟମ ସୂଚୀରେ ସାମିଲ କରିବା ସହିତ କୋସଲବାସୀଙ୍କୁ ସେମାନଙ୍କ ଭାଷା ଅଧିକାର ପ୍ରଦାନ କରିବାକୁ ସେମାନେ ଦାବି କରିଥିଲେ। ଧାରଣାରେ ଭାଷାକର୍ମୀ କୁନ୍ଦନ ଅମିତାଭ(ଅଙ୍ଗିକା), ସୁଧୀର ହିଲସାୟନ (ମଗହି), ସନ୍ତୋଷ ପଟେଲ(ଭୋଜପୁରୀ), ଯୋଗେଶରାଜ କାଦୋସୋଲେ(ବାଡ଼ୁଗୁ), ମନୋଜ ସ୍ବାମୀ(ରାଜସ୍ଥାନୀ), ଲକ୍ଷ୍ମୀକାନ୍ତ ସିଂ(ହୋ), ବିରବଲ ସିଂ (ମୁଣ୍ଡାରୀ), ଅପିୟା ମଛିନ୍ଦ୍ରା(କୋଡ଼ବା) ସମେତ କୋସଲିର ଭାଷାପ୍ରେମୀମାନେ ଯୋଗଦାନ କରିଥିଲେ ବୋଲି କ୍ଲିଅର ଅନୁଷ୍ଠାନର ରାଷ୍ଟ୍ରୀୟ ସଂଯୋଜକ ସାକେତ ଶ୍ରୀଭୂଷଣ ସାହୁ ସୂଚନା ଦେଇଛନ୍ତି। ଧାରଣାକୁ ସମର୍ଥନ ଦେବା ପାଇଁ ପଞ୍ଜାବୀ, ତାମିଲ, କନ୍ନଡ଼ା ଭଳି ସ୍ବୀକୃତିପ୍ରାପ୍ତ ଭାଷା ପ୍ରତିନିଧିମାନେ ମଧ୍ୟ ଯୋଗ ଦେଇଥିବା ସେ କହିଛନ୍ତି। କ୍ଲିଅର ଅନୁଷ୍ଠାନର ରାଷ୍ଟ୍ରୀୟ ସଂଯୋଜକ ସାହୁ ଧାରଣା କାର୍ଯ୍ୟକ୍ରମ ପରିଚାଳନା କରିଥିବାବେଳେ ସଭାପତି ଡଃ ଜୋଗା ସିଂ, ସାଧାରଣ ସମ୍ପାଦକ ସେନ୍ଥିଲ ନାଥନ୍ ପ୍ରମୁଖ ଉପସ୍ଥିତ ଥିଲେ।