ଫୁଲବାଣୀ ଅଫିସ, ୨୪ା୭- କନ୍ଧମାଳ ଜିଲାରେ ଯବାନ-ମାଓବାଦୀଙ୍କ ମଧ୍ୟରେ ଗତ କିଛି ସପ୍ତାହ ହେବ ଗୁଳି ବିନିମୟ ଜାରି ରହିଛି। ପୂର୍ବରୁ ୫ ମାଓବାଦୀଙ୍କ ମୃତ୍ୟୁପରେ ଗୁରୁବାର ପୁଣି ୨ ଜଣଙ୍କର ମୃତ୍ୟୁ ହୋଇଛି। ଏହି ୨ ମାଓବାଦୀଙ୍କ ମୃତ୍ୟୁ ପରେ ରାଜ୍ୟ ପୋଲିସ ମହାନିର୍ଦ୍ଦେଶକ (ଡିଜିପି) ଅଭୟ ଶୁକ୍ରବାର ଫୁଲବାଣୀରେ ପହଞ୍ଚତ୍ ସ୍ଥିତି ଅନୁଧ୍ୟାନ କରିଛନ୍ତି। ପ୍ରଥମେ ମାଓବାଦୀ ଅଭିଯାନରେ ସାମିଲ ଏସ୍ଓଜି ଯବାନଙ୍କୁ ସଫଳତା ପାଇଁ ଅଭିନନ୍ଦନ ଜଣାଇଥିଲେ। ପରେ ଜିଲା ପୋଲିସ କାର୍ଯ୍ୟାଳୟକୁ ଯାଇ ଖବରଦାତା ସମ୍ମିଳନୀ କରିଥିଲେ।
ମାତ୍ର ଏକ ମାସ ମଧ୍ୟରେ କନ୍ଧମାଳରେ ୨ଟି କୋମ୍ବିଂ ଅପରେଶନରେ ୭ କ୍ୟାଡର ମାଓବାଦୀ ନିହତ ହେଲେଣି, ଯାହା ଓଡ଼ିଶା ପୋଲିସର ବଡ ସଫଳତା। ମାଓବାଦୀ ଦମନ ଅଭିଯାନ ଯୋଗୁ ସେମାନଙ୍କ ସଙ୍ଗଠନ ଦୁର୍ବଳ ହୋଇ ପଡିଛି। ରାଜ୍ୟର ୫ ଜିଲା ଏବେ ମାଓବାଦୀ ମୁକ୍ତ ହୋଇ ସାରିଛି। ଖୁବ୍ଶୀଘ୍ର କନ୍ଧମାଳ ମଧ୍ୟ ମାଓବାଦୀ ମୁକ୍ତ ହେବ ବୋଲି ଡିପିଜି କହିଛନ୍ତି। ଏବେ ମାତ୍ର ୧୦ ପ୍ରତିଶତ ମାଓବାଦୀ ହିଁ ସକ୍ରିୟ ଅଛନ୍ତି। ରାଜ୍ୟ ସରକାର ସେମାନଙ୍କ ଥଇଥାନ ପାଇଁ ଭଲ ଯୋଜନା କରିଛନ୍ତି। ଏଥିଯୋଗୁ ଗତବର୍ଷ ୧୩ ମାଓବାଦୀ ଆତ୍ମସମର୍ପଣ କରିଥିଲେ। ଚଳିତ ବର୍ଷ ୧୯ ଜଣ ଆତ୍ମସମର୍ପଣ କରି ସାରିଲେଣି। ତେଣୁ ଅନ୍ୟ ମାଓବାଦୀମାନେ ମଧ୍ୟ ସମାନ ରାସ୍ତା ଆପଣାନ୍ତୁ, ନଚେତ୍ ପୋଲିସ୍ ସେମାନଙ୍କୁ ଛାଡିବ ନାହିଁ ବୋଲି ଡିଜିପି କହିଛନ୍ତି।
ଦକ୍ଷିଣାଞ୍ଚଳ ଡିଆଇଜି ସତ୍ୟବ୍ରତ ଭୋଇ ଉପସ୍ଥିତ ରହି ଗୁରୁବାର ହୋଇଥିବା ଏନ୍କାଉଣ୍ଟର ସମ୍ପର୍କରେ ସୂଚନା ଦେଇଥିଲେ।