ବେଙ୍ଗାଲୁରୁ,୨୫।୬ : କର୍ନାଟକର ବରିଷ୍ଠ ଭାଜପା ନେତା ତଥା ପୂର୍ବତନ ମନ୍ତ୍ରୀ କେ.ଏସ. ଇଶ୍ୱରପ୍ପା ଏକ ବିବାଦୀୟ ମନ୍ତବ୍ୟ ଦେଇଛନ୍ତି। ମସଜିଦ ଭାଙ୍ଗି ମନ୍ଦିର ନିର୍ମାଣ କରାଯିବ ବୋଲି ସେ କହିଛନ୍ତି। ଯେପରି ଅଯୋଧ୍ୟାରେ ଘଟିଛି, ସେହିପରି କାଶୀ ବିଶ୍ୱନାଥ ମନ୍ଦିର ଏବଂ ମଥୁରା ଶ୍ରୀକୃଷ୍ଣ ମନ୍ଦିର ମଧ୍ୟ ହେବ। ଯେଉଁଠାରେ ମୋଗଲମାନେ ମନ୍ଦିର ଭାଙ୍ଗି ମସଜିଦ ନିର୍ମାଣ କରିଛନ୍ତି, ଆମେ ସମସ୍ତ ମସଜିଦ ଭାଙ୍ଗି ସେହି ସବୁ ସ୍ଥାନରେ ମନ୍ଦିର ନିର୍ମାଣ କରିବୁ। ’
ରିପୋର୍ଟ ଅନୁଯାୟୀ, ହାଭେରୀରେ ଇଶ୍ୱରପ୍ପା କହିଛନ୍ତି ମୁସଲମାନମାନଙ୍କ କାରଣରୁ କର୍ନାଟକରେ କଂଗ୍ରେସ କ୍ଷମତାକୁ ଆସିଲା। ଯଦି କୌଣସି ମୁସଲମାନ ନ ଥାନ୍ତେ, ତେବେ କଂଗ୍ରେସ ବର୍ତ୍ତମାନ ସୁଦ୍ଧା ଶେଷ ହୋଇ ଯାଇଥାନ୍ତା। ମୁସଲମାନମାନଙ୍କ କାରଣରୁ କର୍ନାଟକରେ ନିଜର ଅସ୍ତିତ୍ୱ ବଞ୍ଚାଇବାକୁ କଂଗ୍ରେସ ଚେଷ୍ଟା କରୁଛି। କଂଗ୍ରେସ ପାଇଁ ଶ୍ୱଶୁର ଘର ସଦସ୍ୟ ହେଉଛନ୍ତି ମୁସଲମାନ।
କର୍ନାଟକର ବରିଷ୍ଠ ଭାଜପା ନେତା ଇଶ୍ୱରପ୍ପା ଅନୁଷ୍ଠିତ ବିଧାନସଭା ନିର୍ବାଚନରେ ଭାଜପା ପ୍ରାର୍ଥୀଙ୍କ ପ୍ରଥମ ତାଲିକା ପ୍ରକାଶ ପାଇବା ପୂର୍ବରୁ ସନ୍ୟାସ ଘୋଷଣା କରିଥିଲେ। ଇଶ୍ୱରପ୍ପା କର୍ନାଟକର ଭାଜପା ସରକାରରେ ଗ୍ରାମ୍ୟ ଉନ୍ନୟନ ମନ୍ତ୍ରୀ ତଥା ପଞ୍ଚାୟତିରାଜ ମନ୍ତ୍ରୀ ରହିଥିଲେ। କଣ୍ଟ୍ରାକ୍ଟର ସାନ୍ତୋଷ ପାଟିଲଙ୍କ ଆତ୍ମହତ୍ୟାକୁ ନେଇ ତାଙ୍କ ବିରୋଧରେ ଅଭିଯୋଗ ହୋଇଥିଲା। ଏହା ପରେ ନିଜ ପଦରୁ ଇସ୍ତଫା ଦେଇଥିଲେ।