ବ୍ରହ୍ମପୁର ଅଫିସ୍,୧୮ା୩: ବ୍ରହ୍ମପୁରର ଅଧିଷ୍ଠାତ୍ରୀ ଦେବୀ ମା’ ବୁଢ଼ୀ ଠାକୁରାଣୀଙ୍କ ଦ୍ୱିବାର୍ଷିକ ଯାତ୍ରା ନେଇ ଶୁକ୍ରବାର ମଧ୍ୟ ରାତ୍ରରେ ଦେଶୀ ବେହେରା ସାହିରେ ଶୁଭଖୁଣ୍ଟି ସ୍ଥାପନ ହୋଇଛି। ଏଥିପୂର୍ବରୁ ପୂର୍ବାହ୍ନରେ ଦେଶୀ ବେହେରା ସାହିରୁ ଧାଣ୍ଡରା ମାଧ୍ୟମରେ ଯାତ୍ରାର ଶୁଭ ଖୁଣ୍ଟି ସ୍ଥାପନା ନେଇ ସାନବଜାର, ବଡବଜାର, ଲାଲାସାହି, କୁମ୍ଭାରସାହି, ପାଟରାସାହି ସମେତ ଫାଷ୍ଟଗେଟ, ପୁରୁଣା ବ୍ରହ୍ମପୁର ଭଳି ବିଭିନ୍ନ ଅଞ୍ଚଳକୁ ଜଣେ ବ୍ୟକ୍ତି ବୁଲି ଧାଣ୍ଡରା ମାଧ୍ୟମରେ ଠାକୁରାଣୀ ଯାତ୍ରା ନିମନ୍ତେ ଶୁଭଖୁଣ୍ଟି ସ୍ଥାପନ ହେବ ବୋଲି ପ୍ରଚାର କରିଥିଲେ ବୋଲି ଦେଶୀ ବେହେରା ସୂଚନା ଦେଇଛନ୍ତି। ଏହାପରେ ରାତ୍ରି ୧୦ଟା ସମୟରେ ମା’ ବାପାଘର ଅର୍ଥାତ ଦେଶୀ ବେହେରା ସାହି ସ୍ଥିତ ବୁଢି ସାଆନ୍ତାଣୀଙ୍କ ପୀଠ ଘର ନିକଟରେ ଏକ ସଭା ଅନୁଷ୍ଠିତ ହୋଇଥିଲା। ଏଥିରେ ଯାତ୍ରା ପରିଚାଳକ ପାତର୍ଲା ଦୁର୍ଗାପ୍ରସାଦ ଦେଶୀ ବେହେରା ଓ ବହୁ ସାହି ବାସିନ୍ଦା ଉପସ୍ଥିତ ଥିଲେ। ସଭାରେ ସିଦ୍ଧାନ୍ତି ଗୁରୁ ଯାତ୍ରା ନିମନ୍ତେ ତାରିଖ ବାହାର କରିବା ସହ କେତେଦିନ ଯାତ୍ରା ହେବ ସେ ନେଇ ମଧ୍ୟ ସୂଚନା ଦେଇଥିଲେ। ଏହାପରେ ଦେଶୀ ବେହେରା ସାହିଠାରୁ ଶୁଭ ଖୁଣ୍ଟି ମା’ ବୁଢି ଠାକୁରାଣୀ ମନ୍ଦିର ଅଭିମୁଖେ ପୂଜାର୍ଚ୍ଚନା ପାଇଁ ବାହାରିଥିଲା। ସେଠାରେ ପୂଜକଙ୍କ ବିଶେଷ ପୂଜାର୍ଚ୍ଚନା ସହ ଦେଶୀ ବେହେରା ମା’ ଠାକୁରାଣୀଙ୍କୁ ଶୁଭ ଖୁଣ୍ଟି ସ୍ଥାପନ ଓ ଯାତ୍ରା ତାରିଖ ଜଣାଇଥିଲେ। ଏହାପରେ ବାଦ୍ୟ, ମହୁରୀରେ ବିଭିନ୍ନ ଦେବାଦେବୀଙ୍କ ମୁଖା ଓ ବାଘ ଭଳି ମୁଖା ଧାରଣ କରି ଶୁଭ ଖୁଣ୍ଟି ଦେଶୀ ବେହେରା ସାହି ଅଭିମୁଖେ ଯାତ୍ରା କରିଥାଏ। ଏହାପରେ ସେଠାରେ ମା’ଙ୍କ ବାପା ଦେଶୀ ବେହେରା ଓ ତାଙ୍କ ପରିବାର ଶୁଭ ଖୁଣ୍ଟି ପୂଜାର୍ଚ୍ଚନା କରିଥାନ୍ତି। ଏହାପରଦିନଠାରୁ ଅର୍ଥାତ କିଛି ଦିନ ପରେ ଦେଶୀ ବେହେରା ସାହିଠାରେ ମା’ଙ୍କ ଅସ୍ଥାୟୀ ମଣ୍ଡପ ନିର୍ମାଣ ହୋଇଥାଏ।