ପୁରୀ ଅଫିସ, ୨୯ା୧: ଆଧୁନିକ ରାପ୍ ସଙ୍ଗୀତରେ ଶ୍ରୀଜଗନ୍ନାଥ ସଂସ୍କୃତିର ଛାପ ଦେଖିବାକୁ ମିଳିଛି। ଏଭଳି ଆକର୍ଷଣୀୟ ରାପ୍ ସଙ୍ଗୀତ ଗାଇ ଚର୍ଚ୍ଚାକୁ ଆସିଛନ୍ତି ରାପର ‘ବିଗ୍ଡିଲ୍’ ଭାବେ ପରିଚିତ ପୁରୀର ସମୀର ରିଷୁ ମହାନ୍ତି। ପୂର୍ବରୁ ସେ ଏକାଧିକ ରାପ୍ ଗାଇ ଚର୍ଚ୍ଚାକୁ ଆସିଥିବାବେଳେ ତାଙ୍କର ‘ଖୁସି ତ’ ରାପ୍ ସୋସିଆଲ ମିଡିଆରେ ବେଶ୍ ପ୍ରଶଂସା ସାଉଣ୍ଟିଥିଲା। ସମୀର ଜାତୀୟତାବାଦ୍କୁ ନେଇ ରାପ୍ ପ୍ରସ୍ତୁତ କରି ସମସ୍ତଙ୍କ ମନ ଜିଣିପାରିଥିଲେ। ସମ୍ପ୍ରତି ସେ ମହାପ୍ରଭୁ ଶ୍ରୀଜଗନ୍ନାଥ, ସାହିଯାତ, ମାଲଖମ୍ବ, ନାଗାନାଚ, ଗୋଟିପୁଅ, ଓଡ଼ିଶୀ ନୃତ୍ୟ, ବେଳାଭୂମି ସମେତ ପୁରୀ କଳା ସଂସ୍କୃତି ଆଦିର ମିଶ୍ରଣରେ ରାପ୍ ଭିଡିଓ ‘ପୁରୀ ଟୋକା’ ପ୍ରସ୍ତୁତ କରିଛନ୍ତି। ଶୁକ୍ରବାର ବଡ଼ଦାଣ୍ଡରେ ଏହି ଭିଡିଓ ୟୁଟ୍ୟୁବ୍ରେ ଲୋକାର୍ପିତ ହୋଇଛି। ଲୋକାର୍ପଣ ଉତ୍ସବରେ ସମୀରଙ୍କ ସମେତ ଜାତୀୟ ଚଳଚ୍ଚିତ୍ର ପୁରସ୍କାରପ୍ରାପ୍ତ ନିର୍ଦ୍ଦେଶକ ଆଶୁତୋଷ ପଟ୍ଟନାୟକ ଉପସ୍ଥିତ ଥିଲେ। ଉକ୍ତ ଭିଡିଓ ଯୁବବର୍ଗଙ୍କ ସମେତ ସବୁବର୍ଗର ଦର୍ଶକଙ୍କ ମନ ଛୁଇଁବ ବୋଲି ସମୀର ଆଶା ପ୍ରକାଶ କରିଛନ୍ତି। ସେହିପରି ଆଶୁତୋଷ କହିଛନ୍ତି, ପୁରୀ ହେଉଛି କଳା ଓ ସଂସ୍କୃତିର ଗନ୍ତାଘର। ଉପଯୁକ୍ତ ପ୍ରୋତ୍ସାହନ ମିଳିଲେ ଏଠାରୁ ଅନେକ କଳାକାର ଜାତୀୟ ଏବଂ ଅନ୍ତର୍ଜାତୀୟସ୍ତରରେ ପ୍ରତିଷ୍ଠା ଅର୍ଜନ କରିପାରିବେ।
