ଭୁବନେଶ୍ୱର: ଚଳିତ ବର୍ଷ ଅକ୍ଟୋବରରେ ଓଡ଼ିଶାରେ ସାମଗ୍ରୀ ଓ ସେବା ଟିକସ (ଜିଏସ୍ଟି) ସଂଗ୍ରହ ଗତ ବର୍ଷ ଅକ୍ଟୋବର ତୁଳନାରେ ୨୧% ବଢି ୨୪୧୯ କୋଟି ଟଙ୍କା ଛୁଇଁଛି। ସେହିଭଳି ଗତ ବର୍ଷ ତୁଳନାରେ ଚଳିତ ବର୍ଷ ସେପ୍ଟେମ୍ବରରେ ରାଜ୍ୟରେ ପରୋକ୍ଷ ଟିକସ ସଂଗ୍ରହ ୧୮% ବୃଦ୍ଧି ପରିଲକ୍ଷିତ ହୋଇଥିଲା। ଲଗାତର ଦ୍ୱିତୀୟ ମାସ ଲାଗି ରାଜ୍ୟରେ ଜିଏସ୍ଟି ଆଦାୟରେ ବୃଦ୍ଧି ଦେଖାଯାଉଛି। ଅକ୍ଟୋବରରେ ଏଥିରେ ୫.୧୬% ବୃଦ୍ଧି ଘଟିଛି। ଯାହା ସେପ୍ଟେମ୍ବରରେ ୩.୨୪% ବଢିଥିଲା। ଚଳିତ ବର୍ଷ ଅକ୍ଟୋବରରେ ସମନ୍ବିତ ଜିଏସ୍ଟି ସମାଧାନ ପରେ ରାଜ୍ୟ ୪୮୦.୮୩ କୋଟି ଟଙ୍କା ଲାଭ କରିଛି। ଏହା ଗତ ବର୍ଷ ସମାନ ସମୟରେ ୩୦୭.୬୯ କୋଟି ଟଙ୍କା ରହିଥିଲା। ସେହିଭଳି ସେସ୍ ସଂଗ୍ରହରେ ୫୭.୫୫% ବୃଦ୍ଧି ହୋଇଥିବା ସୂଚନା ମିଳିଛି।
ଲକଡାଉନ ଯୋଗୁ ଚଳିତ ବର୍ଷ ଟିକସ ସଂଗ୍ରହ ବାଧାପ୍ରାପ୍ତ ହୋଇଛି। ଚଳିତ ଆର୍ଥତ୍କ ବର୍ଷ ଏପ୍ରିଲରୁ ଅକ୍ଟୋବର ମଧ୍ୟରେ ରାଜ୍ୟ ପରୋକ୍ଷ ଟିକସ ଆଦାୟ ୮.୪୮% ନିମ୍ନରେ ରହି ୪୩୦୯.୨୯ କୋଟି ଟଙ୍କା ରହିଛି। ଗତ ବର୍ଷ ସମାନ ସମୟରେ ଏହା ୪୭୦୮.୩୯ କୋଟି ଟଙ୍କା ରହିଥିଲା। ସେହିଭଳି ଏପ୍ରିଲ-ଅକ୍ଟୋବରରେ ମୋଟ ଜିଏସ୍ଟି ଆଦାୟ କଥା ବିଚାରକୁ ନେଲେ ଏହା ୧୪,୭୦୧ କୋଟି ଟଙ୍କା ରହିଛି। ଗତ ବର୍ଷ ସମାନ ଅବଧିରେ ଏହା ୧୭,୦୨୦ କୋଟି ଟଙ୍କା ରହିଥିଲା। ସେହିଭଳି ରାଜ୍ୟ ମଧ୍ୟରେ ଭାଟ୍ ସଂଗ୍ରହ ଗତମାସଠାରୁ ଉନ୍ନତି ପରିଲକ୍ଷିତ ହୋଇଛି। ଚଳିତ ବର୍ଷ ସେପ୍ଟେମ୍ବର ଏବଂ ଅକ୍ଟୋବରରେ ପେଟ୍ରୋଲିୟମ ଡିଲରଙ୍କଠାରୁ ଯଥାକ୍ରମେ ୪୬୪.୨୫ କୋଟି ଓ ୫୧୪.୨୯ କୋଟି ଟଙ୍କାର ଟିକସ ଆଦାୟ କରାଯାଇଛି। ସେହିଭଳି ଅଣ ଜିଏସ୍ଟି ରାଜସ୍ବ ଆଦାୟରେ ବୃଦ୍ଧି ଦେଖାଯିବା ସହ ଏହା ୩୬.୦୫% ରହିଛି।