ଗୁଆହାଟୀ, ୨୧।୮ : ଆସାମ ସରକାରଙ୍କ ବିଭିନ୍ନ ବିଭାଗରେ ଚତୁର୍ଥ ଶ୍ରେଣୀ ପଦବୀ ପାଇଁ ଲିଖିତ ପରୀକ୍ଷା ସମୟରେ ସମ୍ଭାବ୍ୟ କପିକୁ ରୋକିବା ପାଇଁ ରାଜ୍ୟର ୨୫ ଟି ଜିଲାରେ ରବିବାର ମୋବାଇଲ ଇଣ୍ଟରନେଟ ସେବା ଚାରି ଘଣ୍ଟା ପାଇଁ ବନ୍ଦ ରଖିଥିଲେ। ଯେଉଁ ଜିଲାଗୁଡ଼ିକରେ ପରୀକ୍ଷା ଚାଲିଛି ସେଠାରେ ୧୪୪ ଧାରା ଜାରି କରାଯାଇଥିଲା।
ଅଗଷ୍ଟ ୨୧ ଏବଂ ୨୮ଏବଂ ସେପ୍ଟେମ୍ବର ୧୧ ରେ ଅନୁଷ୍ଠିତ ହେବାକୁ ଥିବା ପରୀକ୍ଷାରେ ୧୪.୩୦ ଲକ୍ଷରୁ ଅଧିକ ପ୍ରାର୍ଥୀ ପରିକ୍ଷାଦେବେ ବୋଲି ଆଶା କରାଯାଉଛି। ଚତୁର୍ଥ ଶ୍ରେଣୀ ପରୀକ୍ଷା ରବିବାର ଦୁଇଟି ସିଫ୍ଟରେ ଅନୁଷ୍ଠିତ ହୋଇଥିବାବେଳେ ଅନ୍ୟ ଦୁଇଟି ତାରିଖରେ ତୃତୀୟ ଶ୍ରେଣୀ ପଦବୀ ପାଇଁ ପରୀକ୍ଷା ଅନୁଷ୍ଠିତ ହେବ। ସମସ୍ତ ପରୀକ୍ଷା ଆସାମ ମାଧ୍ୟମିକ ଶିକ୍ଷା ବୋର୍ଡ ଦ୍ୱାରା ପରିଚାଳିତ ହେଉଛି ।
ବେସରକାରୀ ଟେଲିକମ ସେବା ପ୍ରଦାନକାରୀ ଏୟାରଟେଲ ଏବଂ ରିଲାଏନ୍ସ ଜିଓର ବରିଷ୍ଠ ଅଧିକାରୀଙ୍କ ଅନୁଯାୟୀ ଆସାମ ସରକାରଙ୍କ ନିର୍ଦ୍ଦେଶ ଅନୁଯାୟୀ ୨୫ ଟି ଜିଲାରେ ଇଣ୍ଟରନେଟ ସେବା ଚାରି ଘଣ୍ଟା ପାଇଁ ବନ୍ଦ ରହିଥିଲା। ଏୟାରଟେଲ ଗ୍ରାହକଙ୍କୁ ଏସଏମଏସ ମାଧ୍ୟମରେ ସୂଚନା ଦେଇଛି, ପ୍ରିୟ ଗ୍ରାହକ, ସରକାରୀ ନିର୍ଦ୍ଦେଶ ଅନୁଯାୟୀ, ଆପଣଙ୍କ ଅଞ୍ଚଳରେ ସକାଳ ୧୦ ଟାରୁ ୧୨ଟା ଏବଂ ଅପରାହ୍ନ ୨ଟାରୁ ୪ ଟା ମଧ୍ୟରେ ମୋବାଇଲ ଇଣ୍ଟରନେଟ ସେବା ଅସ୍ଥାୟୀ ଭାବରେ ବନ୍ଦ ରଖାଯାଇଛି।
ଅଗଷ୍ଟ ୧୭ରେ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ସରମା କହିଥିଲେ ଯେ ନିଯୁକ୍ତି ପ୍ରକ୍ରିୟା ସମୟରେ ସମ୍ଭାବ୍ୟ କପିକୁ ଏଡ଼ାଇବା ପାଇଁ ପରୀକ୍ଷା ସମୟରେ ଇଣ୍ଟରନେଟ ସେବା ବନ୍ଦ ରଖାଯିବ। ଏନେଇ ଆସାମ ପୋଲିସ ଏକ ଟୁଇଟରେ କହିଛି ଯେ ଏହି ତିନି ଦିନ ପାଇଁ ପରୀକ୍ଷା ସ୍ଥାନ ତଥା ଏହାର ଆଖପାଖ ଅଞ୍ଚଳରେ ୧୪୪ ଧାରା ଲାଗୁ କରାଯିବ।
ପରୀକ୍ଷା କେନ୍ଦ୍ରକୁ ମୋବାଇଲ ନେବାକୁ ପ୍ରାର୍ଥୀଙ୍କୁ ମଧ୍ୟ ବାରଣ କରାଯାଇଛି। ଏକ ପୃଥକ ଆଦେଶରେ ଗୁଆହାଟୀ ପୋଲିସ କହିଛି ଯେ ଉତ୍ତର ସିଟ ଗ୍ରହଣ, ଜମା ଏବଂ ଯାଞ୍ଚ ପ୍ରକ୍ରିୟା ପର୍ଯ୍ୟନ୍ତ ଗୁଆହାଟୀରେ ଥିବା ଏସଇବିଏସ କାର୍ଯ୍ୟାଳୟର ୧୦୦ ମିଟର ମଧ୍ୟରେ ୧୪୪ ଧାରା ଅନୁଯାୟୀ ନିଷେଧାଦେଶ ଜାରି କରାଯାଇଛି।