ଅନୁଗୋଳ ଅଫିସ, ୨୯।୭ ଅନୁଗୋଳ ଜିଲା ଦେଇ ଯାଇଥିବା ୫୫ନଂ. ଜାତୀୟ ରାଜପଥର ବଅଁରପାଳରୁ ରନ୍ତଲେଇ ପର୍ଯ୍ୟନ୍ତ ରାସ୍ତା ନିର୍ମାଣରେ ଜାତୀୟ ରାଜପଥ ପ୍ରାଧିକରଣ କର୍ତ୍ତୃପକ୍ଷ (ଏନ୍ଏଚ୍ଏଆଇ) ସହଯୋଗ କରୁନାହିଁ। ବାରମ୍ବାର କାର୍ଯ୍ୟ ସମୀକ୍ଷା ସହ ଡ୍ରେନ୍ ନିର୍ମାଣ ପାଇଁ ବ୍ଲୁ ପ୍ରିଣ୍ଟ ମଗାଯାଉଥିଲେ ମଧ୍ୟ ଏନଏଚ୍ଏଆଇ ତାହା ପ୍ରଦାନ କରୁ ନାହିଁ। ଏପରି କି ଚିଠିର ଉତ୍ତର ମଧ୍ୟ ଦେଉନାହିଁ। ଫଳରେ ମରାମତି କାର୍ଯ୍ୟ ଆଗେଇପାରୁ ନ ଥିବା ଜିଲାପାଳ ପ୍ରକାଶ କରିଛନ୍ତି।
ପ୍ରଶାସନ ପକ୍ଷରୁ କୁହାଯାଇଛି, ରାଜପଥର ବଅଁରପାଳରୁ ରନ୍ତଲେଇ ପର୍ଯ୍ୟନ୍ତ ରାସ୍ତା ଅତ୍ୟନ୍ତ କଦର୍ଯ୍ୟ ହୋଇପଡ଼ିଥିଲା। ଆଣ୍ଠୁଏ ଲେଖାଏ ଖାଲରେ ପାଣି କାଦୁଅ ଭରି ରହିଥିଲା। ଏ ନେଇ ବିଭିନ୍ନ ସଙ୍ଗଠନ ଓ ଜିଲାବାସୀଙ୍କ ପକ୍ଷରୁ ଆନ୍ଦୋଳନ, ଧାରଣା ଦିଆଯିବା ପରେ ଜିଲା ପ୍ରଶାସନ ଓ ସ୍ଥାନୀୟ ଜନ ପ୍ରତିନିଧିଙ୍କୁ ନେଇ ବହୁବାର ବୈଠକ କରାଯାଇଥିଲା। ବିଶେଷକରି ଡ୍ରେନ୍ ନିର୍ମାଣ ଓ ପାଣି ନିଷ୍କାସନ ବ୍ୟବସ୍ଥା ପାଇଁ ଜାତୀୟ ରାଜପଥ ପ୍ରାଧିକରଣର ଢେଙ୍କାନାଳ ପିଡିଙ୍କୁ ବାରମ୍ବାର କୁହାଯାଇଥିଲା। କିନ୍ତୁ ସମ୍ପୃକ୍ତ ଅଧିକାରୀ ନ ଶୁଣିବାରୁ ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ବୈଠକ ହୋଇଥିଲା। ଏହାପରେ ଜିଲା ପ୍ରଶାସନ ପକ୍ଷରୁ ଗତ ୨୩ ତାରିଖରେ ଏନ୍ଏଚ୍ଏଆଇ ପିଡି ଢେଙ୍କାନାଳଙ୍କୁ ଚିଠି ନଂ- ଏନ୍ବିସିସି/ଜୋନାଲ ପିଏମ୍ଜିଏସ୍ୱାଇ/ ଅନୁଗୋଳ/୨୦୨୨-୨୩/୧୯୫ରେ ଚିଠି ଲେଖିଥିଲେ। ଏଥିରେ ସ୍ପଷ୍ଟ ଭାବେ ଲେଖାଯାଇଥିଲା ଯେ, ଜିଲା ପ୍ରଶାସନର ଡିଏମ୍ଏଫ୍ ପାଣ୍ଠିରୁ କରାଯାଉଥିବା ଜାତୀୟ ରାଜପଥର ୬ଟି ପ୍ୟାଚ କାର୍ଯ୍ୟ ଚାଲିଛି। ୬ଟି ପ୍ୟାଚ୍ର ନୂତନ ରାସ୍ତା କାର୍ଯ୍ୟ ଶେଷ ହୋଇଥିଲା। କିନ୍ତୁ ଡ୍ରେନ୍ ଓ କ୍ରସ୍ ଡ୍ରେନେଜ୍ ପ୍ରକ୍ରିୟା ପାଇଁ ବାରମ୍ବାର ବ୍ଲୁ ପ୍ରିଣ୍ଟ ମଗାଯାଇଥିଲେ ମଧ୍ୟ ଏନ୍ଏଚ୍ଏଆଇ ତାହାକୁ ପ୍ରଦାନ କଲା ନାହିଁ। ଫଳରେ ୩ଟି ପ୍ୟାଚ ବର୍ଷାରେ ଧୋଇଗଲା। ପୁଣି ଏନ୍ଏଚ୍ଏଆଇକୁ ଡ୍ରେନ୍ ଥିବା ସ୍ଥାନର ବ୍ଳୁ ପ୍ରିଣ୍ଟ ମାଗିଥିଲେ ମଧ୍ୟ ଏହାକୁ ପ୍ରଦାନ କରାଯାଉ ନାହିଁ। ତେଣୁ ଏନ୍ଏଚ୍ଏଆଇର ଅସହଯୋଗ ଯୋଗୁ ବାଧ୍ୟ ହୋଇ ଜିଲା ପ୍ରଶାସନ ମରାମତି କାର୍ଯ୍ୟରୁ ଓହରିଯିବ ବୋଲି ପ୍ରଶାସନ ପକ୍ଷରୁ କୁହାଯାଇଛି।