ପାରାଦୀପ,୨ା୪(ଶରତ ରାଉତ):ଓଡ଼ିଶାର ଏକମାତ୍ର ସରକାରୀ ବୃହତ୍ ବନ୍ଦର ପାରାଦୀପ ଚଳିତ ଆର୍ଥିକ ବର୍ଷରେ ରେକର୍ଡ ୧୪୫.୩୮ ଏମ୍ଏମ୍ଟି (ମିଲିୟନ ମେଟ୍ରିକ ଟନ) ପଣ୍ୟ କାରବାର କରିଛି, ଯାହା ଦେଶର ସମସ୍ତ ବୃହତ୍ବନ୍ଦର କ୍ଷେତ୍ରରେ ସର୍ବାଧିକ। ଫଳରେ ପାରାଦୀପ ଏବେ ଦେଶରେ ୧ ନମ୍ବର ବନ୍ଦର ହୋଇଛି ବୋଲି ପାରାଦୀପ ବନ୍ଦର ପ୍ରଶାସନ ପକ୍ଷରୁ କୁହାଯାଇଛି। ୩୧ ମାର୍ଚ୍ଚ ୨୦୨୪ ମଧ୍ୟରାତ୍ରି ସୁଦ୍ଧା ଏହି କାରବାର ହୋଇଛି। ପୂର୍ବରୁ ଦୀନଦୟାଲ କାଣ୍ଡଲା ଗୁଜରାଟ ପୋର୍ଟ ୧ ନମ୍ବର ସ୍ଥାନରେ ଥିଲାବେଳେ ଏବେ ପାରାଦୀପ ଉକ୍ତ ସ୍ଥାନ ଅକ୍ତିଆର କରିଛି। ଏପରି ସଫଳତା ହାସଲ ପରେ ପ୍ରଶାସନିକ ଭବନରେ ବିଭାଗୀୟ ଅଧିକାରୀମାନେ ସ୍ବତନ୍ତ୍ର ଭାବେ ଉତ୍ସବ ମନାଇଛନ୍ତି।
୨୦୨୩-୨୪ ବର୍ଷରେ ଉପକୂଳ ପରିବହନ ୫୯.୧୯ ଏମ୍ଏମ୍ଟି, ଥର୍ମାଲକୋଲ ୪୩.୯୭ ଏମ୍ଏମ୍ଟି ପଣ୍ୟ କାରବାର କରିଛି। ଏହି ସମୟ ମଧ୍ୟରେ ବନ୍ଦର ମଧ୍ୟରେ ୨୭୧୦ ଜାହାଜ ବୋଝେଇ ଖଲାସ କରାଯାଇଛି। ସେହିପରି ୨୧,୬୬୫ ଟ୍ରେନରେ ବୋଝେଇ ଖଲାସ ହୋଇଛି। ଏହାଦ୍ୱାରା ପାରାଦୀପ ବନ୍ଦର ଟିକସ ବାଦ ୮୫୦ କୋଟି ଟଙ୍କା ରାଜସ୍ବ ପାଇଛି। ଏହା ପୂର୍ବ ବର୍ଷ ତୁଳନାରେ ୨୦ ପ୍ରତିଶତ ଅଧିକ। ଏଥିସହ ପାରାଦୀପ ବନ୍ଦର ଆଗାମୀ ଦିନ ପାଇଁ ବ୍ୟାପକ ଭିତ୍ତିଭୂମି ବିକାଶ ନିମନ୍ତେ ଯାନ୍ତ୍ରିକୀକରଣ ବ୍ୟବସ୍ଥା କରୁଛି। ଏବେ ୮୦% ଯାନ୍ତ୍ରିକୀକରଣ ହୋଇଛି। ଆଗାମୀ ୨୦୩୦ ସୁଦ୍ଧା ୧୦୦ ପ୍ରତିଶତ ଯାନ୍ତ୍ରିକିକରଣ ହେବ ବୋଲି କୁହାଯାଇଛି। ଏନେଇ ନୂତନ ୪ଟି ବର୍ଥ ନିର୍ମାଣ କାର୍ଯ୍ୟ ଚାଲିଛି। ଆଗକୁ ସିଏନ୍ଜି/ଏଲ୍ଏନ୍ଜି ଆଣିବାର ଯୋଜନା ରହିଛି। ରେଳପଥ ଓ ସଡ଼କ ପଥର ବିକାଶ ପାଇଁ ୧୫୦ କୋଟି ଟଙ୍କା ବ୍ୟୟ ଅଟକଳରେ ସମ୍ପ୍ରସାରଣ କାର୍ଯ୍ୟ ଚାଲିଛି। ଶିଳ୍ପ ବିକାଶ ପାଇଁ ବିଭିନ୍ନ କମ୍ପାନୀକୁ ପାରାଦୀପ ବନ୍ଦର ପକ୍ଷରୁ ୭୬୯ ଏକର ଜାଗା ଦିଆଯାଇଛି। ଏଥିରେ ୮୭୦୦ କୋଟି ଟଙ୍କା ପୁଞ୍ଜି ବିନିଯୋଗ ହେବ। ଉକ୍ତ ନୂଆ ପ୍ରକଳ୍ପଗୁଡିକ କାର୍ଯ୍ୟକାରୀ ହେଲେ ସେହି ମାଧ୍ୟମରେ ଅଧିକ ୫୦ ନିୟୁତ ଟନ୍ ପଣ୍ୟ କାରବାର ବୃଦ୍ଧିପାଇବ। ଏହାବାଦ୍ ପର୍ଯ୍ୟାବରଣ ବୃଦ୍ଧି କ୍ଷେତ୍ରରେ ମଧ୍ୟ ଉଲ୍ଲେଖଯୋଗ୍ୟ ପଦକ୍ଷେପ ନିଆଯାଇଛି। ଏପରି ସଫଳତା ପାଇଁ ଅଧ୍ୟକ୍ଷ ପି.ଏଲ୍. ହାରାନ୍ଧ ସମସ୍ତ କର୍ମଚାରୀ, ଶ୍ରମିକ, ବ୍ୟବହାରକାରୀ ସଂସ୍ଥାଗୁଡ଼ିକୁ କୃତଜ୍ଞତା ଜଣାଇଛନ୍ତି।