ଲଣ୍ଡନ, ୧୭ା୧୦: ବ୍ରିଟେନ୍ ପ୍ରଧାନମନ୍ତ୍ରୀ ବୋରିସ୍ ଜନ୍ସନ୍ଙ୍କ କଞ୍ଜରଭେଟିଭ୍ ପାର୍ଟିର ଏମ୍ପି ଡେଭିଡ୍ ଆମେସ୍ଙ୍କୁ ଶୁକ୍ରବାର ଏକ ଚର୍ଚ୍ଚରେ ଅତି ବୀଭତ୍ସ ଭାବେ ହତ୍ୟା କରାଯାଇଛି। ୬୯ ବର୍ଷୀୟ ଡେଭିଡ୍ ନିଜ ନିର୍ବାଚନମଣ୍ଡଳୀର ଲେହ-ଅନ୍-ସି ସହରରେ ଥିବା ଚର୍ଚ୍ଚରେ ଲୋକଙ୍କୁ ଭେଟୁଥିବାବେଳେ ତାଙ୍କୁ ଛୁରିରେ ପ୍ରାୟ ୧୭ ଥର ଆକ୍ରମଣ କରାଯାଇଥିଲା। ଖବରପାଇ ଏସେକ୍ସ ପୋଲିସ ଘଟଣାସ୍ଥଳରେ ପହଞ୍ଚିଲା ବେଳକୁ ଡେଭିଡ୍ଙ୍କ ମୃତ୍ୟୁ ଘଟିସାରିଥିଲା। ଏଥିରେ ଜଣେ ୨୫ ବର୍ଷୀୟ ଯୁବକଙ୍କୁ ଗିରଫ କରାଯାଇଥିବାବେଳେ ତାଙ୍କଠାରୁ ଏକ ଛୁରି ଜବତ ହୋଇଛି। ଏହି ଘଟଣାକୁ ଆତଙ୍କବାଦୀ କାର୍ଯ୍ୟକଳାପ ଘୋଷଣା କରାଯିବା ସହ ଏଥିରେ ଇସ୍ଲାମିକ୍ କଠୋରପନ୍ଥୀଙ୍କ ହାତ ଥିବା ପୋଲିସ ସନ୍ଦେହ କରିଛି। ଆତଙ୍କବାଦୀ ନିରୋଧୀ ପୋଲିସ ଅଧିକାରୀଙ୍କ ଦ୍ୱାରା ଘଟଣାର ତଦନ୍ତ କରାଯାଉଛି। ଏ ବାବଦରେ ଲୋକଙ୍କ ନିକଟରେ ଫଟୋ, ଭିଡିଓ ଭଳି ପ୍ରମାଣ କିମ୍ବା ତଥ୍ୟ ଥିଲେ ତାହା ପୋଲିସକୁ ପ୍ରଦାନ କରିବାକୁ ନିବେଦନ କରାଯାଇଛି।
ଘଟଣା ପରେ ଏମ୍ପିମାନଙ୍କ ସୁରକ୍ଷା ବ୍ୟବସ୍ଥାର ସମୀକ୍ଷା କରିବାକୁ ଆଭ୍ୟନ୍ତରୀଣ ସଚିବ ପ୍ରୀତି ପଟେଲ ନିର୍ଦ୍ଦେଶ ଦେଇଛନ୍ତି। ଏମ୍ପି ଡେଭିଡ୍ଙ୍କ ହତ୍ୟା ଲୋକତନ୍ତ୍ର ଉପରେ ଆକ୍ରମଣ ଏବଂ ଏହା ନିନ୍ଦନୀୟ ବୋଲି ସେ କହିଛନ୍ତି। ଡେଭିଡ୍ ରାଜନୀତିରେ ସବୁଠାରୁ ଦୟାଳୁ, ଭଦ୍ରବ୍ୟକ୍ତି ଥିଲେ ବୋଲି ପ୍ରଧାନମନ୍ତ୍ରୀ ବୋରିସ୍ କହିଛନ୍ତି। ପୂର୍ବତନ ପ୍ରଧାନମନ୍ତ୍ରୀ ଡେଭିଡ୍ କ୍ୟାମେରନ୍ ମଧ୍ୟ ଆମେସ୍ଙ୍କୁ ମୃତ୍ୟୁରେ ଶୋକପ୍ରକାଶ କରିଛନ୍ତି। ପ୍ରକାଶ ଯେ, ଡେଭିଡ୍ ଆମେସ୍ ୧୯୮୩ରେ ପ୍ରଥମ ଥର ପାଇଁ ବାସିଲଡନ୍ରୁ ଏମ୍ପି ଭାବେ ନିର୍ବାଚିତ ହୋଇଥିଲେ। ୧୯୯୨ରେ ସେ ଆସନ ବଜାୟ ରଖିବାରେ ସଫଳ ହେବା ପରେ ପାର୍ଟିରେ ତାଙ୍କ ସମ୍ମାନ ବଢ଼ିଥିଲା। ୧୯୯୭ରୁ ସେ ସାଉଥଏଣ୍ଡ୍ ଓ୍ବେଷ୍ଟରୁ ନିର୍ବାଚନ ଜିତି ଏମ୍ପି ରହିଆସିଥିଲେ। ବ୍ରିଟେନ୍ରେ ରାଜନେତାଙ୍କ ବିରୋଧରେ ହିଂସା ପ୍ରାୟତଃ କମ୍ ଦେଖିବାକୁ ମିଳିଥାଏ। ଏହା ପୂର୍ବରୁ ୨୦୧୬ ଜୁନ୍ରେ ଲେବର ପାର୍ଟିର ମହିଳା ଏମ୍ପି ଜୋ କକ୍ସଙ୍କୁ ଅତି ବିଭତ୍ସଭାବେ ଛୁରି ଭୁସି ଓ ଗୁଳି କରାଯାଇ ହତ୍ୟା କରାଯାଇଥିଲା।