ମହାକାଳପଡ଼ା,୧୭ା୪ (ଡି.ଏନ.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ରାମନଗର ସ୍ଥିତ ମା’ ଦରିଆପାରି ରାମଚଣ୍ଡୀ ମନ୍ଦିର ବିଜେସ୍ଥଳରେ ଝାମୁଯାତ୍ରାର ଗହଳି ପରିଲକ୍ଷିତ ହୋଇଥିଲା। ମା’ଙ୍କ ପୀଠ ପରିସରରେ ବିଭିନ୍ନ ଦୋକାନ ବଜାର ପସରା ମେଲାଇଥିବା ବେଳେ ଭିଡ଼ ମଧ୍ୟରେ ସୁଯୋଗ ଉଣ୍ଡି ଲୁଟେରାମାନେ ମହିଳାଙ୍କ ବେକରୁ ସୁନାଚେନ ଓ ମନିପର୍ସକୁ ଟାର୍ଗେଟ କରୁଥିବା ଅଭିଯୋଗ ହେଉଛି। ସେହିପରି ବାଇକ୍, ସାଇକେଲ ଆଦି ଚୋରି ହେଉଥିବା ସ୍ଥାନୀୟ ବାସିନ୍ଦା ପରିକ୍ଷିତ ଦୋହରା କହିଛନ୍ତି। ଝାମୁଯାତ୍ରାରେ ରାଜ୍ୟ ଓ ରାଜ୍ୟ ବାହାରୁ ଅସ୍ଥାୟୀ ଦୋକାନୀମାନେ ପସରା ମେଲାଇ ଥିବାବେଳେ ସେମାନେ ପରିଚୟପତ୍ର କିଛି ଦେଇ ନ ଥିବା ଅଭିଯୋଗ ହେଉଛି। ବିଶେଷ କରି ଲେଡିସ୍ କର୍ନର ଦୋକାନଗୁଡିକରେ ମହିଳାମାନଙ୍କ ଭିଡ଼ ପରିଲକ୍ଷିତ ହେଉଛି। କେଉଁ ମହିଳା କେତେ ପରିମାଣର ଅଳଙ୍କାର ପରିଧାନ କରୁଛନ୍ତି ସେମାନଙ୍କ ଉପରେ ତୀକ୍ଷ୍ମ ନଜର ରଖୁଛନ୍ତି ଲୁଟେରାମାନେ। ବିଦ୍ୟୁତ୍ କାଟ୍ ସମୟରେ ହେଉ ଅବା ଭିଡ଼ ମଧ୍ୟରେ ସୁଯୋଗ ଉଣ୍ଡି ଲୁଟେରା ମାତୁଛନ୍ତି। ଜଣେ ମହିଳା ନିଜ ନାମ ଗୋପନ ରଖି କହିଛନ୍ତି, ଶନିବାର ରାତିରେ କେତେଜଣ ଲୁଟେରା ଚେନ ଝାମ୍ପିବା ପାଇଁ ଉଦ୍ୟମ କରୁଥିବା ବେଳେ କାନ୍ଧରେ ଧରିଥିବା ଶିଶୁଟି ନାକରେ ଲୁଟେରାଙ୍କ ହାତ ବାଜିବାରୁ ସେ କାନ୍ଦି ଥିଲା। ପଛକୁ ଫେରି ଚାହିଁବାରୁ ଭିଡ଼ ମଧ୍ୟରେ ୨ ଜଣ ଯୁବକ ଚମ୍ପଟ ମାରିଥିଲେ। ଅପରପକ୍ଷରେ ମନ୍ଦିର ପରିଚାଳନା ଟ୍ରଷ୍ଟ ପକ୍ଷରୁ ସୂଚନା କେନ୍ଦ୍ର ନାହିଁ। ଫଳରେ ଅନେକ ଯାତ୍ରୀ ଅସୁବିଧାରେ ପଡୁଥିଲେ ମଧ୍ୟ କାହାକୁ କିଛି ନ ଜଣାଇ ଘରକୁ ଫେରୁଛନ୍ତି। ସେହିପରି ମନ୍ଦିର ପରିଚାଳନା ଟ୍ରଷ୍ଟ ରାଜ୍ୟ ବାହାରୁ ଆସିଥିବା ଅସ୍ଥାୟୀ ବହୁଭାଷୀ ଦୋକାନୀମାନଙ୍କଠାରୁ କୌଣସି ପରିଚୟ ପତ୍ର ରଖିନାହାନ୍ତି ବୋଲି ବୁଦ୍ଧିଜୀବୀ ମହଲରେ କ୍ଷୋଭ ପ୍ରକାଶ ପାଇଛି। ତେବେ ପୋଲିସ ସୁରକ୍ଷା ବ୍ୟବସ୍ଥା ଥିଲେ ମଧ୍ୟ ସୁରକ୍ଷାକୁ ଲୁଟେରାମାନେ ଚକମା ଦେଖାଉଛନ୍ତି। ଅଧିକ ମହିଳା ପୋଲିସଙ୍କୁ ମହିଳାମାନଙ୍କ ଭିଡ଼ ମଧ୍ୟରେ ନିୟୋଜିତ କରିବା ପାଇଁ ଦାବି ହେଉଛି। ଏ ସମ୍ପର୍କରେ ଜମ୍ବୁ ସାମୁଦ୍ରିକ ଥାନା ଅଧିକାରୀ ପରେଶ କୁମାର ମହାନ୍ତିଙ୍କୁ ପଚାରିବାରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି ବୋଲି ସେ କହିଛନ୍ତି।