ଝାରସୁଗୁଡ଼ା ଅଫିସ,୧୨ା୧୦: ଲୋକଙ୍କୁ ଉତ୍ତମ ସ୍ବାସ୍ଥ୍ୟସେବା ଯୋଗାଇଦେବା ପାଇଁ ସରକାର ଓଡ଼ିଶା ଷ୍ଟେଟ୍ ମେଡିକାଲ୍ କର୍ପୋରେଶନ ଲିମିଟେଡ୍ (ଓଏସ୍ଏମ୍ସିଏଲ୍) ଗଠନ କରିଛନ୍ତି। ଏହା ଦ୍ୱାରା ନିରାମୟ ଯୋଜନାରେ ଲୋକଙ୍କୁ ଚିକିତ୍ସା ସହିତ ମାଗଣାରେ ଔଷଧ ଯୋଗାଇ ଦିଆଯାଉଛି। ଅନେକ ସମୟରେ ବିଭାଗୀୟ ଅଧିକାରୀ ଓ କର୍ମଚାରୀଙ୍କ ତ୍ରୁଟିପୂର୍ଣ୍ଣ ପରିଚାଳନା ପାଇଁ ରୋଗୀ ଏହି ସରକାରୀ ଔଷଧ ପାଉ ନାହାନ୍ତି। ଏହା ରୋଗୀଙ୍କୁ ଦିଆ ନ ଯାଇ ନଷ୍ଟ କରିଦିଆଯାଉଛି। ଏଭଳି ଘଟଣା ଝାରସୁଗୁଡ଼ା ଜିଲା ସଦର ମହକୁମାରେ ଦେଖିବାକୁ ମିଳିଛି। ଏହାକୁ ନେଇ ଲୋକେ ଖୋଦ ସ୍ବାସ୍ଥ୍ୟମନ୍ତ୍ରୀଙ୍କ ଜିଲାରେ ସ୍ବାସ୍ଥ୍ୟ ପରିଚାଳନାରେ ତ୍ରୁଟି ହେଉଥିବା ଆଲୋଚନା କରୁଛନ୍ତି।
ଝାରସୁଗୁଡ଼ା ବିକାଶ ସ୍କୁଲ ନିକଟ ରାସ୍ତା କଡରେ କୁଢ କୁଢ ଔଷଧ ପଡିରହିଛି। ଏଥିରେ ଓଏସ୍ଏମ୍ସିଏଲ୍ର ଔଷଧ ରହିଥିବାଦେଖିବାକୁ ମିଳିଛି। ଏଥିମଧ୍ୟରେ ଆଣ୍ଟିବାଓଟିକ୍, ପାରାସିଟାମଲ୍, ଭିଟାମିନ୍ ବି କମ୍ପ୍ଲେକ୍ସ, ଡିକ୍ଲୋଫେନ୍ସ ସିରଫ ଓ ଇଞ୍ଜେକ୍ସନ, ସାନିଟାଇଜର୍ ଆଦି ରହିଛି। କେତେକ ଔଷଧର ଏକ୍ସପାଏରୀ ଡେଟ୍ ୨୦୨୧ ଅଗଷ୍ଟ, ସେପ୍ଟେମ୍ବର ରହିଥିବାବେଳେ ଆଉ କେତେକର ଏକ୍ସପାଏରୀ ଡେଟ୍ ରହିଥିବା ଦେଖିବାକୁ ମିଳିଛି। ଲକ୍ଷାଧିକ ଟଙ୍କାର ଏହିସବୁ ଔଷଧକୁ ସ୍ପିରିଟ୍ ଢାଳି ସେଠାରେ ଅଧାପୋଡ଼ା କରି ଛାଡି ଦିଆଯାଇଛି। ତେବେ ଏ ନେଇ ଜିଲା ମୁଖ୍ୟ ଚିକିତ୍ସକ ଡା. ଲାଲମୋହନ ରାଉତରାୟ କହିଛନ୍ତି, ଏ ସମ୍ପର୍କରେ ତାଙ୍କୁ ଜଣାନାହିଁ। ଏ ନେଇ ତଦନ୍ତ କରାଯାଇ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି।
