ଅହମ୍ମଦାବାଦ,୩୧ା୩(ପି.ଟି.):ଆଇପିଏଲ୍ର ୧୬ତମ ସଂସ୍କରଣ ଶୁକ୍ରବାର ଗୁଜରାଟର ନରେନ୍ଦ୍ର ମୋଦି କ୍ରିକେଟ ଷ୍ଟାଡିୟମରେ ଖେଳାଯିବ। ଉଦ୍ଘାଟନୀ ମ୍ୟାଚ୍ ହାର୍ଦ୍ଦିକ୍ ପାଣ୍ଡ୍ୟାଙ୍କ ଡିଫେଣ୍ଡିଂ ଚାମ୍ପିୟନ୍ ଗୁଜରାଟ ଟାଇଟନ୍ସ ଓ ୪ ଥରର ଚାମ୍ପିୟନ୍ ଚେନ୍ନାଇ ସୁପର କିଙ୍ଗ୍ସ ମଧ୍ୟରେ ଖେଳାଯିବ।୨୦୨୨ ସିଜନରେ ପ୍ରଥମ ଥର ପାଇଁ ପାଣ୍ଡ୍ୟା ଅଧିନାୟକତ୍ୱର ଭାର ସମ୍ଭାଳିଥିଲେ। ପ୍ରଥମ ଥରରେ ହିଁ ସେ ଧୋନୀଙ୍କ ପରି ଚାପ ପରସ୍ଥିତିରେ ଶାନ୍ତ ରହିବାର କଳା ଦେଖାଇଥିଲେ। ଶୁବମାନ ଗିଲ୍ଙ୍କ କ୍ୟାରିୟର ଶ୍ରେଷ୍ଠ ଫର୍ମ, ରାଶିଦ୍ ଖାନଙ୍କ ବୋଲିଂ ସହିତ ମିଡିଲ ଅର୍ଡରରେ କିଲର ମିଲର ଓ ପାଣ୍ଡ୍ୟାଙ୍କ ବ୍ୟାଟିଂ ବଳରେ ପ୍ରଥମ ସଂସ୍କରଣରେ ହିଁ ସବୁ ଦଳକୁ ପଛରେ ଛାଡିଥିଲା ଟାଇଟନ୍ସ। ଚେନ୍ନାଇ ସୁପରକିଙ୍ଗ୍ସ ବିପକ୍ଷ ଓପନିଙ୍ଗ ମ୍ୟାଚ୍ରେ ମିଲରଙ୍କ ଅନୁପସ୍ଥିତି ସାମାନ୍ୟ ପ୍ରଭାବ ପକାଇପାରେ। ତେବେ ରାହୁଲ ଟଓ୍ବେଟିଆଙ୍କ ଫର୍ମ ଟାଇଟନ୍ସ ପାଇଁ ସାମାନ୍ୟ ଆଶ୍ୱସ୍ତିର ବିଷୟ ରହିବ। କେନ୍ ଓ୍ବିଲିୟମସନଙ୍କୁ ଟି୨୦ ପାଇଁ ସ୍ପେଶାଲିଷ୍ଟ ବ୍ୟାଟର ଭାବରେ ଗଣନା କରାଯାଏ ନାହିଁ। ମାତ୍ର କଷ୍ଟସାଧ୍ୟ ପିଚ୍ ଓ ପରସ୍ଥିତିରେ ଓ୍ବିଲିୟମସନ୍ଙ୍କ ଦକ୍ଷତା ଦଳ ପାଇଁ ବେଶ ଲାଭଦାୟକ ରହିବ। ହାର୍ଦ୍ଦିକ୍ ସର୍ବଦା ଧୋନୀଙ୍କୁ ନିଜ ଆଦର୍ଶ ବୋଲି କହିଥାନ୍ତି। ତେଣୁ ଏହି ମ୍ୟାଚ୍କୁ ଗୁରୁ-ଶିଷ୍ୟଙ୍କ ମ୍ୟାଚ୍ କହିଲେ କିଛି ଅତ୍ୟୁକ୍ତି ହେବ ନାହିଁ। ୪୨ ବର୍ଷ ବୟସରେ ଧୋନୀ ପୁଣି ଥରେ ଅଧିନାୟକ ଭୂମିକାକୁ ପ୍ରତ୍ୟାବର୍ତ୍ତନ କରୁଛନ୍ତି। ଗତ ସିଜନରେ ପ୍ରଥମ ଥର ପାଇଁ ଚେନ୍ନାଇ ସୁପର କିଙ୍ଗ୍ସ ପ୍ଲେ ଅଫ୍ରେ ପ୍ରବେଶ କରିବାରେ ସମର୍ଥ ହୋଇ ନ ଥିଲା।
ଶୁକ୍ରବାର ୧୬ତମ ଆଇପିଏଲରେ ଧୋନୀଙ୍କ ନେତୃତ୍ୱରେ ଦଳ ଦୃଢ ଭାବରେ ପ୍ରତ୍ୟାବର୍ତ୍ତନ କରିବାକୁ ପ୍ରୟାସ କରିବ। ଇମ୍ପାକ୍ଟ ପ୍ଲେୟର୍ ନିୟମ କାରଣରୁ ଉଭୟ ଦଳରେ ୧୨ ଜଣ ଖେଳାଳି ରହିବେ। ନିଜ ପାଖରେ ଥିବା ଖେଳାଳିଙ୍କ ଦକ୍ଷତାକୁ ଠିକ୍ ଢଙ୍ଗରେ ଉପଯୋଗ କରିଥାନ୍ତି ଧୋନୀ। ସେ ଇମ୍ପାକ୍ଟ ପ୍ଲେୟର ନିୟମକୁ କେଉଁଭଳି ବ୍ୟବହାର କରୁଛନ୍ତି ତାହା ଉପରେ ସମସ୍ତଙ୍କ ନଜର ରହିବ। ବେନ୍ ଷ୍ଟୋକ୍ସ ଆଇପିଏଲ୍ର ପ୍ରଥମାର୍ଦ୍ଧରେ ବୋଲିଂ କରି ପାରିବେ ନାହିଁ। ତେଣୁ ଚେନ୍ନାଇ ଷ୍ଟୋକ୍ସଙ୍କୁ ଇମ୍ପାକ୍ଟ ପ୍ଲେୟର ଭାବରେ ବ୍ୟବହାର କରିପାରେ। ଅନ୍ୟପକ୍ଷରେ ଭାରତୀୟ ଖେଳାଳିଙ୍କ ମଧ୍ୟରେ ଧୋନୀ, ଅମ୍ବାତି ରାୟୁଡୁ ଓ ରବୀନ୍ଦ୍ର ଜାଡେଜାଙ୍କ ପ୍ରଦର୍ଶନ ଉପରେ ଭାରତୀୟ ଫ୍ୟାନଙ୍କ ନଜର ରହିବ। ସେହିପରି ପେସ୍ ବୋଲରଙ୍କ ମଧ୍ୟରେ ଦୀପକ ଚହର, ମୁକେଶ ଚୌଧାରୀ/ସିମରଜିତ୍ ସିଂଙ୍କ ଉପରେ ସମସ୍ତଙ୍କ ନଜର ରହିବ। ବିଦେଶୀ ଖେଳାଳିଙ୍କ ମଧ୍ୟରୁ ଡେଭନ୍ କନ୍ଓ୍ବେ, ବେନ୍ ଷ୍ଟୋକ୍ସ ଓ ମୋଇନ୍ ଅଲୀଙ୍କ ଖେଳିବା ନିଶ୍ଚିତ ଅଟେ। ଚତୁର୍ଥ ଖେଳାଳି ଭାବରେ ମହେଶ ଥିକଶାନା କିମ୍ବା ମଥିସା ପଥିରାନାଙ୍କ ମଧ୍ୟରୁ ଜଣେ ଖେଳିବେ।
ଅନ୍ୟପକ୍ଷରେ ଗୁଜରାଟର ବ୍ୟାଟିଂରେ ସାମାନ୍ୟ ସମସ୍ୟ ରହିଥିଲେ ମଧ୍ୟ ବୋଲିଂ ବେଶ ଶକ୍ତିଶାଳୀ ରହିଛି। ଡେଭିଡ୍ ମିଲରଙ୍କ ଅନୁପସ୍ଥିତିରେ ମଧ୍ୟକ୍ରମ ସାମାନ୍ୟ ଦୁର୍ବଳ ମନେ ହେଉଛି। ଏହା ସହିତ ଉଇକେଟକିପରକୁ ନେଇ ମଧ୍ୟ ସାମାନ୍ୟ ଚିନ୍ତାରେ ରହିଛି ଦଳ। ରିଦ୍ଧିମାନ ଶାହା ଗତ ସିଜନର ଓପନର ରହିଥିବା ବେଳେ ଚଳିତ ଥର ଦଳରେ ରହିଛନ୍ତି ଶ୍ରୀକର ଭରତ। ସେ ଟି୨୦ରେ ଟପ୍ ଅର୍ଡରରେ ବ୍ୟାଟିଂ କରୁଥିବାରୁ ତାଙ୍କୁ ମଧ୍ୟ ସୁଯୋଗ ମିଳିପାରେ। ଭାରତୀୟ ପେସରଙ୍କ ମଧ୍ୟରେ ଶିଭମ ମାଭି ଓ ମହମ୍ମଦ ଶାମି ଭଲ ଫର୍ମରେ ରହିଛନ୍ତି। ଆଲଜାରି ଯୋଶେଫଙ୍କ ଉପସ୍ଥିତି ଦଳକୁ ଆଉ ଟିକିଏ ମଜଭୁତ କରିବ। ପ୍ରଥମ ସିଜନରେ ଦଳର ଟ୍ରମ୍ପକାର୍ଡ ରହିଥିବା ୟଶ ଦୟାଲ ଭଲ ଫର୍ମରେ ନାହାନ୍ତି। ସୟଦ ମୁସ୍ତାକ ଅଲୀ ଟ୍ରଫିରେ ସେ ୬ ମ୍ୟାଚରୁ ମାତ୍ର ୨ ଉଇକେଟ ନେବାରେ ସଫଳ ହୋଇଥିଲେ। ସ୍ପିନର ଭାବରେ ଗୁଜରାଟ ନିକଟରେ ରାଶିଦ୍ ଖାନ୍ ଓ ଆର୍ ସାଇ କିଶୋର ଉପସ୍ଥିତ ଅଛନ୍ତି।
ଗୁଜରାଟ ଟାଇଟନ୍ସ: ହାର୍ଦ୍ଦିକ୍ ପାଣ୍ଡ୍ୟା(ଅଧିନାୟକ), ଶୁବମାନ ଗିଲ୍, ଶ୍ରୀକର ଭରତ, ରିଦ୍ଧିମାନ ଶାହା, କେନ୍ ଓ୍ବିଲିୟମସନ୍, ରାହୁଲ ଟଓ୍ବେଟିଆ, ଅଭିନବ ମନୋହର, ମହମ୍ମଦ ଶାମି, ପ୍ରଦୀପ ସାଙ୍ଗଓ୍ବନ, ଆର. ସାଇ କିଶୋର, ବିଜୟ ଶଙ୍କର, ସାଇ ସୁଦର୍ଶନ, ରାଶିଦ୍ ଖାନ୍, ଶିବମ ମାଭି, ମାଥ୍ୟୁ ଓ୍ବେଡ୍, ଓଡ଼ିନ୍ ସ୍ମିଥ୍, ଉର୍ଭିଲ ପଟେଲ, ଦର୍ଶନ ନାଲକଣ୍ଡେ, ଡେଭିଡ୍ ମିଲର୍, ଜୋସୁଆ ଲିଟିଲ୍, ୟଶ୍ ଦୟାଲ, ଜୟନ୍ତ ଯାଦବ, ନୁର୍ ଅହମଦ୍, ଆଲଜାରି ଯୋଶେଫ୍।
ଚେନ୍ନାଇ ସୁପରକିଙ୍ଗ୍ସ: ମହେନ୍ଦ୍ର ସିଂ ଧୋନୀ (ଅଧିନାୟକ), ଡେଭନ୍ କନ୍ଓ୍ବେ, ଋତୁରାଜ ଗାଏକ୍ୱାଡ, ଅମ୍ବାତି ରାୟୁଡୁ, ମୋଇନ ଅଲୀ, ବେନ୍ ଷ୍ଟୋକ୍ସ, ରବୀନ୍ଦ୍ର ଜାଡେଜା, ଆଜିଙ୍କ୍ୟ ରାହାନେ, ସିସାନ୍ଦା ମଗଲା, ଶିବମ ଦୁବେ, ଡ୍ବେନ୍ ପ୍ରିଟୋରିୟସ୍, ଅଜୟ ମଣ୍ଡଳ, ନିଶାନ୍ତ ସିନ୍ଧୁ, ରାଜବର୍ଦ୍ଧନ ହଙ୍ଗରଗେକର୍, ମିଚେଲ୍ ସାଣ୍ଟନର, ଶୁଭ୍ରାଂଶୁ ସେନାପତି, ସିମରଜିତ୍ ସିଂ, ମଥିସା ପଥିରାନା, ମହେଶ ଥିକ୍ସାନା,ଭଗତ ବର୍ମା, ପ୍ରଶାନ୍ତ ସୋଲାଙ୍କି, ଶେକ୍ ରଶିଦ୍ ଓ ତୁଷାର ଦେଶପାଣ୍ଡେ।