ରାଉରକେଲା ଅଫିସ, ୬।୩:ଆସନ୍ତା ୮ତାରିଖରେ ଲୋକେ ଧୁମ୍ଧାମ୍ରେ ହୋଲି ପର୍ବ ପାଳନ କରିବେ। ଏହାକୁ ନେଇ ରାଉରକେଲା ସହର ଚଳଚଞ୍ଚଳ ହୋଇପଡିଛି। ହୋଲିରେ ସହରର ଶତାଧିକ ଛୋଟବଡ ଅନୁଷ୍ଠାନ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରିବାକୁ ଯୋଜନା କରିଛନ୍ତି। ଏହା ଭିତରେ ସହରର ବିଭିନ୍ନ ବଜାରରେ ହୋଲି ପସରା ଖୋଲିଗଲାଣି। ହୋଲି ପାଇଁ ରାଉରକେଲାର ଲୋକମାନେ ରଙ୍ଗ, ପିଚିକାରୀ ଆଦି ବିଭିନ୍ନ ସାମଗ୍ରୀ କିଣୁଛନ୍ତି। ତେବେ ଚଳିତବର୍ଷ ହୋଲିରେ ରାଉରକେଲା ବଜାରରେ ଚାଇନା ମାଲ୍ ଭରପୁର ଉପଲବ୍ଧ ଥିବା ଦେଖିବାକୁ ମିଳିଛି। ଛେଣ୍ଡ, ପାନପୋଷ ଆଦି ବଜାରରେ ମେଡ୍ ଇନ୍ ଚାଇନା ନିର୍ମିତ କୃତ୍ରିମ ରଙ୍ଗ, ପ୍ଲାଷ୍ଟିକ ପିଚିକାରୀ, ଗୁଲାଲ, ପିଲାଙ୍କର ମୁଖା, ପ୍ରେସର ଗନ୍, ଏସ୍ଡି ପମ୍ପ ଏବଂ କାର୍ଟୁନ ରୋବର୍ଟ, ସ୍ପାଇଡର ମ୍ୟାନ ଆଦିର ପିଚିକାରୀ ବିକ୍ରି ହେଉଥିବା ପରିଲକ୍ଷିତ ହେଉଛି। ଚାଇନା ସାମଗ୍ରୀ ଶସ୍ତା ରହୁଥିବା ବେଳେ ସ୍ବଦେଶୀ ସାମଗ୍ରୀ ଅପେକ୍ଷାକୃତ ଅଧିକ ଦାମ୍ ରହୁଛି। ଫଳରେ ଲୋକମାନେ ଚାଇନା ସାମଗ୍ରୀ ଆଡକୁ ଆକର୍ଷିତ ହେଉଛନ୍ତି। ଏ ନେଇ ପାନପୋଷ ବଜାରର ବ୍ୟବସାୟୀ ପ୍ରଦୀପ ଦାଶ କୁହନ୍ତି, ଚାଇନା ହୋଲି ସାମଗ୍ରୀ ସମ୍ପୂର୍ଣ୍ଣ ରାସାୟନିକ ଓ କୁତ୍ରିମ ଉପାଦାନ ବିଶିଷ୍ଟ ଅଟେ। ମେଡ୍ ଇନ ଚାଇନା ହୋଲି ଦ୍ରବ୍ୟ ବର୍ଜନ କରାଯାଉଥିବା ବେଳେ ଏହା ବଜାରକୁ କେମିତି ଆସୁଛି ତାହା ଜାଣିନାହିଁ। ହୋଲିରେ ଜୈବିକ ଉପାଦାନରେ ପ୍ରସ୍ତୁତ ରଙ୍ଗ ବ୍ୟବହାର କରିବା ଉଚିତ୍ ବୋଲି ସେ କହିଛନ୍ତି। ସେହିପରି କଂଗ୍ରେସ ନେତା ପ୍ରଶାନ୍ତ ସେଠୀ କୁହନ୍ତି, ଚାଇନିଜ ହୋଲି ରଙ୍ଗ ସମ୍ପୂର୍ଣ୍ଣ କେମିକାଲ ଯୁକ୍ତ। ଏଣୁ ଏହା ବର୍ଜନୀୟ। ଚାଇନିଜ ରଙ୍ଗ ମଣିଷ ଦେହରେ ପଡିଲେ ଚର୍ମଜନିତ ରୋଗ ଏବଂ ଆଖି ନଷ୍ଟ ହେବା ଆଶଙ୍କା ରହିଛି। ରାଉରକେଲାକୁ ଏତେମାତ୍ରାରେ ମେଡ୍ ଇନ୍ ଚାଇନା ମାଲ୍ ଆସିବା ପଛରେ ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କ ସମ୍ପୃକ୍ତି ରହିଛି । ଜନତାଙ୍କ ଭୋଟ ହାତେଇବା ପାଇଁ କେବଳ ଚାଇନା ସାମଗ୍ରୀ ବର୍ଜନ ଅଭିଯାନ ହେଉଥିବା ସେ କହିଥିଲେ।