ବାରିପଦା ଅଫିସ,୧୯ା୫- କିଛି ଦିନର ବ୍ୟବଧାନ ପରେ ମୟୂରଭଞ୍ଜ ଜିଲା କରଞ୍ଜିଆ ଓ ବେତନଟୀ ବନଖଣ୍ଡକୁ ପୁଣି ହାତୀପଲ ଲେଉଟିଛନ୍ତି। ପାଚିଲା ଆମ୍ବ ବାସ୍ନାରେ ସେମାନେ ପାଗଳପ୍ରାୟ ହୋଇ ଜନବସତିମୁହାଁ ହେଉଛନ୍ତି। ସୋମବାର ବିଳମ୍ବିତ ରାତିରେ ୧୭ ଟିକିଆ ଝାଡ଼ଖଣ୍ଡୀ ହାତୀପଲ ଚମ୍ପୁଆ ଅଞ୍ଚଳ ଦେଇ କରଞ୍ଜିଆ ବନଖଣ୍ଡରେ ପ୍ରବେଶ କରିଛନ୍ତି। ମଙ୍ଗଳବାର ସକାଳେ ଦୁଧିଆଣି ରେଞ୍ଜର ଦରି ସଂରକ୍ଷିତ ଜଙ୍ଗଲରେ ଏହି ହାତୀପଲ ରହିଥିଲେ। ତେବେ ଖାଦ୍ୟ ଅନ୍ବେଷଣରେ ହାତୀପଲ ନିକଟସ୍ଥ ଗାଁ ଭିତରକୁ ପ୍ରବେଶ କରିବା ଆଶଙ୍କା ଥିବାରୁ ଅଞ୍ଚଳବାସୀ ଆତଙ୍କିତ ହୋଇପଡ଼ିଛନ୍ତି। ବନବିଭାଗ ସେମାନଙ୍କ ଗତିବିଧି ଉପରେ ନଜର ରଖିବା ସହିତ ଘଉଡ଼ାଇବା ପାଇଁ ପ୍ରୟାସ ଜାରି ରଖିଥିବା ତାଟୋ ରେଞ୍ଜ ଅଧିକାରୀ ସରୋଜ ପଣ୍ଡା ସୂଚନା ଦେଇଛନ୍ତି। ସେହିପରି ବେତନଟୀ ରେଞ୍ଜ ଅଞ୍ଚଳକୁ ଶିମିଳିପାଳର ୧୯ ହାତୀ ପ୍ରତ୍ୟାବର୍ତ୍ତନ କରିଛନ୍ତି। ଏହି ହାତୀପଲ ବ୍ୟାପକ ଫଳ ଓ ପନିପରିବା ଚାଷ ନଷ୍ଟ କରିଛନ୍ତି। ତାଡ଼କି ନିକଟରେ ଥିବା ୩୫ ଏକରରୁ ଅଧିକ ଆମ୍ବ ବଗିଚାରେ ପ୍ରବେଶକରି କ୍ଷୟକ୍ଷତି ଘଟାଇଛନ୍ତି। ପାଚିଲା ଆମ୍ବ ଖାଇବା ସହିତ ବ୍ୟାପକ ଗଛ ନଷ୍ଟ କରୁଥିବାରୁ ଆମ୍ବ ଚାଷୀ ମୁଣ୍ଡରେ ହାତ ଦେଇ ବସିଛନ୍ତି। ଦୀର୍ଘଦିନ ଧରି ଏହି ଶିମିଳିପାଳ ହାତୀପଲ ରାସଗୋବିନ୍ଦପୁର ରେଞ୍ଜ ଅଞ୍ଚଳରେ ବିଚରଣ କରୁଥିବା ବେଳେ ୩ଦିନ ହେଲା ବେତନଟୀ ରେଞ୍ଜ ଅଞ୍ଚଳକୁ ଫେରିଛନ୍ତି। ଏନେଇ ବନବିଭାଗ ଚିନ୍ତିତ ଥିବାବେଳେ କ୍ଷତିଗ୍ରସ୍ତ ଚାଷୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
