ମୁମ୍ବାଇ,୩୧।୮: ଭାରତୀୟ ଶେୟାର ବଜାରରେ ମଙ୍ଗଳବାର ରେକର୍ଡ ସୃଷ୍ଟି ହୋଇଛି। ପ୍ରଥମ ଥର ପାଇଁ ସେନସେକ୍ସ୍ ୫୭ ହଜାର ଅଙ୍କ ଟପିଛି। ପୂର୍ବାହ୍ନ ୯ଟା ୨୪ରେ ସେନସେକ୍ସ୍ରେ ୨୩୫ ଅଙ୍କ ବୃଦ୍ଧି ଘଟି ଏହା ୫୭,୧୨୪.୭୮ ଛୁଇଁଛି। ଯାହା ଏପର୍ଯ୍ୟନ୍ତ ଏହାର ରେକର୍ଡ ସ୍ତର ବୋଲି କୁହାଯାଉଛି। ନିଫ୍ଟି ପ୍ରାୟ ୧୭ ହଜାର ଅଙ୍କ ପାଖାପାଖି ରହିଛି। ନ୍ୟାସନାଲ ଷ୍ଟକ ଏକ୍ସଚେଞ୍ଜ (ଏନ୍ଏସ୍ଇ) ର ନିଫ୍ଟି ୧୬ ପଏଣ୍ଟ ବୃଦ୍ଧି ସହିତ ୧୬,୯୪୭.୫୦ରେ ଖୋଲିଛି। ଏହାପରେ ନିଫ୍ଟି ୬୪ ପଏଣ୍ଟ ବୃଦ୍ଧି ପାଇ ୧୬,୯୯୫.୫୫ରେ ପହଞ୍ଚିଛି । ଆଇଟି ଇଣ୍ଡେକ୍ସରେ ୧ ପ୍ରତିଶତ ବୃଦ୍ଧି ପାଇଛି। ଏହା ସହିତ ଏଫ୍ଏମ୍ସିଜି ଏବଂ ଫାର୍ମା କମ୍ପାନୀର ଶେୟାରରେ ମଧ୍ୟ ବୃଦ୍ଧି ଦେଖିବାକୁ ମିଳିଛି।
ଆମେରିକା ବଜାରରୁ ଭଲ ସଙ୍କେତ, ଦେଶରେ କରୋନା ମାମଲା ହ୍ରାସ ଏବଂ ଟିକାକରଣ କାର୍ଯ୍ୟକ୍ରମରେ ବୃଦ୍ଧି, ଅଗଷ୍ଟରେ ଅଟୋ ବିକ୍ରୟ ସଂଖ୍ୟାରେ ବୃଦ୍ଧିି, ଜିଡିପିରେ ରେକର୍ଡ ବୃଦ୍ଧି ଆଦି ଯୋଗୁ ଶେୟାର ବଜାରରେ ଏଭଳି ସ୍ଥିତି ସୃଷ୍ଟି ହୋଇଥିବା ଅନୁମାନ କରାଯାଉଛି। ମଙ୍ଗଳବାର ସନ୍ଧ୍ୟାରେ ସରକାରଙ୍କ ପକ୍ଷରୁ ଜିଡ଼ିପି ଆକଳନ ଜାରି କରାଯିବ। ଏହା ପୂର୍ବରୁ ଶେୟାର ବଜାରରେ ରେକର୍ଡ ସୃଷ୍ଟି ହୋଇଛି।
ଅପରପକ୍ଷରେ ଏସବିଆଇର ଇକୋରୈପ ରିସର୍ଚ୍ଚ ରିପୋର୍ଟ ଅନୁଯାୟୀ ଚଳିତ ଆର୍ଥିକ ବର୍ଷର ପ୍ରଥମ ତ୍ରୟମାସରେ ଦେଶର ଜିଡିପି ୧୮.୫ ପ୍ରତିଶତ ହାରରେ ବୃଦ୍ଧି ପାଇବାର ସମ୍ଭାବନା ରହିଛି। ସେହିପରି ଏପ୍ରିଲ-ଜୁନ୨୯୨୧ ତ୍ରୟମାସ ପାଇଁ ଆରବିଆଇ ପକ୍ଷରୁ ଜିଡିପି ଅଭିବୃଦ୍ଧି ୨୧.୪ ପ୍ରତିଶତ ରହିବ ବୋଲି ଆକଳନ କରାଯାଇଛି। ଏସବୁ ରିପୋର୍ଟର ସକାରାତ୍ମକ ପ୍ରଭାବ ଶେୟାର ବଜାର ଉପରେ ପଡିଥିବା ଅନୁମାନ କରାଯାଉଛି।
