ବର୍ମିଂହାମ୍, ୧୯ା୩ (ପି.ଟି.)-ଲକ୍ଷ୍ୟ ସେନ୍ ଭାରତର ସର୍ବକନିଷ୍ଠ ପୁରୁଷ ଖେଳାଳି ହିସାବରେ ସମ୍ମାନଜନକ ଅଲ୍ ଇଂଲଣ୍ଡ ଚାମ୍ପିୟନଶିପ୍ ପୁରୁଷ ସିଙ୍ଗଲ୍ସ କ୍ୱାର୍ଟରଫାଇନାଲରେ ପ୍ରବେଶ କରିଛନ୍ତି। ଅଲିମ୍ପିକ ରୌପ୍ୟ ବିଜୟିନୀ ପି.ଭି. ସିନ୍ଧୁ ମଧ୍ୟ ଏହି ସୁପର ୧୦୦୦ ଟୁର୍ନାମେଣ୍ଟରେ ସହଜ ବିଜୟ ଲାଭ କରିଛନ୍ତି। ବର୍ତ୍ତମାନ ବିଶ୍ୱ ଚାମ୍ପିୟନ ସିନ୍ଧୁ ଦ୍ୱିତୀୟ ରାଉଣ୍ଡରେ ଡେନମାର୍କର ଲିନେ ଖ୍ରିଷ୍ଟୋଫରସେନ୍ଙ୍କୁ ୨୧-୮, ୨୧-୮ରେ ପରାସ୍ତ କରିଛନ୍ତି। ମାତ୍ର ଏଚ୍.ଏସ୍. ପ୍ରଣୟ ତାଙ୍କ ଦ୍ୱିତୀୟ ରାଉଣ୍ଡ ମ୍ୟାଚରେ ପରାସ୍ତ ହୋଇଛନ୍ତି। ୨୦୧୯ରେ ୫ଟି ଟାଇଟଲ ଜିତିଥିବା ୧୯ ବର୍ଷୀୟ ଲକ୍ଷ୍ୟ ଫ୍ରାନ୍ସର ଥୋମାସ ରୋକ୍ସେଲଙ୍କୁ ୨୧-୧୮, ୨୧-୧୬ରେ ହରାଇ ଦେଇଛନ୍ତି। ୨୦୧୮ରେ ଏସିଆନ ଜୁନିୟର ଚାମ୍ପିୟନଶିପ୍ ଟାଇଟଲ, ଓ୍ବାଲର୍ଡ ଜୁନିୟର ଚାମ୍ପିୟନଶିପ୍ ବ୍ରୋଞ୍ଜ ଏବଂ ୟୁଥ ଅଲିମ୍ପିକ୍ ଗେମ୍ସରେ ରୌପ୍ୟ ଜିତିଥିବା ଲକ୍ଷ୍ୟ ବର୍ତ୍ତମାନ ଆୟର୍ଲାଣ୍ଡର ନିହାତ ନିଗୁୟେନ କିମ୍ବା ନେଦରଲାଣ୍ଡ୍ସର କାଲ୍ଜୋଙ୍କୁ ଭେଟିବେ। ପୂର୍ବତନ ଟପ୍ ୧୦ ଖେଳାଳି ପ୍ରଣୟ କିନ୍ତୁ ବିଶ୍ୱର ନମ୍ବର ଓ୍ବାନ ଜାପାନର କେନ୍ତୋ ମେମୋତାଙ୍କଠାରୁ ପରାଜିତ ହୋଇଛନ୍ତି। ଭାରତୀୟ ଖେଳାଳି ୧୫-୨୧, ୧୪-୨୧ରେ ପରାସ୍ତ ହୋଇ ପ୍ରତିଯୋଗିତାରୁ ବିଦାୟ ନେଇଛନ୍ତି। ମିକ୍ସଡ ଡବଲ୍ସ ଯୋଡ଼ି ସାତ୍ତ୍ୱିକସାଇରାଜ ରାଙ୍କିରେଡ୍ଡୀ ଓ ଅଶ୍ୱିନ ପୋନ୍ନାପ୍ପା ସେମାନଙ୍କ ଓପନିଂ ରାଉଣ୍ଡରେ ୟୁକି କାନେକୋ ଏବଂ ମିସାକି ମାତ୍ସୁମୋତୋଙ୍କଠାରୁ ୧୯-୨୧, ୯-୨୧ରେ ହାରିଯାଇଛନ୍ତି। ବୁଧବାର ରାତିରେ ଇଞ୍ଜୁରି ଯୋଗୁ ପୂର୍ବତନ ବିଶ୍ୱର ନମ୍ବର ଓ୍ବାନ ଖେଳାଳି ସାଇନା ନେହ୍ବାଲ ତାଙ୍କ ଓପନିଂ ରାଉଣ୍ଡ ମ୍ୟାଚ ଅଧାରୁ ଓହରିଯାଇଥିଲେ। ସେତେବେଳେ ସେ ୭ମ ସିଡ୍ ମିଆ ବ୍ଲିଚ୍ଫ୍ଲିଡିଟ୍ଙ୍କଠାରୁ ୮-୨୧, ୪-୧୦ରେ ପଛୁଆ ରହିଥିଲେ।
