ଭୁବନେଶ୍ୱର, ୧୩ା୬(ବ୍ୟୁରୋ): ସରକାରୀ କ୍ଷମତାର ଦୁରୁପଯୋଗ କରି ସରକାରୀ କର୍ମଚାରୀ ବେଆଇନ ଭାବେ ଠୁଳ କରୁଛନ୍ତି ପୁଳା ପୁଳା ସମ୍ପତ୍ତି। ଏପରି ଆୟ ବହିର୍ଭୂତ୍ତ ସମ୍ପତ୍ତି ଠୁଳ ଅଭିଯୋଗରେ ଭିଜିଲାନ୍ସ ଜାଲରେ ପଡିଛନ୍ତି କଟକ ଜିଲା ସଦର ବ୍ଲକର ସହକାରୀ ଯନ୍ତ୍ରୀ ବିକାଶ ଚନ୍ଦ୍ର ଭୁୟାଁଙ୍କ। ଭିଜିଲାନ୍ସର ୩ଟି ଟିମ୍ ଏକକାଳୀନ ୪ ସ୍ଥାନରେ ସୋମବାର ଚଢ଼ାଉ କରିଛି। ଚଢ଼ାଉ ହୋଇଥିବା ସ୍ଥାନ ମଧ୍ୟରେ ବିକାଶଙ୍କ କଟକ ସଦର ବ୍ଲକସ୍ଥିତ ଅଫିସ ଚାମ୍ବର, ନରସିଂପୁର ଥାନା ଅନ୍ତର୍ଗତ ଲେହେଙ୍ଗା ଗ୍ରାମସ୍ଥିତ ପୈତୃକ ଘର ଓ ଭୁବନେଶ୍ୱର ଚକେଇସିଆଣିରେ ଥିବା ସମ୍ପର୍କୀୟଙ୍କ ଘର ଆଦି ରହିଛି। କଟକ ସ୍ବତନ୍ତ୍ର ଭିଜିଲାନ୍ସ କୋର୍ଟଙ୍କ ୱାରେଣ୍ଟ ବଳରେ ହେଉଥିବା ଏହି ଚଢ଼ାଉରେ ଭିଜିଲାନ୍ସର ୩ଜଣ ଡିଏସ୍ପି, ୪ଜଣ ଇନ୍ସପେକ୍ଟର ଓ ଅନ୍ୟ କର୍ମଚାରୀ ନିୟୋଜିତ ଅଛନ୍ତି।
ସନ୍ଧ୍ୟାସୁଦ୍ଧା ଭିଜିଲାନ୍ସ ପକ୍ଷରୁ ମିଳିଥିବା ରିପୋର୍ଟ ଅନୁଯାୟୀ, ବିକାଶଙ୍କ ନାଁରେ ଭୁବନେଶ୍ୱର ସୌଭାଗ୍ୟ ନଗରରେ ୩୫୭୨ ବର୍ଗଫୁଟ୍ରେ ଥିବା ଗୋଟିଏ ବହୁ ମହଲା ବିଶିଷ୍ଟ କୋଠା, ଭୁବନେଶ୍ୱର ଓ କଟକରେ ୭ଟି ପ୍ଲଟ୍ ଠାବ ହୋଇଛି। ସେହିପରି ୫୦ ଲକ୍ଷ ଟଙ୍କାର ବ୍ୟାଙ୍କ ଡିପୋଜିଟ୍ ଓ ସୁନା-ରୁପା ଅଳଙ୍କାର, ୧୩.୪୦ ଲକ୍ଷ ଟଙ୍କାର ଗୋଟିଏ ଚାରିଚକିଆ ଯାନ ଓ ୩ଟି ବାଇକ ଏବଂ ୧୧.୭୩ ଲକ୍ଷ ନଗଦ ଟଙ୍କା ଓ ଘରୋଇ ଉପକରଣ ଠାବ କରିଛି ଭିଜିଲାନ୍ସ। ଅନ୍ୟପକ୍ଷରେ ଆଉଏକ ବେନାମୀ ସମ୍ପତ୍ତି ମଧ୍ୟ ଠାବ ହୋଇଛି। ବମିଖାଲସ୍ଥିତ ପ୍ଲଟ୍ ନଂ.୪୪/୧୨୨୩ରେ ଥିବା ଏକ ଦୁଇ ମହଲା କୋଠା ବିକାଶଙ୍କ ଜଣେ ସମ୍ପର୍କୀୟଙ୍କ ନାଁରେ ରେଜିଷ୍ଟର ହୋଇଥିବା ଜଣାପଡିଛି। ଏଥିସହ ପୁଅ ଓ ଝିଅଙ୍କୁ ଇଞ୍ଜିନିୟରିଂ ଓ ଡାକ୍ତରୀ ପଢ଼ାଇବା ପାଇଁ ବିକାଶ ପ୍ରାୟ ୧ କୋଟି ଟଙ୍କା ଖର୍ଚ୍ଚ କରିଥିବା ଭିଜିଲାନ୍ସ ଜାଣିବାକୁ ପାଇଛି। ସେପଟେ ବିକାଶ କ୍ରିପ୍ଟୋ କରେନ୍ସି (ଡିଜିଟାଲ ମୁଦ୍ରା)ରେ ମଧ୍ୟ ନିବେଶ କରିଥିବା ସୂଚନା ଦିଆଯାଇଛି। ଏହି ଚଢ଼ାଉ ଓ ଯାଞ୍ଚ ଜାରି ରହିଥିବାବେଳେ ବିକାଶଙ୍କୁ ଅଧିକ ପଚରାଉଚରା କରାଯାଉଛି। ଚଢ଼ାଉ ଓ ଯାଞ୍ଚ ସରିବା ପରେ ସମ୍ପତ୍ତିର ପରିମାଣ ଆହୁରି ବଢ଼ିପାରେ ବୋଲି ଭିଜିଲାନ୍ସ ପକ୍ଷରୁ ସୂଚନା ଦିଆଯାଇଛି। ତେବେ ଚଢ଼ାଉ ବେଳେ ସୌଭାଗ୍ୟ ନଗରସ୍ଥିତ ଆଲିସାନ୍ ଘରେ ଇଣ୍ଟେରିୟର କାର୍ଯ୍ୟ ଦେଖି ଭିଜିଲାନ୍ସ ଅଧିକାରୀମାନେ ଆଶ୍ଚର୍ଯ୍ୟ ହୋଇଥିବା ଦେଖିବାକୁ ମିଳିଥିଲା।