କଲେଜରେ ପଢ଼ିବା ସହ ଗୋଟିଏ ବଖରା ଘରେ ଛତୁଚାଷ କରି ତିନିଜଣ ଛାତ୍ର ମାସକୁ ପାଖାପାଖି ୭୬ ହଜାର ଟଙ୍କା ରୋଜଗାର କରିବା ଆଶ୍ଚର୍ଯ୍ୟ ଲାଗୁଥିଲେ ହେଁ ସତ। କର୍ନାଟକ ମହୀଶୂରର ଜେଏସ୍ଏସ୍ ଏକାଡେମୀ ଅଫ୍ ହାୟର ଏଡୁକଶେନ ଆଣ୍ଡ୍ ରିସର୍ଚ୍ଚର ଏମ୍ଏସ୍ସି (ମାଇକ୍ରୋବାୟୋଲୋଜି) ଛାତ୍ର କ୍ଲିଣ୍ଟ ଡେଭିସଙ୍କ ତତ୍ତ୍ୱାବଧାନରେ ଏହି ଛତୁଚାଷ ହେଉଛି। ସେହି କଲେଜରେ ବିଏସ୍ସି ଶେଷ ବର୍ଷ ଛାତ୍ର ଥିବା ସମୟରେ ୨୦୧୭ରେ ସେ ଛତୁଚାଷ ଆରମ୍ଭ କରିଥିଲେ ବୋଲି କହନ୍ତି ୨୪ ବର୍ଷୀୟ ଡେଭିସ। ଏଥିପାଇଁ ସେ ‘ଫୁଙ୍ଗେ ମସ୍ରୁମ୍’ ଷ୍ଟାର୍ଟଅପ୍ ମାଧ୍ୟମରେ ପ୍ରଥମେ ଏକାକୀ ୨୫୦ ବର୍ଗଫୁଟ୍ର ଭଡ଼ାଘରେ ଚାଷ ଆରମ୍ଭ କରିଥିଲେ। ଏଥିପାଇଁ ସ୍ଥାନୀୟ ହର୍ଟିକଲଚର ବିଭାଗର ସାହାଯ୍ୟ ଲୋଡିଥିଲେ। ପ୍ରଥମେ ୧୦ କେଜି ଛତୁ ଉତ୍ପାଦନ କରି ବିକ୍ରି କରିଥିଲେ। ପରେ ରୁମ୍ମେଟ୍ ଅଜୟ ଜୋସେ ଓ ରାଜ କିରଣ ଏଥିରେ ସାମିଲ ହୋଇଥିଲେ। ସେମାନେ ଅର୍ଗାନିକ ଛତୁ ଉତ୍ପାଦନ ଆରମ୍ଭ କରି ତିନିବର୍ଷ ପରେ ଚାଷରୁ ଏବେ ମାସକୁ ଉପରୋକ୍ତ ପରିମାଣର ଟଙ୍କା ଆୟ କରୁଛନ୍ତି। ଚାଷକୁ ବଢ଼ାଇବା ଲାଗି ସେମାନେ କ୍ୟାଟରିଂ ଓ ଡେଲିଭରି ଜବ୍ ଭଳି ପାର୍ଟଟାଇମ୍ କାମ କରି ପାଣ୍ଠି ଯୋଗାଡ଼ କରିଥିଲେ। ସେହି ଛୋଟ ଘର କଡ଼ରେ ଏବେ ୫୨୫ ବର୍ଗଫୁଟର ଶେଡ୍ ନିର୍ମାଣ କରି ଚାଷକୁ ବଢାଇଛନ୍ତି। ପ୍ରାୟ ୫ ଲକ୍ଷ ଟଙ୍କା ନିବେଶ କରିଛନ୍ତି। ଏଥିପାଇଁ ଆବଶ୍ୟକ ହ୍ୟୁମିଡିଫାୟର ଓ ଟେମ୍ପରେଚର ରେଗୁଲେଟିଂ ଫ୍ୟାନ୍ ସେମାନେ ନିଜେ ତିଆରି କରିଛନ୍ତି। ଚାଷ କରୁଥିବା ମିଲ୍କି ମସ୍ରୁମ୍ ବା ଧଳା ଛତୁର ଚାହିଦା ବି ବେଶି ଓ ଏହାକୁ କିଲୋ ପ୍ରତି ୩୫୦ ଟଙ୍କାରେ ବିକ୍ରିକରି ସେମାନେ ପ୍ରଚୁର ଲାଭ କରୁଛନ୍ତି। ତିନିଜଣ ତିନି ମାସରେ ୧,୦୦୦ କେଜି ଛତୁ ଉତ୍ପାଦନ କରୁଛନ୍ତି। ଏଥିପାଇଁ ଏହି ଛାତ୍ରମାନଙ୍କୁ ପୁରସ୍କୃତ କରାଯାଇଛି।