ଜୀବନର ଅପରାହ୍ନରେ ଥିବା ବୃଦ୍ଧାବୃଦ୍ଧଙ୍କ ସେବାରେ ଲାଗିପଡ଼ିଛନ୍ତି ଗୁଜରାଟର ରାକେଶ ପାଞ୍ଚାଲ। ସେ ଖେଡ଼ା ସହରରେ ୫୦୦ ଅସହାୟ ବୃଦ୍ଧାବୃଦ୍ଧଙ୍କୁ ନିୟମିତ ଭାବେ ଟିଫିନ୍ ସର୍ଭିସ୍ ଯୋଗାଇଆସୁଛନ୍ତି। ଅର୍ଥାତ୍ ସେ ଦିନକୁ ଦୁଇବେଳା ଟିଫିନ୍ରେ ଖାଦ୍ୟ ନେଇ ସେମାନଙ୍କ ଘରେ ପହଞ୍ଚାଇ ଦେଉଛନ୍ତି। ରାକେଶ ପ୍ରଥମେ ମୁମ୍ବାଇରେ ଚାକିରି କରିଥିଲେ। ତାଙ୍କ ପିତାଙ୍କ ଦେହାନ୍ତ ପରେ ସେ ଖେଡ଼ା ଫେରିଆସି ବିଜ୍ନେସ ସମ୍ଭାଳିବା ସହ ଏହି ସେବା ଜାରି ରଖିଛନ୍ତି। ପ୍ରଥମେ ସେ ହସ୍ପିଟାଲ ନିକଟରେ ଅସହାୟ ଲୋକଙ୍କୁ ଖାଇବାକୁ ଦେବା ଆରମ୍ଭ କରିଥିଲେ। କୋଭିଡ୍ ମହାମାରୀ ବେଳେ ତାହା ବନ୍ଦ ହୋଇଯିବା ପରେ ସେ ଟିଫିନ୍ରେ ଅସହାୟ ବୃଦ୍ଧାବୃଦ୍ଧଙ୍କ ଘରେ ଖାଦ୍ୟ ପହଞ୍ଚାଇଲେ, ଯାହା ଏଯାବତ୍ ଚାଲିଛି। ରାକେଶ ଏହି ଟିଫିନ୍ ସେବାର ନାମ ଦେଇଛନ୍ତି ‘ବିସାନୋ ପରିବାର।’ ସକାଳୁ ଉଠି ପୂରା ପରିବାର ଖାଦ୍ୟ ପ୍ରସ୍ତୁତିରେ ଲାଗିପଡ଼ନ୍ତି। ସେମାନଙ୍କୁ ସହଯୋଗ କରିବାକୁ ଏକ ଟିମ୍ ବି ଅଛି। ଖାଦ୍ୟ ପ୍ରସ୍ତୁତ ହେବା ପରେ ଟିମ୍ ଠିକ୍ ସମୟରେ ତାହାକୁ ନେଇ ବୃଦ୍ଧାବୃଦ୍ଧଙ୍କ ପାଖରେ ପହଞ୍ଚାଇ ଦେଉଛି।