ଡାକ୍ତରମାନେ ମାଗଣାରେ ଚିକିତ୍ସା କରୁଥିବା ବିଷୟ ନିୟମିତ ଭାବେ ପ୍ରକାଶ ପାଉଛି। କିନ୍ତୁ ୭୦ ବର୍ଷ ବୟସରେ ଡାକ୍ତର ଅରୁଣୋଦୟ ମଣ୍ଡଳ ୧୬୦ କି.ମି.ଦୂର ଯାତ୍ରା କରି ମାଗଣାରେ ରୋଗୀ ଚିକିତ୍ସା କରିବା ଘଟଣା ନିଶ୍ଚିତ ଭାବେ ଭିନ୍ନ ଓ ପ୍ରେରଣାଦାୟକ। ଏହି କାର୍ଯ୍ୟ ସେ ପଶ୍ଚିମବଙ୍ଗ ସୁନ୍ଦରବନ ଅଞ୍ଚଳରେ ଜାରି ରଖିଛନ୍ତି। ଡା.ମଣ୍ଡଳ ସପ୍ତାହାନ୍ତରେ କୋଲକାତାରୁ ସୁନ୍ଦରବନରେ ଥିବା ତାଙ୍କ ସୁଜନ କ୍ଲିନିକ୍କୁ ଯାଉଛନ୍ତି। ଏହି କ୍ଲିନିକ୍ ଦୁର୍ଗମ ହିଙ୍ଗାଲଗଞ୍ଜ ଅଞ୍ଚଳରେ ରହିଛି। ୨୦୦୦ ମସିହାରୁ ସେ ଏହି ସେବା କରିଆସୁଛନ୍ତି। ପ୍ରତିବର୍ଷ ସେ ୧୨,୦୦୦ରୁ ଅଧିକ ରୋଗୀଙ୍କ ଚିକିତ୍ସା କରୁଛନ୍ତି। ୨୩ ବର୍ଷ ହେଲା ସେ ସପ୍ତାହାନ୍ତରେ ବଡିଭୋରୁ ଉଠି ଦମ୍ ଦମ୍ କ୍ୟାଣ୍ଟନମେଣ୍ଟ ରେଲଓ୍ବେ ଷ୍ଟେଶନରୁ ଟ୍ରେନ ଯୋଗେ ହସନାବାଦକୁ ଯାଇ ସେଠାରୁ ଅଟୋରିକ୍ସା ଯୋଗେ ଲେବୁଖାଲି ଏବଂ ପୁନର୍ବାର ସେଠାରୁ ନଦୀ ପାର ହୋଇ ହିଙ୍ଗାଲଗଞ୍ଜ କ୍ଲିନିକରେ ପହଞ୍ଚୁଛନ୍ତି। ଏଥିପାଇଁ ୬ ଘଣ୍ଟା ଯାତ୍ରାରେ ୧୬୦ କି.ମି. ଯିବାକୁ ହେଉଛି। ଦୀର୍ଘବର୍ଷ ହେଲା ମାଗଣାରେ ଚିକିତ୍ସା କରୁଥିବାରୁ ସୁନ୍ଦରବନ ଲୋକେ ତାଙ୍କୁ ଶ୍ରଦ୍ଧାରେ ‘ସୁନ୍ଦରବନ କି ସୁଜାନ’ ବୋଲି ସମ୍ବୋଧନ କରନ୍ତି। ଡା. ମଣ୍ଡଳ କୋଲକାତା ନ୍ୟାଶନାଲ ମେଡିକାଲ କଲେଜରୁ ଡିଗ୍ରୀ ହାସଲ କରିବା ପରେ ଡ. ବି. ରୟ ମେଡିକାଲ କଲେଜ ଫର୍ ଚିଲ୍ଡ୍ରେନରେ ଚାକିରି କରିଥିଲେ। ପରେ ଚାକିରି ଛାଡ଼ି ସୁନ୍ଦରବନର ହିଙ୍ଗାଲଗଞ୍ଜକୁ ଚିକିତ୍ସାର କେନ୍ଦ୍ର ଭାବେ ଗ୍ରହଣ କରିଥିଲେ।