ବିବାହ ଶୋଭାଯାତ୍ରାରେ ବରଯାତ୍ରୀ ଯାଉଛନ୍ତି। ଡିଜେ ବାଜୁଛି, ଲୋକେ ବି ଧୁମ୍ଧାମ୍ରେ ନାଚଗୀତ କରୁଛନ୍ତି। ମାତ୍ର ରାସ୍ତାରେ ଛିଡ଼ା ହୋଇଥିବା ଦର୍ଶକମାନଙ୍କୁ ଡିଜେ ମ୍ୟୁଜିକ୍ କିଛି ବି ଶୁଭୁନାହିଁ। ଏମିତି ଏକ କଥା ହୁଏତ କାହାର ବିଶ୍ୱାସ ହୋଇ ନ ପାରେ, କିନ୍ତୁ ଏହା ସତ। ଏଭଳି ଘଟଣା ଏବେ ଖୁବ୍ ଚର୍ଚ୍ଚାକୁ ଆସିଛି। ସୋସିଆଲ ମିଡିଆରେ ଏହି ଘଟଣା ଶେୟାର ହେବା ପରେ ଭାଇରାଲ୍ ହେବାରେ ଲାଗିଛି। ଖବର ଅନୁସାରେ, ପ୍ରକୃତରେ ଭାରତର ଏକ କ୍ୟାନ୍ସର ହସ୍ପିଟାଲ ନିକଟରେ ବିବାହ ଆୟୋଜନ ହୋଇଥିବାରୁ ଆୟୋଜକମାନେ ଏଭଳି ନୀରବ ଶୋଭାଯାତ୍ରା କରିବାକୁ ନିଷ୍ପତ୍ତି ନେଇଥିଲେ। ବରଯାତ୍ରୀ ଶୋଭାଯାତ୍ରାରେ ଅତ୍ୟଧିକ ଡିଜେ ଶବ୍ଦ ହସ୍ପିଟାଲରେ ଥିବା ରୋଗୀମାନଙ୍କୁ ଅସୁବିଧାରେ ପକାଇପାରେ, ତେଣୁ ସେମାନଙ୍କୁ ଆଦୌ କୌଣସି ପ୍ରକାର ଅସୁବିଧାରେ ନ ପକାଇବା ଲକ୍ଷ୍ୟରେ ଏଭଳି ଶୋଭାଯାତ୍ରା ପାଇଁ ନିଷ୍ପତ୍ତି ନିଆଯାଇଥିଲା। ତେଣୁ ବରଯାତ୍ରୀ ଦଳରେ ସାମିଲ ହୋଇଥିବା ସବୁ ଲୋକ କାନରେ ହେଡ୍ଫୋନ୍ ଲଗାଇ ଡିଜେ ଗୀତର ତାଳେ ତାଳେ ନାଚି ନାଚି ଯାଇଥିଲେ। ଏଭଳି ଏକ ନିଆରା ବିବାହ ଶୋଭାଯାତ୍ରାକୁ ନେଇ ଏବେ ସୋସିଆଲ ମିଡିଆରେ ଢେର୍ ଚର୍ଚ୍ଚା ହେଉଛି। ଶବ୍ଦ ପ୍ରଦୂଷଣ ରୋକିବା ନିମନ୍ତେ ଏହା ଏକ ସୁନ୍ଦର ପଦକ୍ଷେପ ବୋଲି ଅନେକେ କହି ବୁଲୁଛନ୍ତି।