ବୈଷୟିକ କ୍ଷେତ୍ରରେ ଡିଗ୍ରୀ ହାସଲ କରିଥିବା ବ୍ୟକ୍ତିଙ୍କୁ ଏବେ ମିଲେଟ୍ ମିଶନ ଆକର୍ଷିତ କରିପାରିଛି, ଯାହାର ଉଦାହରଣ ଦେଖିବାକୁ ମିଳିଛି ସାଇ କ୍ରିଷ୍ଣ ପୋକୁରୀଙ୍କ କ୍ଷେତ୍ରରେ। ସାଇ କ୍ରିଷ୍ଣ ଦିଲ୍ଲୀ ଆଇଆଇଟିରୁ ଡିଗ୍ରୀ ହାସଲ କରିବା ପରେ ଶିକ୍ଷା କ୍ଷେତ୍ରରେ ଚାକିରି କରିଥିଲେ। କିନ୍ତୁ ତାହାକୁ ଛାଡ଼ି ଏବେ ସେ ମିଲେଟ୍ ବ୍ୟବସାୟୀ ପାଲଟିଛନ୍ତି। ବ୍ୟବସାୟରୁ ସେ ବର୍ଷକୁ ୨.୫ କୋଟି ଟଙ୍କା ରୋଜଗାର କରିବାକୁ ସକ୍ଷମ ହୋଇପାରିଛନ୍ତି। ସେ ବିଭିନ୍ନ ପ୍ରକାର ମିଲେଟ୍ ପ୍ରସ୍ତୁତ ଖାଦ୍ୟକୁ ଲୋକଙ୍କ ନିକଟରେ ପହଞ୍ଚାଇବା ପାଇଁ ‘ହେଲ୍ଥ ସୂତ୍ର’ ଷ୍ଟାର୍ଟଅପ୍ ଗଠନ କରିଛନ୍ତି। ମୁଖ୍ୟତଃ ଯଅ, ବାର୍ଲି ଓ ମାଣ୍ଡିଆ ଫ୍ଲେକ୍ ସହିତ ଶତାଧିକ ପ୍ରକାର ଉତ୍ପାଦ ପ୍ରସ୍ତୁତ କରୁଛନ୍ତି। ଏହିସବୁ ଉତ୍ପାଦ ଏବେ ଆନ୍ଧ୍ରପ୍ରଦେଶ ଓ ତାମିଲନାଡୁର ପ୍ରାୟ ୩୦୦୦ ସୁପରମାର୍କେଟରେ ଉପଲବ୍ଧ ହେଉଛି। ଏହା ବ୍ୟତୀତ ଏଗୁଡ଼ିକୁ ସେ ଆମାଜନ ମାଧ୍ୟମରେ ବାହାର ଦେଶରେ ବିକ୍ରି କରୁଛନ୍ତି। ସାଇ ଏବେ ପିଲାମାନଙ୍କ ପାଇଁ ସହଜରେ ହଜମ ହେଉଥିବା ଖାଦ୍ୟ ପ୍ରସ୍ତୁତ କରିବା ପାଇଁ ଯୋଜନା କରିଛନ୍ତି।
