ବାଉଁଶ ତିଆରି ଜିନିଷ ଏବେ ଲୋକମାନଙ୍କର ପସନ୍ଦ ହେଉଛି। ବାଉଁଶ ଘରଠାରୁ ଆରମ୍ଭକରି ବିଭିନ୍ନ ପ୍ରକାର ଗୃହ ଉପକରଣଗୁଡ଼ିକର ଏବେ ବଜାର ଚାହିଦା ବୃଦ୍ଧି ପାଇବାରେ ଲାଗିଛି। ଏହିକ୍ରମରେ ମୁମ୍ବାଇ ଆଇଆଇଟିର ପ୍ରଡକ୍ଟ ଡିଜାଇନ ଛାତ୍ର ଅଙ୍କାଶ ଚତୁର୍ବେଦୀ ବାଉଁଶରେ ଏକ ହେଡ୍ଫୋନ ତିଆରି କରିଛନ୍ତି। ଏହାର ନାମ ବମ୍ବାଶ। ଏହା ପରିବେଶ ଉପଯୋଗୀ ଓ ୭୦ ପ୍ରତିଶତ ସହଜରେ ମାଟିରେ ମିଶିଯାଇପାରିବ।
ଏହା ମଧ୍ୟ ରିସାଇକେଲଯୋଗ୍ୟ। ଅଙ୍କାଶଙ୍କ ବୟସ ଏବେ ୨୬। ଆଧୁନିକ ଡିଜାଇନରେ ଏହାକୁ ପାରମ୍ପରିକ ପଦ୍ଧତିରେ ନିର୍ମାଣ କରାଯାଇଛି। ବାଉଁଶ ହେଡ୍ଫୋନ ତିଆରି କରିବା ଲାଗି ସେ ସାଧାରଣ ହେଡ୍ଫୋନଗୁଡ଼ିକ ଉପରେ ଗବେଷଣା କରିଥିଲେ। ଏହି କାର୍ଯ୍ୟରେ ତାଙ୍କ ବିଭାଗୀୟ ପ୍ରାଧ୍ୟାପକଙ୍କ ସମେତ ବାଉଁଶ ଲାବ୍ର କର୍ମଚାରୀମାନେ ସହଯୋଗ କରିଥିଲେ। ଏହାର ପ୍ରତିକୃତି ପାଇଁ ସ୍କେଚ୍, ଡିଜାଇନ ଲାଗି ୪ ମାସ ସମୟ ଲାଗି ଯାଇଥିଲା।
