ଦେଶ ବିକାଶର ଆଧାର ହେଉଛି ଗାଁ, ଯାହାକୁ ଅନୁଭବ କରିଛନ୍ତି ତେଲଙ୍ଗାନାର ସରପଞ୍ଚ ଗଡ୍ଜେ ମିନାକ୍ଷୀ। ତାଙ୍କ ଉଦ୍ୟମରେ ଆଡିଲାବାଦ ଜିଲାର ମୁଖରା କେ. ଗାଁ ଭାରତର ସମସ୍ତ ଗ୍ରାମ ପଞ୍ଚାୟତ ପାଇଁ ଆଦର୍ଶ ପାଲଟିଛି। ପାହାଡ଼ ଓ ଜଙ୍ଗଲ ଘେରା ଏହି ଗାଁର ଲୋକେ ସେମାନଙ୍କ ବର୍ଜ୍ୟ ପରିଚାଳନା କରୁଛନ୍ତି, ଯାହା ପାହାଡ଼ିଆ ଅଞ୍ଚଳକୁ ସ୍ବଚ୍ଛ ରଖୁଛି। ପଞ୍ଚାୟତ ତରଫରୁ ପ୍ରତ୍ୟେକ ପରିବାରକୁ ଦୁଇଟି ଡଷ୍ଟବିନ୍ ଦିଆଯାଇଛି ଏବଂ ସଂଗୃହୀତ ବର୍ଜ୍ୟରୁ ଜିଆଖତ ପ୍ରସ୍ତୁତ କରାଯାଇ ତାହାକୁ ବିକ୍ରି କରାଯାଉଛି। ବିଗତ ୩ -୪ ବର୍ଷରେ ଜିଆଖତରୁ ୧୦ ଲକ୍ଷ ଟଙ୍କା ରୋଜଗାର ହୋଇଛି। କେବଳ ଏତିକି ନୁହେଁ ପଞ୍ଚାୟତ ମଧ୍ୟ ପ୍ଲାଷ୍ଟିକ ବର୍ଜ୍ୟରୁ ଏହି ସମୟ ମଧ୍ୟରେ ୭୦ ହଜାର ଟଙ୍କା ଆୟ କରିଛି। ଗାଁର ପ୍ରତିଟି ପରିବାର ସୌରଶକ୍ତି ଉତ୍ପାଦନ କରି ବ୍ୟବହାର କରୁଛନ୍ତି। ପ୍ରତ୍ୟେକ ପରିବାରକୁ ପିଇବା ପାଣି ଯୋଗାଇ ଦିଆଯାଇଛି। ଏତେସବୁ କାର୍ଯ୍ୟ କରିଥିବା ମିନାକ୍ଷୀ ଗାଁରେ ୫ମ ଶ୍ରେଣୀ ଯାଏ ପଢ଼ିବା ପରେ ଗାଁଠାରୁ ଦୂର ସ୍କୁଲରେ ଦ୍ୱାଦଶ ପର୍ଯ୍ୟନ୍ତ ପଢ଼ିଛନ୍ତି। ଏଥିପାଇଁ ପ୍ରତିଦିନ ତାଙ୍କୁ ୧୧ କି.ମି. ଯିବାକୁ ପଡ଼ୁଥିଲା। ତେବେ ୨୦୧୯ରେ ସେ ସରପଞ୍ଚ ଭାବେ ନିର୍ବାଚିତ ହେବା ପରେ ପଞ୍ଚାୟତର ବିକାଶରେ ମନ ଦେଇଥିଲେ। ସେତେବେଳେ ଗାଁରେ ୨୦ଟି ପାଇଖାନା ଥିବାବେଳେ ଏବେ ସମସ୍ତ ପରିବାରରେ ପାଇଖାନା ହୋଇସାରିଛି। ମଶା ନିୟନ୍ତ୍ରଣ ପାଇଁ ପ୍ରତି ପରିବାର ପାଇଁ ସେ ସକ୍ପିଟ ନିର୍ମାଣ କରିଛନ୍ତି।