ରୋଷେଇ ଘର ବର୍ଜ୍ୟ ବହୁ ସମୟରେ ପାରିପାର୍ଶ୍ୱିକ ପରିବେଶକୁ ପ୍ରଦୂଷିତ କରିଥାଏ। ତେବେ ଏହି ସମସ୍ୟାର ଏବେ ସମାଧାନ କରିପାରିଛନ୍ତି ହାଇଦ୍ରାବାଦର ପାବନି ଲୋଲ୍ଲା। ସେ ଏକ ଦୁର୍ଗନ୍ଧ ମୁକ୍ତ ହୋମ୍ କମ୍ପୋଷ୍ଟର ନିର୍ମାଣ କରିଛନ୍ତି। ସାଧାରଣ କମ୍ପୋଷ୍ଟର ୪୫ରୁ ୬୦ ଦିନ ମଧ୍ୟରେ ଖତ ପ୍ରସ୍ତୁତ କରିପାରୁଥିବାବେଳେ ହୋମ୍ କମ୍ପୋଷ୍ଟରରେ ୭ ଦିନ ମଧ୍ୟରେ ଏହା ହୋଇପାରୁଛି। ପରିବା ଚୋପା, ବଳକା ଖାଦ୍ୟ ଭଳି ଜୈବିକ ବର୍ଜ୍ୟରୁ ଏହି ଖତ ହୋଇପାରୁଛି। ଡଷ୍ଟବିନ୍ ଭଳି ଏହାକୁ ବାଲକୋନିଠାରୁ ଆରମ୍ଭ କରି ଘରର ଯେକୌଣସି ସ୍ଥାନରେ ରଖାଯାଇପାରିବ। ଏହା ମାସକୁ ୩୦ କେଜି କିଚେନ ଓ୍ବେଷ୍ଟକୁ ଖତ କରିପାରିବ। ‘ଫ୍ୟୁଚର ଷ୍ଟେପ୍ସ’ ଷ୍ଟାର୍ଟଅପ ମାଧ୍ୟମରେ ଏହି କମ୍ପୋଷ୍ଟର ନିର୍ମାଣ କରୁଛନ୍ତି ପାବନି, ଯେଉଁଥିରେ ସହପ୍ରତିଷ୍ଠାତା ଭାବେ ରହିଛନ୍ତି ମହେଶ ୟୁ ଓ ସିଦ୍ଧେଶ ସାକୋରେ। କର୍ନାଟକ, ମହାରାଷ୍ଟ୍ର, ଦିଲ୍ଲୀ ଓ ତେଲଙ୍ଗାନାରେ ଏବେ ସୁଦ୍ଧା ସେ ୬,୦୦୦ରୁ ଅଧିକ କମ୍ପୋଷ୍ଟର ବିକ୍ରି କରିସାରିଲେଣି। ଗୋଟିକୁ ୩,୫୦୦ ଟଙ୍କାରେ ବିକ୍ରି କରାଯାଉଛି। ପାବନି ମଧ୍ୟ ଜଣେ ଅର୍ବାନ ଗାର୍ଡନର। ପରିବେଶ ଉପରେ କାର୍ଯ୍ୟ କରୁଥିବା ପିନାକା ପଦ୍ମା ସଂସ୍ଥା ମାଧ୍ୟମରେ ନିଜ ଅଗଣାରେ ସେ ୧୦୦୦ ଗଛ ଲଗାଇ ଏକ ବଗିଚା କରିଛନ୍ତି।