ବୟସ ୮୭, ତଥାପି ଏହି ବୟସରେ ସଡ଼କ ଦୁର୍ଘଟଣାରେ ଜୀବନ ବଞ୍ଚାଇବା ଲାଗି ପ୍ରଶିକ୍ଷଣ କାର୍ଯ୍ୟକ୍ରମ ଜାରି ରଖିଛନ୍ତି ରାଜସ୍ଥାନର ଡ. ମାୟା ଟଣ୍ଡନ। ସେ ‘ସହାୟତା ଟ୍ରଷ୍ଟ’ ଗଠନ କରି ତା’ ମାଧ୍ୟମରେ ଏହି ପ୍ରଶିକ୍ଷଣ ଅଭିଯାନ ଚଳାଇଛନ୍ତି। ଏବେ ସୁଦ୍ଧା ମାୟା ୧,୩୩,୦୦୦ ଲୋକଙ୍କୁ ସଡ଼କ ଦୁର୍ଘଟଣାରେ ଜୀବନ ରକ୍ଷା ଉପାୟ ସମ୍ପର୍କରେ ପ୍ରଶିକ୍ଷଣ ଦେଇ ସାରିଲେଣି। ମାୟାଙ୍କ ଜନ୍ମ ଆଜମେରରେ। ସେ ସେଠାରେ ପଢିଛନ୍ତି ଓ ବଢିଛନ୍ତି। ପରେ ଏମ୍ବିବିଏସ୍ରେ ଡିଗ୍ରୀ ହାସଲ କରି ଜଣେ ଆନାସ୍ଥେସିଓଲୋଜିଷ୍ଟ ଭାବେ କାର୍ଯ୍ୟ କରିଥିଲେ। ୧୯୮୫ରେ ଅବସର ନେବା ପରେ ଏହି କାର୍ଯ୍ୟରେ ଲାଗିଛନ୍ତି। ପ୍ରଥମେ ରାଜସ୍ଥାନ ପୋଲିସ ଏକାଡେମୀ ଅନୁରୋଧରେ ପୋଲିସମାନଙ୍କୁ ଦୁର୍ଘଟଣା ପୀଡ଼ିତଙ୍କ ଜୀବନ ବଞ୍ଚାଇବା ସମ୍ପର୍କରେ ପ୍ରଶିକ୍ଷଣ ଦେବା ଆରମ୍ଭ କରିଥିଲେ। ଏହା ପରେ ବିଭିନ୍ନ ସେମିନାର ମାଧ୍ୟମରେ ସେ ମାଗଣାରେ ଏହି କାର୍ଯ୍ୟକ୍ରମ ଚଳାଇଛନ୍ତି। ସହାୟତା ଟ୍ରଷ୍ଟ ମଧ୍ୟ ସରକାରଙ୍କ ସହ ମିଶି ବିଭିନ୍ନ ସାର୍ବଜନୀନ ସ୍ଥାନରେ ଜରୁରୀ ସେବା ଯୋଗାଇ ଦେଉଛି।