ଅଦରକାରୀ ପୁରୁଣା ଜିନିଷର ପୁନଃବ୍ୟବହାର କରି ଏକ ସୁନ୍ଦର ବଗିଚା କରିଛନ୍ତି ଉତ୍ତରପ୍ରଦେଶ ମିରଟର ସୁରଭି ଯାଦବ। ସେ ଅଦରକାରୀ ବୋତଲ, ବାସନ ଏବଂ ଅନ୍ୟାନ୍ୟ ବର୍ଜ୍ୟକୁ ଉପଯୋଗ କରି ବଗିଚାରେ ୩୦୦ରୁ ଅଧିକ ଗଛ ଲଗାଇଛନ୍ତି। ଏହିି ବଗିଚା ତାଙ୍କ ଶାଶୁଙ୍କ ସ୍ମୃତିରେ କରିଛନ୍ତି। ଶାଶୁଙ୍କର କୋଭିଡ୍-୧୯ରେ ମୃତ୍ୟୁ ହୋଇଥିଲା ଓ ଏହାର ମାତ୍ର ଦୁଇ ବର୍ଷ ପୂର୍ବରୁ ସୁରଭି ତାଙ୍କ ଘରକୁ ବୋହୂ ହୋଇ ଆସିଥିଲେ। ଶାଶୁଙ୍କ ସହିତ ସମ୍ପର୍କ ଏତେ ଭଲ ଥିଲା ଯେ ସୁରଭି ତାଙ୍କୁ ମନେରଖିବା ଲାଗି ଅଗଣାରେ ଏହି ବଗିଚା ଆରମ୍ଭ କରିଥିଲେ। ବିଶେଷକରି ତାଙ୍କ ସମୟରେ ଘରେ ବ୍ୟବହୃତ ହୋଇଥିବା ପୁରୁଣା ବୋତଲ, ଜାର୍, ବାସନ ଆଦିକୁ ବଗିଚାରେ ବ୍ୟବହାର କରାଯାଇଛି। ସେ ମଧ୍ୟ ୟୁଟ୍ୟୁବ୍ ଓ ଇନ୍ଷ୍ଟାଗ୍ରାମ୍ରେ ବଗିଚା ସମ୍ପର୍କରେ ମତ ରଖୁଛନ୍ତି। ବଗିଚାରେ ବିଭିନ୍ନ ପ୍ରକାର ସୌନ୍ଦର୍ଯ୍ୟବର୍ଦ୍ଧକ ଗଛ ସହିତ ଫୁଲଗଛ ଲଗାଇଛନ୍ତି। ଏହା ବ୍ୟତୀତ ସେଠାରେ ପରିବା ଚାଷ ମଧ୍ୟ କରୁଛନ୍ତି। ସେ ଟମାଟୋ, ବାଇଗଣ, ପୋଇ, ମେଥି, ବିନ୍ସ ଓ ଲଙ୍କା ଅମଳ କରୁଛନ୍ତି, ଯାହା ତାଙ୍କ ପରିବାରର ଆବଶ୍ୟକତା ପୂରଣ କରିପାରୁଛି।