ନବମ ଶ୍ରେଣୀର ଛାତ୍ର ରିଶଭ ପ୍ରସୋଭଙ୍କ ମାନସିକତାକୁ ଲକ୍ଷ୍ୟ କଲେ ଆଶ୍ଚର୍ଯ୍ୟ ଲାଗେ। ବେଙ୍ଗାଲୁରୁର ୧୪ ବର୍ଷ ବୟସର ଏହି ଛାତ୍ର ଜଳ ଅପବ୍ୟୟ ରୋକିବାରେ ଲାଗିଛନ୍ତି। ତାଙ୍କ ଆଖପାଖ ଲୋକଙ୍କ ଘରେ ତଥା ଅନେକ ହଷ୍ଟେଲ ଓ ସ୍କୁଲରେ ଟ୍ୟାପ୍ଗୁଡ଼ିକରେ ଏରଟର ଲଗାଇ ଜଳ ସଂରକ୍ଷଣ କରିବାର ବାଟ ଦେଖାଉଛନ୍ତି। ୨୦୫୦ ସୁଦ୍ଧା ଜଳ ସଙ୍କଟ ଦେଖାଯିବ ଓ ଭାରତରେ ମୁଣ୍ଡପିଛା ଜଳ ବ୍ୟବହାର ବହୁତ କମିଯିବ ବୋଲି ଯେଉଁ ତଥ୍ୟ ପ୍ରକାଶ ପାଇଛି ତାହାକୁ ଲକ୍ଷ୍ୟ କରି ରିଶଭ ତାଙ୍କ ଅଭିଯାନ ଆରମ୍ଭ କରିଛନ୍ତି। ବେଙ୍ଗାଲୁରୁସ୍ଥିତ ନ୍ୟାଶନାଲ ଏକାଡେମୀ ଫର୍ ଲର୍ନିଂର ଛାତ୍ର ରିଶଭ ‘ଜଳ ମିଶନ’ନାମରେ ତାଙ୍କ ଅଭିଯାନ ଚଳାଇଛନ୍ତି। ଏହା ମାଧ୍ୟମରେ ସେ ବର୍ଷକ ମଧ୍ୟରେ ୭୦ ଲକ୍ଷ ଲିଟର ପାଣି ବଞ୍ଚେଇସାରିଲେଣି। ଏରଟର ଲଗାଇବା ଦ୍ୱାରା ପ୍ରତି ମିନିଟରେ ଗୋଟିଏ ଟ୍ୟାପରୁ ଯେତିକି ପାଣି ବାହାରିବା କଥା ତା’ର ଅଧା ବାହାରୁଛି। ଏହାଦ୍ୱାରା ମାସକୁ ୧,୨୭୪ ଲିଟର ଜଳ ବଞ୍ଚାଯାଇପାରୁଛି। କେବଳ ସେ ରହୁଥିବା ଆପାର୍ଟମେଣ୍ଟରେ ୨୦ଲକ୍ଷ ଲିଟର ଜଳ ବଞ୍ଚାଇବା ସହ ଓ୍ବାଟର ବିଲ୍ ବି କମାଇ ପାରିଛନ୍ତି। ରିଶଭ ଏହି ଅଭିଯାନକୁ ଦେଶର ବିଭିନ୍ନ ସହରର ସ୍କୁଲ, ହଷ୍ଟେଲ, ସିନେମା ଘର ଓ ମଲ୍ଗୁଡ଼ିକରେ ପହଞ୍ଚାଇବାର ଲକ୍ଷ୍ୟ ରଖିଛନ୍ତି। କେବଳ ଏତିକି ନୁହେଁ, ବେଙ୍ଗାଲୁରୁୁ ଶୁଷ୍କ ଜଳଉତ୍ସଗୁଡ଼ିକରେ ଜଳ ସଂରକ୍ଷଣ ପାଇଁ ବି ଏକାଧିକ ଏନଜିଓ ସହ ଯୋଗାଯୋଗରେ ଅଛନ୍ତି।
