ପ୍ରଶାସନିକ ଦାୟିତ୍ୱ ସହ ସହରକୁ ସବୁଜ ସୁନ୍ଦର କରିବାରେ ଜଣେ ଆଇଏଏସ୍ ଅଧିକାରୀଙ୍କ ପ୍ରୟାସ ଅନୁକରଣୀୟ। ଏହି ଅଧିକାରୀ ହେଉଛନ୍ତି ଡ.ଆଲ୍ବି ଜନ୍ ଭର୍ଗିସ। ସେ ଗ୍ରେଟର ଚେନ୍ନାଇ କର୍ପୋରେଶନର ରିଜିଓନାଲ ଡେପୁଟି କମିଶନର (ସାଉଥ) ଭାବେ ଦାୟିତ୍ୱ ନିର୍ବାହ କରୁଛନ୍ତି। ସେ ଗତ ବର୍ଷ କୋଟୁପୁରମରେ ପ୍ରଥମେ ଏକ ଜଙ୍ଗଲ କରିବା ପରେ କର୍ପୋରେଶନ ଚେନ୍ନାଇରେ ଚଳିତ ବର୍ଷ ଏଭଳି ୩୦ଟି ଅର୍ବାନ ଫରେଷ୍ଟ ବା ଜଙ୍ଗଲ କରିବା ଲାଗି ଯୋଜନା କରିଛି। ଆଗକୁ ଏଭଳି ୧୦୦ଟି ଜଙ୍ଗଲ କରିବାରେ ଯୋଜନା ରଖାଯାଇଛି। ଏଠାରେ ୧୫ ବର୍ଷ ହେବ ବର୍ଜ୍ୟ ଗଦା ହେଉଥିଲା। ତେବେ ଭର୍ଗିସଙ୍କ ନେତୃତ୍ୱରେ ସେହି ଅଞ୍ଚଳରୁ କଂକ୍ରିଟ ସବୁ ବାହାର କରି ଜାନୁୟାରୀ ୨୦୨୦ ଏନ୍ଜିଓଙ୍କ ସହାୟତାରେ ୨୦୨୦ଟି ଦେଶୀ ଜଙ୍ଗଲୀ ଗଛ ଲଗାଯାଇଛି। ଭର୍ଗିସ ମିୟାଓ୍ବାକି ପଦ୍ଧତି ଅବଲମ୍ବନ କରିଛନ୍ତି, ଯେଉଁଥିତ୍ରେ ଗଛ ଅନ୍ୟ ପଦ୍ଧତି ଅପେକ୍ଷା ୧୦ଗୁଣ ଅଧିକ ବଢିବ ଓ ୩୦% ଘଞ୍ଚ ହୋଇପାରିବ। ଜାପାନର ଉଦ୍ଭିଦ ବିଜ୍ଞାନୀ ଅକିରା ମିୟାଓ୍ବାକିଙ୍କ ନାମାନୁସାରେ ଏହି ପଦ୍ଧତିର ନାମ ରଖାଯାଇଛି। ଏଥିରେ ପାଖକୁ ପାଖ ଦେଶୀ ଗଛ ହିଁ ଲଗାଯାଇ ଶୀଘ୍ର ଜଙ୍ଗଲ ସୃଷ୍ଟି କରାଯାଏ। ଏହା ପୂର୍ବରୁ ଭର୍ଗିସ ତାମିଲନାଡୁର ଟୁଟିକୋରିନରେ ନିଯୁକ୍ତି ପାଇଥିବାବେଳ ଏଭଳି ଜଙ୍ଗଲ ବି ସୃଷ୍ଟି କରିଥିଲେ। ସେହି ଅଭିଜ୍ଞତାକୁ ଆଧାର କରି ସେ ଆଗକୁ ବଢୁଛନ୍ତି।