ମହିଳାମାନେ କୃଷି କ୍ଷେତ୍ରରେ ସଫଳତାର ଶୀର୍ଷକୁ ଯାଇପାରିବେ। ଏହା ପ୍ରମାଣ କରିଛନ୍ତି ଉତ୍ତରପ୍ରଦେଶର ସାନ୍ନା ଖାଁ। ମିରଟ ନିବାସୀ ୩୧ ବର୍ଷୀୟା ସାନ୍ନା ଜୈବିକ କୃଷି ପାଇଁ କୃଷକମାନଙ୍କୁ ପ୍ରୋତ୍ସାହିତ କରିବା ସହ ଜିଆଖତ ପ୍ରସ୍ତୁତ କରି ବର୍ଷକୁ ୧ କୋଟି ରୋଜଗାର କରୁଛନ୍ତି। ୨୦୧୪ରେ ୨୩ ବର୍ଷ ବୟସରେ ସେ ଏହା ଆରମ୍ଭ କରିଥିଲେ। ସେତେବେଳେ ସେ ବି.ଟେକର ୩ୟ ବର୍ଷ ଛାତ୍ରୀ ଥିଲେ। ଜିଆଖତ ପ୍ରସ୍ତୁତ କରିବା ଲାଗି ସେ ଆଗେଇ ଆସିବା ବେଳେ ତାଙ୍କୁ ମା’ ବାପା ରୋକିଥିଲେ। ସେ କାହା କଥା ନ ମାନି ଏ କ୍ଷେତ୍ରକୁ ଆସିଥିଲେ। ପ୍ରଥମେ ତାଙ୍କ ଭାଇଙ୍କଠାରୁ ଆର୍ଥିକ ସହାୟତା ପାଇ ଏସଜେ ଅର୍ଗାନିକସ କମ୍ପାନୀ ଆରମ୍ଭ କରିଥିଲେ। ଡାଇରୀ ଫାର୍ମ ମାଲିକମାନଙ୍କ ସହ ଯୋଗାଯୋଗ କରି ସେଠାରୁ ଗୋବର ସଂଗ୍ରହ ସହ ଜିଆଖତ ପ୍ରସ୍ତୁତ କରୁଥିଲେ। ଏହା ସହ ଜିଆଖତ ପାଇଁ ମିରଟ୍ ଓ ଗାଜିଆବାଦରୁ ଘରୋଇ ବର୍ଜ୍ୟ ସଂଗ୍ରହ କରି ଉପଯୋଗ କରୁଛନ୍ତି। ଗୋଟିଏ ପ୍ରୋସେସିଂରେ ବର୍ଜ୍ୟରୁ ଦେଢମାସରେ ଜିଆଖତ ପ୍ରସ୍ତୁତ ହୋଇପାରୁଛି ଏବଂ ଏହାକୁ ପରୀକ୍ଷା କରାଯାଇ ବ୍ୟବହାର ପାଇଁ ପ୍ୟାକ କରାଯାଉଛି। ୨୦୧୫ରୁ ସାନ୍ନା ଜିଆଖତରୁ ପ୍ରଥମେ ଲାଭ ପାଇଥିଲେ। ୨୦୨୦ ସୁଦ୍ଧା ୫୦୦ ଟନ ଖତ ପ୍ରସ୍ତୁତ କରି ସାରିଥିଲେ ଓ ଏଥିରୁ ବାର୍ଷିକ ୧ କୋଟି ଟଙ୍କା ଆୟ କରୁଛନ୍ତି। ତାଙ୍କ କମ୍ପାନୀର ଦକ୍ଷତା ବୃଦ୍ଧି କରିଛନ୍ତି ଓ ମାସକୁ ୧୫୦ ଟନ୍ ଖତ ପ୍ରସ୍ତୁତ କରାଯାଉଛି। ଏହି କାର୍ଯ୍ୟରେ ସେ ୪୦ ଜଣଙ୍କୁ ନିଯୁକ୍ତି ଦେଇଛନ୍ତି।
