ଗୁଆହାଟି ଆଇଆଇଟି ଗବେଷକମାନେ ଏକ ପ୍ରକାର ବର୍ନର ବିକାଶ କରିଛନ୍ତି, ଯାହା ଇନ୍ଧନ ବାବଦରେ ଖର୍ଚ୍ଚ ୪୦ ପ୍ରତିଶତ କମାଇପାରୁଛି। ଏହି ବର୍ନରର ନାମ ରଖାଯାଇଛି ପୋରୋସ ରାଡିଆଣ୍ଟ ବର୍ନର (ପିଆରବି)। ଏହା ଏଲ୍ପିଜି, ବୟୋଗ୍ୟାସ୍ ଏବଂ କିରୋସିନ ଭଳି ଇନ୍ଧନ କ୍ଷେତ୍ରରେ ସମ୍ପୂର୍ଣ୍ଣ ଉପଯୋଗୀକ୍ଷମ। ଏହାକୁ ବ୍ୟବସାୟିକ ତଥା ଘରୋଇ ଉଦ୍ଦେଶ୍ୟରେ ବ୍ୟବହାର କରାଯାଇପାରିବ। ଗୁଆହାଟି ଆଇଆଇଟିର ପ୍ରାଧ୍ୟାପକ ପି. ମୁଥୁକୁମାର ଓ ତାଙ୍କ ସାଥୀ ଗବେଷକମାନଙ୍କ ଦ୍ୱାରା ଏହି ବର୍ନର ପ୍ରସ୍ତୁତ କରାଯାଇଛି। ଏଥିରୁ ବିଷାକ୍ତ କାର୍ବନ ମନୋକ୍ସାଇଡ ଏବଂ ନାଇଟ୍ରୋଜେନ ଡାଇଅକ୍ସାଇଡ ଗ୍ୟାସ୍ ନିର୍ଗମନ ବି ହ୍ରାସ ପାଉଛି। ଏହି ବର୍ନର ତିଆରି କରିବାରେ ଆଲୁମିଲିୟମ ଏବଂ ସିଲିକନ ବ୍ୟବହାର କରାଯାଇଛି, ଯାହା ଅତ୍ୟଧିକ ଉତ୍ତାପ ସହନ କରିପାରିବ। ଏଥିରେ ଖୁବ୍ଶୀଘ୍ର ରୋଷେଇ ହେଉଛି । ପାରମ୍ପରିକ ବର୍ନରଠାରୁ ୩୦ ପ୍ରତିଶତ ସମୟ ବଞ୍ଚାଯାଇପାରିବ ବୋଲି କହନ୍ତି ମୁଥୁ କୁମାର। ଏହି ବର୍ନରକୁ ପରୀକ୍ଷାଗାର ଏବଂ ରୋଷେଇ ଘରେ ବି ପରୀକ୍ଷା କରାଯାଇଛି। ଏହା ଭାରତ ସରକାରଙ୍କ ବିଆଇଏସ୍ ଷ୍ଟାଣ୍ଡାର୍ଡର ସର୍ତ୍ତ ବି ପୂରଣ କରିପାରିଛି। ଏହି ବର୍ନର ତିଆରି କରି ବିକ୍ରି କରିବା ଲାଗି ବୈଜ୍ଞାନିକମାନେ ଏକ କମ୍ପାନୀ ସହ ଚୁକ୍ତି ସ୍ବାକ୍ଷର କରିଛନ୍ତି । ଏଣୁ ଖୁବ୍ଶୀଘ୍ର ଏହା ବଜାରରେ ଉପଲବ୍ଧ ହେବ ବୋଲି ଆଶା କରାଯାଉଛି।