ପ୍ରାକୃତିକ ବିପର୍ଯ୍ୟୟ ସମୟରେ ମଣିଷ ଜୀବନ ବଞ୍ଚାଇବା ଲାଗି ଯେତିକି ଗୁରୁତ୍ୱ ଦିଆଯାଏ ବାହାରେ ରହୁଥିତ୍ବା ପ୍ରାଣୀଙ୍କ ସୁରକ୍ଷା ଉପରେ ସେତିକି ଧ୍ୟାନ ଦିଆଯାଇ ନ ଥାଏ। କିନ୍ତୁ ହାଇଦ୍ରାବାଦର ପ୍ରଦୀପ ନାୟାର ଆଇଟି ଇଣ୍ଡଷ୍ଟ୍ରୀରୁ ଚାକିରି ଛାଡି ପ୍ରାକୃତିକ ବିପର୍ଯ୍ୟୟ ସମୟରେ ପ୍ରାଣୀଙ୍କ ଜୀବନ ରକ୍ଷା କରୁଛନ୍ତି। କେବଳ ବିପର୍ଯ୍ୟୟ ବେଳେ ନୁହେଁ, ବର୍ଷର ଅନ୍ୟ ସମୟରେ ବି ସେ ବିଭିନ୍ନ ସ୍ଥାନରୁ ବିପଦରେ ପଡ଼ିଥିବା ପ୍ରାଣୀଙ୍କୁ ଉଦ୍ଧାର କରୁଛନ୍ତି। ଏଭଳି ସାହସିକ ପଦକ୍ଷେପ ନେଇ ଏବେ ସୁଦ୍ଧା ସେ ୭୭,୦୦୦ରୁ ଅଧିକ ପ୍ରାଣୀଙ୍କୁ ଉଦ୍ଧାର କରିସାରିଲେଣି। ଏମାନଙ୍କ ମଧ୍ୟରେ ରହିଛନ୍ତି ସାପ, କୁକୁର, ମାଙ୍କଡ, ବିଲେଇ, ବିଭିନ୍ନ ପ୍ରଜାତିର ପକ୍ଷୀ ଓ ହିଂସ୍ର ପ୍ରାଣୀ। ଉଦ୍ଧାର ପରେ ଆହତ ପ୍ରାଣୀମାନଙ୍କୁ ନେହେରୁ ଜୁଲୋଜିକାଲ ପାର୍କରେ ଚିକିତ୍ସା କରାଉଛନ୍ତି। ଆନିମଲ ଓ୍ବାରିୟର୍ସ କଞ୍ଜର୍ଭେଶନ ସୋସାଇଟି ଗଠନ କରି ପ୍ରାଣୀମାନଙ୍କୁ ବଞ୍ଚାଇବା ପାଇଁ ଏକ ସୁନିୟୋଜିତ ଅଭିଯାନ ଚଳାଇଛନ୍ତି ୩୭ ବର୍ଷୀୟ ପ୍ରଦୀପ। ହାଇଦ୍ରାବାଦର ଅମିନପୁରାସ୍ଥ ତାଙ୍କ ଘରେ ସେ ଅନେକ ଆହତ ବୁଲା କୁକୁରଙ୍କୁ ରଖିଛନ୍ତି ଓ ସେମାନଙ୍କ ଚିକିତ୍ସା ବ୍ୟବସ୍ଥା ମଧ୍ୟ କରୁଛନ୍ତି। କୌଣସି ପ୍ରାଣୀ ବିପଦରେ ପଡିଥିବାର ଖବର ପାଇବା କ୍ଷଣି ସେ ଓ ତାଙ୍କ ଟିମ୍ ସେଠାରେ ପହଞ୍ଚି ଉଦ୍ଧାର କରନ୍ତି। ସେ ତାଙ୍କ ଅଭିଯାନ ଆରମ୍ଭ କରିବା ସମୟରେ ଦୈନିକ ୧୦-୧୫ ପ୍ରାଣୀଙ୍କୁ ଉଦ୍ଧାର କରୁଥିଲେ। ଏବେ ଏହି ସଂଖ୍ୟା ବଢିପାରିଛି।