ପେସାରେ ଅଟୋଚାଳକ ହେଲେ ମଧ୍ୟ ହୃଦୟରେ ସେବାର ସ୍ଥାନ ବହୁ ଉଚ୍ଚରେ। ଏମିତି ଜଣେ ବ୍ୟକ୍ତି ହେଉଛନ୍ତି ଅକ୍ଷୟ ସଞ୍ଜୟ କୋଥଓ୍ବାଲେ। ପୁଣେରେ ରହନ୍ତି ଓ ଅଟୋ ଚଳାଇ ଗୁଜରାଣ ମେଣ୍ଟାନ୍ତି। କିନ୍ତୁ ଦେଶରେ କରୋନା ମହାମାରୀ ଭୟଙ୍କର ରୂପ ନେବା ପରେ ସଞ୍ଜୟ ତାଙ୍କ ବିବାହ ପାଇଁ ସଞ୍ଜିତ ୨ ଲକ୍ଷ ଟଙ୍କାକୁ ଗରିବଙ୍କ ସେବାରେ ଉପଯୋଗ କରିଛନ୍ତି। ମହାମାରୀର ତାଡ଼ନାରେ ଜୀବିକା ହରାଇ ଅସହାୟ ହୋଇପଡ଼ିଥିବା ୧,୫୦୦ ପରିବାରକୁ ଖାଦ୍ୟ ଯୋଗାଇ ଦେଇଛନ୍ତି। କେବଳ ଏତିକି ନୁହେଁ, ସେ ଏବେ ସୁଦ୍ଧା ବିଭିନ୍ନ ଉତ୍ସରୁ ଦାନ ସୂତ୍ରରେ ପ୍ରାପ୍ତ ଟଙ୍କାରେ କାମଧନ୍ଦା ହରାଇଥିବା ପ୍ରବାସୀ ଶ୍ରମିକମାନଙ୍କୁ ଦୈନିକ ଖାଦ୍ୟ ପୁଡିଆ ବାଣ୍ଟୁଛନ୍ତି। ଏହା ସହ ସଞ୍ଜୟ ଲୋକମାନଙ୍କୁ ଜରୁରୀ ସମୟରେ ହସ୍ପିଟାଲକୁ ନେବା ଆଣିବା କରିବା ପାଇଁ ଦିନ ରାତି ୨୪ ଘଣ୍ଟିଆ ସେବା ମଧ୍ୟ ଯୋଗାଇ ଦେଉଛନ୍ତି। ସେ ଅଟୋରେ ସ୍ବାସ୍ଥ୍ୟ କର୍ମୀମାନଙ୍କୁ ସମ୍ପୂର୍ଣ୍ଣ ମାଗଣାରେ ନେବା ଆଣିବା କରୁଛନ୍ତି। ଯେତେ କଷ୍ଟ ହେଲେ ମଧ୍ୟ ସଙ୍କଟ ସମୟରେ ଲୋକମାନଙ୍କୁ ସାହାଯ୍ୟ ଜାରି ରଖିବେ ବୋଲି ନିଶ୍ଚିତ ଅଛନ୍ତି ସଞ୍ଜୟ।
