ପରିବେଶ ପାଇଁ ପକ୍ଷୀଙ୍କ ଆବଶ୍ୟକତାକୁ ଖୁବ୍ ଭଲ ଭାବେ ବୁଝିଛନ୍ତି ମଧ୍ୟପ୍ରଦେଶର କୃଷକ ନାରାୟଣ ସିଂ। ସେଥିପାଇଁ ସେ ୧୨ ବର୍ଷ ବୟସରୁ ତାଙ୍କ ଗାଁରେ ମୟୂରଙ୍କର ସୁରକ୍ଷା କରୁଛନ୍ତି। ଶିକାରୀ ତଥା ଲୋକମାନଙ୍କ ଆକ୍ରମଣରୁ ସେମାନଙ୍କୁ ବଞ୍ଚାଇବା ଲାଗି ସେ ଏଭଳି ପଦକ୍ଷେପ ଗ୍ରହଣ କରିଛନ୍ତି। ମୟୂରଙ୍କ ସୁରକ୍ଷା ଲାଗି ଲୋକମାନଙ୍କୁ ସଚେତନ ମଧ୍ୟ କରୁଛନ୍ତି। ସେ ୩୦ ବର୍ଷ ମଧ୍ୟରେ ୧୦୦୦ରୁ ଊର୍ଦ୍ଧ୍ୱ ଆହତ ମୟୂରଙ୍କ ଚିକିତ୍ସା କରି ସୁସ୍ଥ କରିପାରିଛନ୍ତି। ଆହତ ମୟୂରଙ୍କୁ ପ୍ରାଣୀ ଚିକିତ୍ସକଙ୍କ ଦ୍ୱାରା ଚିକିତ୍ସା କରାଉଛନ୍ତି। ୫୦ ବର୍ଷୀୟ ନାରାୟଣ ରହନ୍ତି ଝାବୁଆ ଜିଲାର ପେଟଲାଓ୍ବାଡ ଅଞ୍ଚଳର କରଦଓ୍ବାଡ ଗାଁରେ। ଏହି ଅଞ୍ଚଳରେ ସବୁଠୁ ବେଶି ମୟୂର ରହନ୍ତି। ନାରାୟଣ ସେମାନଙ୍କୁ ଖାଇବାକୁ ଦେଉଛନ୍ତି ଓ ପାଣି ପିଇବାର ବ୍ୟବସ୍ଥା କରିଛନ୍ତି। ଖାଦ୍ୟ ପାଇଁ ସେ ନିଜେ ଖର୍ଚ୍ଚ କରୁଛନ୍ତି। ନାରାୟଣଙ୍କ ଏଭଳି ଆଗ୍ରହକୁ ଲକ୍ଷ୍ୟ କରି ବହୁ ସମୟରେ ଲୋକମାନେ ବି ତାଙ୍କୁ ଆର୍ଥିକ ସାହାଯ୍ୟ କରୁଛନ୍ତି। ଏସବୁ କାର୍ଯ୍ୟରେ ସେ ରାଜ୍ୟ ବନ ବିଭାଗ ଓ ସ୍ଥାନୀୟ ପ୍ରଶାସନର ସହଯୋଗ ପାଉଛନ୍ତି। ମୟୂର ସୁରକ୍ଷା ଅଭିଯାନ ଯୋଗୁ ଏବେ ତାଙ୍କ ଗାଁରେ ପାଖାପାଖି ୨,୫୦୦ ମୟୂର ରହିଛନ୍ତି।
