ଝାଡୁଦାର ଭାବେ କାମ କରୁଥିବା ଜଣେ ମହିଳା ରାଜସ୍ଥାନ ପ୍ରଶାସନିକ ସେବା (ଆର୍ଏଏସ୍)ରେ କୃତକାର୍ଯ୍ୟ ହେବା କିଛି କମ୍ କଥା ନୁହେଁ। ଏହି ମହିଳା ଜଣକ ହେଉଛନ୍ତି ଆଶା କନ୍ଦରା। ସେ ଏବେ ଯୋଧପୁରରେ ଡେପୁଟି କଲେକ୍ଟର ଭାବେ କାର୍ଯ୍ୟରତ। ଏହାପୂର୍ବରୁ ଆଶା ଯୋଧପୁର ନଗର ନିଗମ (ଉତ୍ତର)ରେ ସଫେଇ କର୍ମଚାରୀ ଭାବେ କାର୍ଯ୍ୟ କରିଥିଲେ। ଏବେ ସେ ଯୋଧପୁର ନଗର ନିଗମର ଏହି କାର୍ଯ୍ୟ ତଦାରଖ କରିବା ସହ ଅନ୍ୟ ବିକାଶମୂଳକ କାର୍ଯ୍ୟ କରିବାର ଦାୟିତ୍ୱ କାନ୍ଧକୁ ନେଇଛନ୍ତି। ଆଶା ଜଣେ ସିଙ୍ଗଲ୍ ମଦର। ତାଙ୍କର ଗୋଟିଏ ପୁଅ ଓ ଝିଅଟିଏ ଅଛି। ବିବାହର ୫ ବର୍ଷ ପରେ ସେ ସ୍ବାମୀଙ୍କଠାରୁ ଅଲଗା ହୋଇ ପିଲାଙ୍କୁ ମଣିଷ କରିବା ଲାଗି ସଫେଇ କର୍ମଚାରୀ ଭାବେ କାର୍ଯ୍ୟ କରୁଥିଲେ। ଦିନରେ ହାତରେ ଝାଡୁ ଧରୁଥିଲେ ଓ ରାତିରେ ଆର୍ଏଏସ୍ ଲାଗି ପ୍ରସ୍ତୁତ ହୁଅନ୍ତି। କଠୋର ପରିଶ୍ରମ ଓ ନିଷ୍ଠା ବଳରେ ସେ ଆର୍ଏଏସ୍ରେ ୭୨୮ତମ ର଼୍ୟାଙ୍କ ପାଇ ଜଣେ ଅଧିକାରୀ ହେବାର ସୌଭାଗ୍ୟ ଲାଭ କରିଛନ୍ତି। ଭାରତୀୟ ପ୍ରଶାସନିକ ସେବା (ଆଇଏଏସ୍)ପାଇଁ ବୟସ ବାଧକ ହେବାରୁ ସେ ଏଥିରୁ ଓହରି ଯାଇ ଆର୍ଏଏସ୍ ପରୀକ୍ଷା ଦେଇଥିଲେ। ଲକ୍ଷ୍ୟ ହାସଲ କରିବାକୁ ଆତ୍ମବିଶ୍ୱାସ ରହିଲେ ତାହା ସହଜରେ ପ୍ରାପ୍ତ ହୁଏ ବୋଲି କହିଛନ୍ତି ଆଶା। ଆଶାଙ୍କ ସଫଳତା ତାଙ୍କ ସମ୍ପ୍ରଦାୟର ମହିଳାମାନଙ୍କ ପାଇଁ ଏକ ପ୍ରେରଣା।