ଅନେକ ସମୟରେ ଜଣକର ଅଭିନୟ ଚିନ୍ତା ଓ କୌଶଳ ଏକ ଜଟିଳ ସମସ୍ୟାର ସମାଧାନ ବାଟ ଦେଖାଇଥାଏ। ଯେମିତି କରିଛନ୍ତି ଗୁଜରାଟର ରାହୁଲ ଚୌଧୁରୀ। ପରିବେଶ ସୁରକ୍ଷା ଲାଗି ପ୍ଲାଷ୍ଟିକ୍ ବର୍ଜ୍ୟର ପୁନଃ ଉପଯୋଗ କରି ମଜଭୁତ ଶିଟ୍ ବା ଚାଦର ପ୍ରସ୍ତୁତ କରୁଛନ୍ତି। ମଲ୍ଟି ଲେୟାର୍ଡ ପ୍ଲାଷ୍ଟିକ୍ ବା ବହୁ ପରସ୍ତ ପ୍ଲାଷ୍ଟିକ ଦ୍ରବ୍ୟ ଯଥା ଓ୍ବାର୍ପର ଓ ଟୁଥ୍ପେଷ୍ଟ ଟ୍ୟୁବ୍ ସଂଗ୍ରହ କରି ସେ ଶିଟ୍ ପ୍ରସ୍ତୁତ କରୁଛନ୍ତି। ଏହା ନିଆଁ, ପାଣି, ଉତ୍ତାପ ପ୍ରତିରୋଧୀ ଓ ଉଇ ଏହାକୁ ନଷ୍ଟ କରିପାରୁ ନାହିଁ। ଏବେସୁଦ୍ଧା ରାହୁଲ ୮୦,୦୦୦ ଟନ୍ ପ୍ଲାଷ୍ଟିକ୍ ସଂଗ୍ରହ କରି ତାହାକୁ ଶିଟ୍ ପ୍ରସ୍ତୁତିରେ ବ୍ୟବହାର କରିସାରିଲେଣି। ଏହିସବୁ ଶିଟ୍ରେ ଘର ଛାତ ତଥା ବେଞ୍ଚ ନିର୍ମାଣ କରାଯାଉଛି। ଏହା ମଧ୍ୟ ସହଜରେ ବିଘଟନ ହେଉଛି। ୨୦୧୪ରେ ରାହୁଲ ‘ରିକନ ପ୍ୟାନେଲ୍ମ’ ଷ୍ଟାର୍ଟଅପ୍ ପ୍ରତିଷ୍ଠା କରି ଏହି କାର୍ଯ୍ୟ କରୁଛନ୍ତି। ଏବେ ଦିନକୁ ସେ ୫୦୦ ଟନ୍ ମଲ୍ଟି ଲେୟାର୍ଡ ପ୍ଲାଷ୍ଟିକ୍ ଦ୍ରବ୍ୟର ରିସାଇକ୍ଲିଂ କରୁଛନ୍ତି। ତାଙ୍କ ଦ୍ୱାରା ପ୍ରସ୍ତୁତ ଶିଟ୍ ଯଦି ନଷ୍ଟ ହେଉଛି ତେବେ ତାହାକୁ ମଧ୍ୟ ରିସାଇକ୍ଲିଂ କରାଯାଉଛି। ତେବେ ଏହି ଉତ୍ପାଦ ଅତି କମ୍ରେ ୧୫ ବର୍ଷ କୌଣସି କ୍ଷତି ହେବାର ଆଶଙ୍କା ନ ଥିବା କହନ୍ତି ରାହୁଲ। ଏବେ ସେ ଷ୍ଟାର୍ଟଅପ୍ର ରିସାଇକ୍ଲିଂର କ୍ଷମତା ୫୦୦ ଟନ୍ରୁ ୧୦୦୦ ଟନ୍କୁ ବୃଦ୍ଧି କରିବାକୁ ଯୋଜନା କରିଛନ୍ତି। ପ୍ଲାଷ୍ଟିକ୍ ବର୍ଜ୍ୟ ସମସ୍ୟା ସମାଧାନ କରି ପରିବେଶ ଉପଯୋଗୀ ଦ୍ରବ୍ୟ ପ୍ରସ୍ତୁତ କରୁଥିବାରୁ କନ୍ଫେଡେରେଶନ ଅଫ୍ ଇଣ୍ଡିଆନ୍ ଇଣ୍ଡଷ୍ଟ୍ରି (ସିଆଇଏସ୍) ତାଙ୍କୁ ସମ୍ମାନିତ କରିଛି। ଭାରତରେ ପ୍ୟାକେଜିଂରେ ବ୍ୟବହୃତ ପ୍ଲାଷ୍ଟିକ୍ ମଧ୍ୟରେ ମଲ୍ଟି ଲେୟାର୍ଡ ପ୍ଲାଷ୍ଟିକ୍ ୪୫% ରହୁଥିବାରୁ ଏଭଳି ବର୍ଜ୍ୟ ସମସ୍ୟା ଦୂର କରିବାରେ ରାହୁଲଙ୍କ ଷ୍ଟାର୍ଟଅପ୍ ଯଥେଷ୍ଟ ସହାୟକ ହୋଇଛି।