ମୁମ୍ବାଇରେ ଫୁଡ୍ ଫରେଷ୍ଟ ସୃଷ୍ଟି କରି ଜର୍ଜ ରେମିଡିଓସ୍ ସମସ୍ତଙ୍କ ପାଇଁ ପ୍ରେରଣା ପାଲଟିଛନ୍ତି। ଜର୍ଜଙ୍କ ବୟସ ୩୬। ସେ ୬ ବର୍ଷରେ ମୁମ୍ବାଇରେ ୧୦ଟି ଛୋଟ ଛୋଟ ଫୁଡ୍ ଫରେଷ୍ଟ ବା ଖାଦ୍ୟଭିତ୍ତିକ ଜଙ୍ଗଲ କରିଛନ୍ତି। ଏଥିରେ ଅମୃତଭଣ୍ଡା, ପିଜୁଳି, ଡାଳିମ୍ବ, କଦଳୀ, ଆମ୍ବ, ସଜନାଛୁଇଁ ସହ ଆହୁରି ଅନେକ ପ୍ରକାର ଫଳ ଗଛ ଲଗାଇଛନ୍ତି। କମ୍ ଜାଗାରେ ଏହି ଜଙ୍ଗଲ କରୁଛନ୍ତି ଓ ପ୍ରତ୍ୟେକରେ ପାଖାପାଖି ୧୦୦ ମଧ୍ୟରେ ଗଛ ଲଗାଉଛନ୍ତି। ଜଙ୍ଗଲରେ ଏବେ ବହୁ ପ୍ରକାର ପକ୍ଷୀ ଓ ମହୁମାଛିଙ୍କୁ ଦେଖିବାକୁ ମିଳୁଛି। ବୃଦ୍ଧାଶ୍ରମ, ଅନାଥ ଆଶ୍ରମ ଓ ସ୍କୁଲଗୁଡ଼ିକ ସହ ଚୁକ୍ତି କରି ସେମାନଙ୍କ ଜାଗାରେ ଜଙ୍ଗଲ କରୁଛନ୍ତି ଜର୍ଜ। ସେଠାକାର ଅଧିବାସୀଙ୍କୁ ଗଛର ସୁରକ୍ଷା ଦାୟିତ୍ୱ ଦେଉଛନ୍ତି। ଏହାଦ୍ୱାରା ପିଲାମାନଙ୍କର ଜଙ୍ଗଲ ପ୍ରତି ଆଗ୍ରହ ବୃଦ୍ଧି ପାଉଛି। ଜଙ୍ଗଲରେ ଜର୍ଜ ଛତୁଚାଷ କରିବାର ବ୍ୟବସ୍ଥା କରିଛନ୍ତି। ତାଙ୍କ ଦ୍ୱାରା ପ୍ରତିଷ୍ଠା କରାଯାଇଥିବା ‘ଟର୍ନିଂ ଟାଇଡ୍’ ସଂସ୍ଥା ମାଧ୍ୟମରେ ଏହି ଜଙ୍ଗଲ କରାଯାଉଛି। ୧୦ଟି ଜଙ୍ଗଲରେ ମୋଟରେ ୧୦୦୦ ଗଛ ଲଗାଇଥିତ୍ଲେ ଓ ଏବେ ସେଥିରୁ ୮୦% ରହିଛି। ଗୋଟିଏ ଫୁଡ୍ ଫରେଷ୍ଟ ଲାଗି ୧୫ରୁ ୩୦ ହଜାର ଟଙ୍କା ଖର୍ଚ୍ଚ ହେଉଛି ଓ ଲୋକମାନଙ୍କଠାରୁ ଦାନ ଆକାରରେ ଏହା ମିଳୁଛି ବୋଲି କହନ୍ତି ଜର୍ଜ।